IPL2019: ചെന്നൈയെ തകർത്ത് മുംബൈയുടെ കുതിപ്പ്

മുംബൈ: ഐപിഎല്ലിലെ സൂപ്പർ പോരാട്ടത്തിൽ മുംബൈ ഇന്ത്യൻസിന് തകർപ്പൻ ജയം. ചെന്നൈയെ 46 റൺസിനാണ് മുംബൈ തോൽപിച്ചത്. ജയത്തോടെ മുംബൈ ലീഗിൽ രണ്ടാം സ്ഥാനത്തെത്തി. അർദ്ധസെഞ്ച്വറി നേടിയ രോഹിത് ശർമയാണ് മാൻ ഓഫ് ദ മാച്ച്

ഐപിഎല്ലിലെ എൽ ക്ലാസികോ തുടങ്ങും മുമ്പേ ചെന്നൈക്ക് കനത്ത തിരിച്ചടിയേറ്റു. കടുത്ത പനിയെത്തുടർന്ന് ക്യാപ്റ്റൻ ധോണി ഹോട്ടൽ മുറിയിൽത്തന്നെ തങ്ങി. പകരം നായകനായ റെയ്നയുടെ നിയന്ത്രണത്തിൽ കാര്യങ്ങൾ നിന്നത് ടോസിൽ മാത്രം. മറുവശത്ത് ഉത്തരവാദിത്തെോടെ ബാറ്റ് ചെയ്ത് 67 റൺസെടുത്ത ക്യാപ്റ്റൻ രോഹിത് മുംബൈയെ 155 എന്ന ഭേദപ്പെട്ട സ്കോറിലെത്തിച്ചു.

ഇവാൻ ലൂയിസ് 32 ഉം ഹാർദിക് പാണ്ഡ്യ 23ഉം പൊള്ളാർഡ് 13 ഉം റൺസെടുത്തു

ചെന്നൈ നിരയിൽ രണ്ടക്കം കണ്ടത് മൂന്ന് പേർ മാത്രം. 38 റൺസെടുത്ത മുരളി വിജയ് ആണ് ടോപ് സ്കോറർ. 17.4 ഓവറിൽ 109 റൺസിന് ഇന്നിംഗ്സ് അവസാനിച്ചു. നാലു വിക്കറ്റുമായി മലിംഗയാണ് പന്തേറിൽ കേമനായത്.

സീസണിൽ ചെപ്പോക്കിലെ ചെന്നൈയുടെ ആദ്യ തോൽവിയായിരുന്നു ഇത്. ചെപ്പോക്കിൽ റൺസ് പിന്തുടരുമ്പോൾ സി എസ് കെ പരാജയപ്പെടുന്നത് 2013ന് ശേഷം ആദ്യവും.

കനത്ത പരാജയത്തോടെ നെഗറ്റീവ് നെറ്റ് റൺ റേറ്റായ ചെന്നൈക്ക് ഇനിയുളള മത്സരഫലങ്ങളെല്ലാം തീർത്തും പ്രതീകൂലമായാൽ പ്ലെ ഓഫ് ബർത്ത് നഷ്ടപ്പെടാനും സാധ്യതയുണ്ട്.