റിഷഭ് പന്തിനെ കൂവി കാണികൾ; വായടയ്ക്കാൻ ആവശ്യപ്പെട്ട് കോഹ്ലി

ബാറ്റുചെയ്യാൻ വന്നപ്പോഴും, ഫീൽഡിൽ എത്തിയപ്പോഴുമൊക്കെ റിഷഭ് പന്തിനെ കൂവിയാണ് കാര്യവട്ടത്തെ കാണികൾ വരവേറ്റത്. സഞ്ജു വി സാംസണെ തഴഞ്ഞതിലുള്ള ദേഷ്യവും സങ്കടവുമൊക്കെ മലയാളികളായ കാണികൾ തീർത്തത് റിഷഭ് പന്തിനോടായിരുന്നു.

പന്ത് ബാറ്റുചെയ്തപ്പോഴും ഔട്ടായപ്പോഴും കീപ്പ് ചെയ്തപ്പോഴുമൊക്കെ മലയാളികൾ കൂകി വിളിച്ചു. ഒടുവിൽ ഈ കൂക്കിവിളി അവസാനിപ്പിക്കാൻ സാക്ഷാൽ കോഹ്ലി തന്നെ രംഗത്തെത്തി. കാണികളോട് മിണ്ടാതിരിക്കാൻ കോഹ്ലി ആവശ്യപ്പെട്ടു. കൂക്കിവിളിക്കുന്നതിന് പകരം കൈയടിക്കണമെന്നാണ് കാണികളോട് കോഹ്ലി ആവശ്യപ്പെട്ടത്.

ന്യൂസിലാൻഡിനെതിരെ കഴിഞ്ഞ തവണ കാര്യവട്ടത്ത് നടന്ന മത്സരത്തിൽ കാണികളെക്കുറിച്ച് നല്ല അഭിപ്രായം കോഹ്ലി പാസാക്കിയിരുന്നു. ഇത്ര ഡിസിപ്ലിൻഡായിട്ടുള്ള കാണികളെ കണ്ടിട്ടില്ലെന്നായിരുന്നു കോഹ്ലി അന്ന് പറഞ്ഞത്. ഏതായാലും ഇന്നത്തെ മത്സരത്തോടെ കാര്യവട്ടത്തെ കാണികളെക്കുറിച്ചുള്ള മതിപ്പ് കോഹ്ലിക്ക് കുറഞ്ഞിട്ടുണ്ടാകും, തീർച്ച...