India Vs Newzealand: ഇന്ത്യൻ ക്രിക്കറ്റ് ടീമിന് കനത്ത പിഴ ശിക്ഷ

വെല്ലിങ്ടൺ: ന്യൂസിലാൻഡിനെതിരായ നാലാം ടി 20 മത്സരത്തിൽ ഇന്ത്യൻ ക്രിക്കറ്റ് ടീമിന് ഐസിസി പിഴ ചുമത്തി. കുറഞ്ഞ ഓവർ നിരക്കിന്‍റെ പേരിലാണ് മാച്ച് ഫീയുടെ 40 ശതമാനം പിഴയായി ചുമത്താൻ മാച്ച് റഫറി ക്രിസ് ബ്രോഡ് തീരുമാനിച്ചത്. നിശ്ചിത സമയം പൂർത്തിയായപ്പോൾ ഇന്ത്യൻ ടീം രണ്ട് ഓവർ കൂടി എറിയാൻ ബാക്കിയുണ്ടായിരുന്നു.

കളിക്കാർക്കും ടീം ഒഫീഷ്യൽസിനുമുള്ള ഐസിസി പെരുമാറ്റച്ചട്ടത്തിലെ ആർട്ടിക്കിൾ 2.22 അനുസരിച്ച്, മിനിമം ഓവർ റേറ്റുമായി ബന്ധപ്പെട്ട് കളിക്കാരുടെ മാച്ച് ഫീസിന്‍റെ 20 ശതമാനമാണ് പിഴ.

എന്നാൽ ഇന്ത്യ രണ്ട് ഓവറുകൾ എറിയാൻ ബാക്കിയുള്ളതിനാൽ പിഴ ശിക്ഷ ഇരട്ടിയാക്കുകയായിരുന്നു.

നാലാം ടി 20 യിൽ ഓൺ-ഫീൽഡ് അമ്പയർമാരായ ക്രിസ് ബ്രൌൺ, ഷോൺ ഹെയ്ഗ് എന്നിവരും മൂന്നാം അമ്പയർ ആഷ്‌ലി മെഹ്‌റോത്രയും ചേർന്ന് നൽകിയ നിർദേശത്തിന്‍റെ അടിസ്ഥാനത്തിലാണ് മാച്ച് റഫറി പിഴ ശിക്ഷ ഈടാക്കിയത്.

കുറഞ്ഞ ഓവർ നിരക്കിനായി ഇന്ത്യ അവസാനമായി പിഴ ഒടുക്കിയത് 2014 ഓഗസ്റ്റിലാണ്. അന്ന് ഇംഗ്ലണ്ടിനെതിരായ ടെസ്റ്റ് മത്സരത്തിൽ നിശ്ചിത സമയം പൂർത്തിയായിട്ടും മൂന്ന് ഓവർ എറിയാൻ ബാക്കിവെച്ചതിന് ക്യാപ്റ്റനായിരുന്ന എം‌എസ് ധോണിക്ക് മാച്ച് ഫീസുകളുടെ 60% ഈടാക്കിയപ്പോൾ ടീം അംഗങ്ങൾക്ക് 30 ശതമാനം പിഴയുമാണ് ചുമത്തിയത്.

അഞ്ച് മത്സരങ്ങളുള്ള ടി 20 യിൽ ആതിഥേയരായ ന്യൂസിലൻഡിനെതിരെ ഇന്ത്യ 4-0ന് മുന്നിലാണ്.

പരമ്പരയിലെ അവസാന മത്സരം ഇന്ന് നടക്കും. ഈ കളി കൂടി ജയിച്ചാൽ ഇന്ത്യയ്ക്ക് 5-0ന് പരമ്പര തൂത്തുവാരാം. അതേസമയം സ്വന്തം നാട്ടിൽ ആശ്വാസജയമാണ് ന്യൂസിലാൻഡിന്‍റെ ലക്ഷ്യം.