ഡൽഹിക്കെതിരെ ഹൈദരാബാദിന് ജയിക്കാൻ 156 റൺസ്

ഹൈദരാബാദ്: ഐപിഎല്ലിൽ ഡൽഹി ക്യാപിറ്റൽസിനെതിരെ സൺറൈസേഴ്സ് ഹൈദരാബാദിന് 156 റൺസ് വിജയലക്ഷ്യം. ടോസ് നഷ്ടപ്പെട്ട് ആദ്യം ബാറ്റുചെയ്യേണ്ടിവന്ന ഡൽഹി ക്യാപിറ്റൽസ് നിശ്ചിത 20 ഓവറിൽ ഏഴിന് 155 റൺസെടുക്കുകയായിരുന്നു. 45 റൺസെടുത്ത നായകൻ ശ്രേയസ് അയ്യരാണ് ഡൽഹിയുടെ ടോപ് സ്കോറർ. കോളിൻ മൺറോ 40 റൺസും റിഷഫ് പന്ത് 23 റൺസും നേടി.

ഓപ്പണർമാരായ പൃഥ്വി ഷാ (4), ശിഖര്‍ ധവാന്‍ (7) പെട്ടെന്ന് മടങ്ങിയതാണ് ഡൽഹിക്ക് തുടക്കത്തിലേ തിരിച്ചടിയായത്.

സൺറൈസേഴ്സിനുവേണ്ടി മൂന്നു വിക്കറ്റെടുത്ത ഖാലിദ് അഹമ്മദും രണ്ടു വിക്കറ്റെടുത്ത ഭുവനേശ്വർകുമാറുമാണ് ബൌളിങ്ങിൽ തിളങ്ങിയത്.

പരുക്ക് മൂലം കഴിഞ്ഞ മത്സരം കളിക്കാതിരുന്ന ക്യാപ്റ്റൻ കെയ്ൻ വില്യംസൺ ഹൈദരാബാദ് നിരയിൽ മടങ്ങിയെത്തി. ക്യാപ്റ്റനൊപ്പം ഖലീൽ അഹമ്മദ് അവസാന ഇലവനിൽ ഇടം നേടുകയായിരുന്നു.