1770 കോടി രൂപ മാത്രമല്ല; അൽ നാസറിലേക്ക് എത്തിയപ്പോൾ റൊണാൾഡോയ്ക്ക് ലഭിച്ചത് കോടികൾ വിലയുള്ള അപൂർവ വാച്ചും

ലോകത്തെ മുഴുവൻ ഞെട്ടിച്ചു കൊണ്ടാണ് ക്രിസ്റ്റ്യാനോ റൊണാൾഡോ സൗദി അറേബ്യൻ ക്ലബ്ബായ അൽ നാസറിലേക്ക് പോയത്. 1770 കോടി രൂപയ്ക്കാണ് രണ്ട് വർഷത്തേക്ക് അൽ നാസറുമായി റൊണാൾഡോ കരാർ ഒപ്പിട്ടത്. ഗംഭീര വരവേൽപ്പായിരുന്നു താരത്തിന് സൗദിയിൽ ലഭിച്ചതും.

റൊണാൾഡോയുടെ പുതിയ ചുവട് ആഘോഷിക്കാൻ പ്രമുഖ വാച്ച് നിർമാതാക്കളായ ജേക്കബ് ആന്റ് കോ റൊണാൾഡോയ്ക്ക് അതിമനോഹരമായ ഒരു വാച്ച് സമ്മാനിച്ചതായാണ് പുതിയ റിപ്പോർട്ട്. (Image: JACOB & CO./Instagram)

ജേക്കബ് ആന്റ് കോയുടെ ഇൻസ്റ്റഗ്രാം പേജിൽ റൊണാൾഡോ ഈ വാച്ച് ധരിച്ച ഫോട്ടോ പങ്കുവെച്ചിട്ടുണ്ട്. ഇതുവരെ നിർമിച്ചവയിൽ വെച്ച് ഏറ്റവും ആഢംബരമായ വാച്ചെന്നാണ് കമ്പനി തന്നെ വിശേഷിപ്പിച്ചിരിക്കുന്നത്. സൗദിയിലേക്കുള്ള താരത്തിന്റെ അരങ്ങേറ്റം ആഘോഷിച്ചുകൊണ്ടാണ് വാച്ച് നിർമിച്ചിരിക്കുന്നത്. (Image: JACOB & CO./Instagram)

സൗദിയുടെ പതാകയെ പ്രതിനിധീകരിച്ച് കടും പച്ച നിറമാണ് വാച്ചിന് നൽകിയിരിക്കുന്നത്. കടുംപച്ച നിറത്തിലുള്ള രത്നങ്ങളാണ് വാച്ചിൽ ഉപയോഗിച്ചിരിക്കുന്നത്. ഇതിനൊപ്പം കടും പച്ച നിറത്തിലുള്ള സ്ട്രാപ്പും. 47-എംഎം കെയ്‌സ് 241 ബാഗെറ്റ്-കട്ട്. (Image: JACOB & CO./Instagram)

ജേക്കബ് ആന്റ് കോയുടെ ഔദ്യോഗിക വെബ്സൈറ്റിൽ ആറ് കോടിയാണ് ഈ അപൂർവ വാച്ചിന്റെ മൂല്യമെന്നാണ് പറയുന്നത്. അപൂർവ വാച്ചും റെക്കോർഡ് തുകയും സ്വന്തമാക്കി ക്രിസ്റ്റ്യാനോ സൗദിയിൽ എത്തിയപ്പോൾ വലിയ അത്ഭുതങ്ങൾ നടക്കുമെന്ന പ്രതീക്ഷയിലായിരുന്നു ആരാധകർ. (Image: JACOB & CO./Instagram)

എന്നാൽ ആരാധകരെ നിരാശരാക്കുന്ന പ്രകടനമായിരുന്നു സൗദി സൂപ്പർ കപ്പിൽ കഴിഞ്ഞ ദിവസമുണ്ടായത്. അൽ ഇതിഹാദിനോട് ഒന്നിനെതിരെ മൂന്നു ഗോളുകൾക്ക് തോറ്റ് സൗദി സൂപ്പർ കപ്പിൽ നിന്ന് അൽ നാസർ പുറത്തായി. രണ്ടാം മത്സരത്തിലും റൊണാൾഡോയ്ക്ക് ഗോൾ നേടാനായിരുന്നില്ല.