IPL 2022 |ഒരു സീസണില്‍ എറിയുന്ന ഓരോ ബോളിനും 4.46 ലക്ഷം രൂപ; ഇന്ത്യന്‍ സ്റ്റാര്‍ ബൗളര്‍മാരെ മറികടന്ന് വിദേശതാരം

ഇത്തവണത്തെ മെഗാലേലത്തില്‍ ബാറ്റ്‌സ്മാന്‍മാര്‍ക്ക് മാത്രമല്ല, ചില ബൗളര്‍മാര്‍ക്കും വന്‍ തുകയാണ് ഫ്രാഞ്ചൈസികള്‍ ചെലവാക്കിയത്. പുതിയ സീസണിലെ ഏറ്റവും വില കൂടിയ അഞ്ചു ബൗളര്‍മാരേയും അവര്‍ക്കു ലഭിക്കുന്ന പ്രതിഫലത്തിന്റെ അടിസ്ഥാനത്തില്‍ എറിയുന്ന ഓരോ ബോളിനും എത്ര രൂപയായിയിരിക്കും ലഭിക്കുകയെന്നും അറിയാം.

ഇന്ത്യയുടെ സീം ബോളിംഗ് ഓള്‍റൗണ്ടറായ ശര്‍ദ്ദുല്‍ താക്കൂറിനെ 10.75 കോടി രൂപയ്ക്ക് ഡല്‍ഹി ക്യാപ്പിറ്റല്‍സാണ് ലേലത്തില്‍ വാങ്ങിയത്. ഇതനുസരിച്ച്, താരം എറിയുന്ന ഓരോ ബോളിനും ലഭിക്കുക 3.19 ലക്ഷം രൂപയായിരിക്കും.

10.75 കോടി രൂപയ്ക്കാണ് ഹര്‍ഷല്‍ പട്ടേലിനെ ആര്‍സിബി തിരികെ എത്തിച്ചത്. താരത്തിന്റെ ഒരു ബോളിന്റെ മൂല്യം 3.19 ലക്ഷം രൂപയാണ്.

12 കോടിയ്ക്കാണ് ജസ്പ്രീത് ബുംറയെ മുംബൈ ടീമില്‍ നിലനിര്‍ത്തിയത്. ബുംറയ്ക്കു ഒരു ബോളെറിഞ്ഞാല്‍ ലഭിക്കുന്ന പ്രതിഫലം 3.57 ലക്ഷം രൂപയായിരിക്കും.

ദീപക് ചാഹറാണ് ഇന്ത്യന്‍ ബോളര്‍മാരില്‍ ഏറ്റവും അധികം പ്രതിഫലം വാങ്ങുന്ന താരം. 14 കോടിയ്ക്കാണ് ചാഹറിനെ ചെന്നൈ സൂപ്പര്‍ കിംഗ്സ് തിരികെ ടീമിലെത്തിച്ചത്. താരത്തിന്റെ ഒരു ബോളിന്റെ മൂല്യം 4.16 ലക്ഷം രൂപയായിരിക്കും.

അഫ്ഗാനിന്‍ സ്റ്റാര്‍ സ്പിന്നര്‍ റാഷിദ് ഖാനാണ് ഐപിഎല്ലിന്റെ പുതിയ സീസണില്‍ ഏറ്റവുമുയര്‍ന്ന പ്രതിഫലം കൈപ്പറ്റുന്ന ബൗളര്‍. 15 കോടി രൂപ മുടക്കിയാണ് താരത്തിനെ ഗുജറാത്ത് ടീമിലെത്തിച്ചത്. ഗുജറാത്തിനായി എറിയുന്ന ഓരോ ബോളിനും 4.46 ലക്ഷം രൂപയാണ് അദ്ദേഹത്തിനു ലഭിക്കുക.

ഇന്ത്യന്‍ പ്രീമിയര്‍ ലീഗിന്റെ 15ആം സീസണിന് മാര്‍ച്ച് 26ാം തീയ്യതി ആരംഭമാവുകയാണ്. ലീഗ് ഘട്ടത്തില്‍ 70 മത്സരങ്ങളാണ് ഉള്ളത്. മേയ് 29-നാണ് ഫൈനല്‍.