IPL 2023| 'സഞ്ജു ധോണിയെപ്പോലെ'; ഇരുവരെയും താരതമ്യം ചെയ്ത് ചാഹൽ

രാജസ്ഥാൻ റോയൽസ് നായകനും മലയാളിയുമായ സഞ്ജു സാംസണ് ചെന്നൈ സൂപ്പർ കിംഗ്സ് നായകനും ഇതിഹാസ താരമായ എംഎസ് ധോണിയുമായി ഒരുപാട് സാമ്യതകളുണ്ടെന്ന് യുസ്വേന്ദ്ര ചാഹൽ. ഏപ്രിൽ 23 ന് റോയൽ ചലഞ്ചേഴ്‌സ് ബാംഗ്ലൂരിനെതിരായ രാജസ്ഥാൻ റോയൽസിന്റെ ഐപിഎൽ മത്സരത്തിന് മുന്നോടിയായുള്ള ഒരു അഭിമുഖത്തിലാണ് ചാഹൽ ധോണിയെയും സഞ്ജുവിനെയും താരതമ്യം ചെയ്തത്. സഞ്ജു സാംസൺ ധോണിയെപ്പോലെ വളരെ ശാന്തനാണെന്ന് ചാഹൽ പറയുന്നു.

എട്ട് വർഷത്തോളം ബാംഗ്ലൂരിനൊപ്പമായിരുന്ന ചാഹൽ ചിന്നസ്വാമി സ്റ്റേഡിയത്തിലേക്ക് നാലുവർഷത്തിനുശേഷം തിരിച്ചെത്തുകയാണ്. എന്നാൽ ഇത്തവണ അദ്ദേഹം പന്തെറിയുന്നത് ബാംഗ്ലൂരിനെതിരെയാണെന്ന് മാത്രം, .

കഴിഞ്ഞ സീസണിൽ 27 വിക്കറ്റുമായി ഐ‌പി‌എൽ പർപ്പിൾ ക്യാപ്പ് ജേതാവായ ചാഹൽ, ഈ സീസണിലും മിന്നുന്ന ഫോമിലാണ്. ഈ സീസണിൽ ഇതുവരെ 11 വിക്കറ്റ് നേടിയ അദ്ദേഹം നിലവിൽ ഐ‌പി‌എൽ പർപ്പിൾ ക്യാപ് പോരാട്ടത്തിൽ അഞ്ചാം സ്ഥാനത്താണ്.

കരിയറിൽ ഇന്ത്യയ്ക്കുവേണ്ടിയും ഐപിഎല്ലിലും നാല് ക്യാപ്റ്റൻമാരുടെ കീഴിൽ കളിച്ചിട്ടുള്ള ചാഹൽ, എംഎസ് ധോണി, വിരാട് കോഹ്‌ലി, രോഹിത് ശർമ്മ, സഞ്ജു സാംസൺ എന്നിവരിൽ തന്റെ പ്രിയപ്പെട്ട ക്യാപ്റ്റൻ ആരാണെന്ന് വെളിപ്പെടുത്തി.

ഐപിഎല്ലിനെ സംബന്ധിച്ചിടത്തോളം സഞ്ജുവിനെ തന്റെ പ്രിയപ്പെട്ട ക്യാപ്റ്റനായി ചാഹൽ തിരഞ്ഞെടുത്തു. അതിനൊപ്പം എംഎസ് ധോണി, വിരാട് കോഹ്‌ലി, രോഹിത് ശർമ്മ എന്നിവരിൽ താൻ കണ്ടെത്തിയ സാമ്യങ്ങൾ എന്തൊക്കെയാണെന്ന് ചാഹൽ ഹ്യൂമൻസ് ഓഫ് ബോംബെയോട് പറഞ്ഞു.

മഹി ഭായിയോ വിരാട് കോഹ്‌ലിയോ രോഹിത് ശർമ്മയോ ആകട്ടെ, ഒരു ബൗളർക്ക് ആവശ്യമായ ആ സ്വാതന്ത്ര്യം ഞാൻ കളിച്ച മൂന്ന് ക്യാപ്റ്റന്മാരിൽനിന്നും ലഭിച്ചുവെന്ന് ഞാൻ കരുതുന്നു, ”32 കാരൻ പറഞ്ഞു.

"ഐപിഎല്ലിൽ സഞ്ജു സാംസൺ തീർച്ചയായും എന്റെ പ്രിയപ്പെട്ടവനാണ്. അക്ഷരാർത്ഥത്തിൽ സഞ്ജു, മഹി ഭായിയുമായി സാമ്യമുള്ള ആളാണെന്ന് എനിക്ക് തോന്നുന്നു, അദ്ദേഹം വളരെ ശാന്തനാണ്. കഴിഞ്ഞ വർഷം ഒരു ബൗളർ എന്ന നിലയിൽ 10 ശതമാനമോ മറ്റെന്തെങ്കിലും വളർച്ചയോ എനിക്കുണ്ടായത് സഞ്ജു കാരണമാണ്. അവൻ എന്നോട് പറഞ്ഞു, ‘നിനക്ക് നാല് ഓവർ ഉണ്ട്, നിനക്ക് ഇഷ്ടമുള്ളപോലെ ബൗൾ ചെയ്യൂ’, ചാഹൽ കൂട്ടിച്ചേർത്തു.