ISL 2020-21| ഒഗ്ബച്ചെയും ബോർഗസും ഗോളടിച്ചു; ഒഡീഷയെ തകർത്ത് മുംബൈ സിറ്റി

ബാംബൊലിം: ഐഎസ്എൽ ഏഴാം സീസണിലെ വിജയകുതിപ്പ് തുടർന്ന് മുംബൈ സിറ്റി. ഞായറാഴ്ച നടന്ന ആദ്യ മത്സരത്തില്‍ ഒഡിഷ എഫ്സിയെ എതിരില്ലാത്ത രണ്ടു ഗോളുകള്‍ക്ക് മുംബൈ സിറ്റി പരാജയപ്പെടുത്തി. സീസണില്‍ മുംബൈയുടെ തുടര്‍ച്ചയായ മൂന്നാം ജയമാണിത്.

30ാം മിനിറ്റില്‍ പെനാല്‍റ്റിയിലൂടെ ബര്‍ത്തലോമു ഓഗ്ബച്ചെയും ആദ്യ പകുതി അവസാനിക്കുന്നതിന് തൊട്ടുമുമ്പ് റൗളിന്‍ ബോര്‍ഗസുമാണ് മുംബൈക്കായി സ്‌കോര്‍ ചെയ്തത്. ഒഡിഷയെ തീര്‍ത്തും നിഷ്പ്രഭരാക്കിയായിരുന്നു മുംബൈ ജയം സ്വന്തമാക്കിയത്. ‌

ബോക്‌സില്‍ വെച്ച് ഒഡിഷ ഡിഫന്‍ഡര്‍ ശുഭം സാരംഗിയുടെ കൈയില്‍ പന്ത് തട്ടിയതിനായിരുന്നു മുംബൈക്ക് അനുകൂലമായി റഫറി പെനാല്‍റ്റി വിധിച്ചത്. കിക്കെടുത്ത ഓഗ്ബച്ചെ പന്ത് അനായാസം വലയിലെത്തിച്ചു.45ാം മിനിറ്റില്‍ ഹെഡറിലൂടെയായിരുന്നു റൗളിന്‍ ബോര്‍ഗസിന്റെ ഗോള്‍. ബിപിന്‍ സിങ്ങിന്റെ ക്രോസ് ബോക്‌സിലേക്ക് വന്നപ്പോള്‍ ഓടിക്കയറിയ ബോര്‍ഗസ് പന്ത് വലയിലെത്തിക്കുകയായിരുന്നു.

ഈ വിജയത്തോടെ മുംബൈ പോയിന്റ് പട്ടികയില്‍ ഏറ്റവും മുന്നിലുള്ള എടികെ മോഹൻ ബഗാനൊപ്പമെത്തി. നാലു കളികളിൽ ഒഡീഷയുടെ മൂന്നാം തോൽവിയാണിത്. പോയിന്റൊന്നും നേടാനാകാത്ത ഈസ്റ്റ് ബെംഗാൾ മാത്രമാണ് ഒഡീഷക്ക് പിന്നിലുള്ളത്.

മത്സരത്തിന്റെ ആദ്യ പകുതിയിൽ 62 ശതമാനം നേരവും പന്ത് കൈവശം വെച്ചത് മുംബൈ തന്നെയായിരുന്നു. രണ്ടാം പകുതിയിലും ഇതുതന്നെയായിരുന്നു സ്ഥിതി. രണ്ടാമത്തെ മത്സരത്തിൽ എഫ് സി ഗോവയും കേരള ബ്ലാസ്റ്റേഴ്സും ഏറ്റുമുട്ടുകയാണ്.