IPL 2022 | മെഗാതാരലേലം; അവസാന ചുരുക്കപ്പട്ടികയിൽ ഇടം നേടി ശ്രീശാന്ത്; പട്ടികയിലെ മറ്റ് മലയാളി താരങ്ങളും അടിസ്ഥാനവിലയും

ഐപിഎല്‍ പതിനഞ്ചാം സീസണിൽ (IPL 2022) നടക്കാനിരിക്കുന്ന മെഗാതാരലേലത്തിനായുള്ള അന്തിമ പട്ടിക ബിസിസിഐ പുറത്തുവിട്ടു. 1214-ലധികം താരങ്ങള്‍ പേര് രജിസ്റ്റര്‍ ചെയ്തവരില്‍ 590 പേരെയാണ് അന്തിമ പട്ടികയിലേക്ക് തെരഞ്ഞെടുത്തിരിക്കുന്നത്. എസ് ശ്രീശാന്ത് (S Sreesanth) ഉള്‍പ്പെടെ കേരള ടീമിലെ പ്രമുഖ താരങ്ങള്‍ പട്ടികയില്‍ ഇടം നേടിയിട്ടുണ്ട്. ബെംഗളൂരുവില്‍ ഫെബ്രുവരി 12, 13 തിയതികളിലാണ് താരലേലം.

കഴിഞ്ഞ തവണ പേര് റജിസ്റ്റര്‍ ചെയ്തിട്ടും ടീമുകള്‍ താല്‍പര്യം പ്രകടിപ്പിക്കാതിരുന്നതിനാല്‍ ചുരുക്കപ്പട്ടികയില്‍ ഇടംപിടിക്കാതെ പോയ മലയാളി താരം ശ്രീശാന്ത് ഇത്തവണ ചുരുക്കപ്പട്ടികയില്‍ ഉള്‍പ്പെട്ട് ആദ്യ കടമ്പ കടന്നു. ഇതോടെ, താരലേലത്തില്‍ ശ്രീശാന്തിന്റെ പേരു വരുമെന്ന് ഉറപ്പായി. 50 ലക്ഷം രൂപ അടിസ്ഥാന വിലയായാണ് ശ്രീശാന്തിന്റെ പേര് താര ലേലത്തിലേക്ക് എത്തുക.

കേരള ക്രിക്കറ്റ് അസോസിയേഷനില്‍ നിന്ന് മെഗാ താരലേലത്തിന് എത്തുന്ന മറ്റൊരു പ്രമുഖ താരം റോബിന്‍ ഉത്തപ്പയാണ്. രണ്ട് കോടി രൂപയാണ് ഉത്തപ്പയുടെ അടിസ്ഥാന വില. കഴിഞ്ഞ സീസണിൽ ചെന്നൈ സൂപ്പർ കിങ്സിന് വേണ്ടിയായിരുന്നു ഉത്തപ്പ കളിച്ചത്.

റോയൽ ചലഞ്ചേഴ്‌സ് ബാംഗ്ലൂരിന്റെ ഭാഗമായിരുന്ന സച്ചിൻ ബേബിയും ലേലപ്പട്ടികയിലുണ്ട്. 20 ലക്ഷം രൂപയാണ് താരത്തിന്റെ അടിസ്ഥാന വില.

കഴിഞ്ഞ സീസണില്‍ റോയല്‍ ചലഞ്ചേഴ്‌സ് ബാംഗ്ലൂര്‍ ടീമില്‍ ഉള്‍പ്പെട്ട മറ്റൊരു മലയാളി താരമായ മുഹമ്മദ് അസ്ഹറുദ്ദീനും പട്ടികയിൽ ഉൾപെട്ടിട്ടുണ്ട്. 20 ലക്ഷം രൂപയാണ് അസ്ഹറുദ്ദീന്റെ അടിസ്ഥാന വില.

വിക്കറ്റ് കീപ്പര്‍ ബാറ്റ്‌സ്മാന്‍ വിഷ്ണു വിനോദ് ആണ് താര ലേലത്തിലേക്ക് എത്തുന്ന മറ്റൊരു മലയാളി താരം. 20 ലക്ഷം രൂപയാണ് വിഷ്ണു വിനോദിന്റേയും അടിസ്ഥാന വില. കഴിഞ്ഞ സീസണില്‍ ഡല്‍ഹി ക്യാപിറ്റല്‍സ് ആയിരുന്നു വിഷ്ണു വിനോദിനെ സ്വന്തമാക്കിയത്.

കഴിഞ്ഞ കുറച്ച് സീസണുകളിലായി സൺറൈസേഴ്‌സ് ഹൈദെരാബാദിന്റെ താരമായ പേസര്‍ ബേസില്‍ തമ്പി 30 ലക്ഷം രൂപ അടിസ്ഥാന വിലയുമായാണ് ഇത്തവണ ലേലത്തിൽ എത്തുക.

പേസര്‍ കെഎം ആസീഫിന്റെ പേരും താര ലേലത്തിനുണ്ട്. 20 ലക്ഷം രൂപയാണ് മുന്‍ ചെന്നൈ സൂപ്പര്‍ കിങ്‌സ് താരത്തിന്റെ അടിസ്ഥാന വില

ഇവർക്ക് പുറമെ മിഥുന്‍ സുദേശന്‍, രോഹന്‍ കുന്നുമ്മല്‍, എം.നിധീഷ്, സിജോമോൻ ജോസഫ് എന്നിവരാണ് അടിസ്ഥാന വില 20 ലക്ഷമായി താര ലേലത്തിന് എത്തുന്ന മറ്റ് മലയാളി താരങ്ങള്‍.