ന്യൂസിലാന്‍ഡിനെതിരായ ഏകദിന പരമ്പരയിലെ മോശം പ്രകടനത്തിന് പിന്നാലെ ഇന്ത്യന്‍ പേസര്‍ ജസ്പ്രീത് ബുംറയ്ക്ക് ഐസിസി റാങ്കിങ്ങില്‍ തിരിച്ചടി. ഐസിസി ഏകദിന ബൗളര്‍മാരുടെ റാങ്കിങ്ങില്‍ ബുംറയ്ക്ക് ഒന്നാം സ്ഥാനം നഷ്ടമായി. പരമ്പരയില്‍ ഒരു വിക്കറ്റ് പോലും നേടാന്‍ ബുംറയ്ക്ക് കഴിയാത്തതാണ് തിരിച്ചടിയായത്.
പരിക്ക് കാരണം പരമ്പരയില്‍ നിന്ന് വിട്ടുനിന്ന ന്യൂസിലാന്‍ഡ് താരം ട്രെന്‍ഡ് ബോള്‍ട്ടാണ് ബുംറയെ മറികടന്ന് ഒന്നാമതെത്തിയത്. ഒന്നാം സ്ഥാനത്ത് ബോള്‍ട്ടിന് 727 പോയന്റാണുള്ളത്. 719 പോയന്റുള്ള ബുംറ രണ്ടാം സ്ഥാനത്തേക്കിറങ്ങി.
ഇതുവരെയുള്ള കരിയറില്‍ ബുംറ ഒരു പരമ്പരയില്‍ വിക്കറ്റില്ലാതെ മടങ്ങുന്നത് ഇതാദ്യമായാണ്. മൂന്ന് മത്സരങ്ങളിലും 10 ഓവര്‍ തികച്ചെറിഞ്ഞ ബുംറ 167 റണ്‍സ് വിട്ടുകൊടുത്തു. ഇക്കണോമി റേറ്റ് 5.56. മികച്ച ഇക്കണോമിയില്‍ ബൗള്‍ ചെയ്യാറുള്ള ബുംറ ഈ പരമ്പരയില്‍ എറിഞ്ഞത് വെറും ഒരു മെയ്ഡന്‍ ഓവറാണ്.
