Mike Tyson | ഇടിക്കൂട്ടിൽ തിരിച്ചുവരവിന് തയ്യാറായി മൈക്ക് ടൈസൺ; കാത്തിരിപ്പ് അവസാനിക്കുന്നു

മുൻ ലോക ഹെവിവെയ്റ്റ് ചാമ്പ്യൻ മൈക്ക് ടൈസൺ ബോക്സിങ് റിങ്ങിലേക്ക് തിരിച്ചു വരുന്നുവെന്ന വാർത്തകൾ ഏറെ നാളായി കേട്ടു തുടങ്ങിയിട്ട്

ഇപ്പോൾ ഇതിൽ ഔദ്യോഗിക പ്രഖ്യാപനവുമായി എത്തിയിരിക്കുകയാണ് താരം.

സെപ്റ്റംബർ 12 ന് റോയ് ജോൺസ് ജൂനിയറുമായി ഏറ്റുമുട്ടിയാണ് 54 കാരനായ താരത്തിന്റെ മടങ്ങി വരവ്.

കാലിഫോർണിയയിൽ നടക്കുന്ന മത്സരം ബോക്സിങ് ആരാധകർക്ക് ആവേശകാഴ്ച്ചയാകുമെന്നതിൽ സംശയമില്ല.

51 കാരനായ ജോൺസ് 2018 ലാണ് വിരമിച്ചത്. ബോക്സിങ് റിങ്ങിലെ ഇതിഹാസ താരങ്ങളുടെ ഏറ്റുമുട്ടലിന് കാത്തിരിക്കുകയാണ് ആരാധകർ. ജീവകാരുണ്യ പ്രവർത്തനങ്ങൾക്കുവേണ്ടിയുള്ള ധനസമാഹരണത്തിനാണ് താരങ്ങൾ വീണ്ടും റിങ്ങിലെത്തുന്നത്.

അടുത്തിടെ ഇൻസ്റ്റഗ്രാം ലൈവിനിടെയാണ് റിങ്ങിലേക്ക് മടങ്ങിയെത്തുന്ന കാര്യം ടൈസൺ ലോകത്തെ അറിയിച്ചത്.

ഇതിനായുള്ള തയ്യാറെടുപ്പുകളും താരം തുടങ്ങിയിരുന്നു. ടൈസന്റെ പരിശീലന വീഡിയോകൾ ഇതിനകം വൈറലാണ്.

ഇരുപതാം വയസ്സിൽ ലോക ചാമ്പ്യനായ താരമാണ് മൈക്ക് ടൈസൺ. ഇതുവരെ ആ ലോക റെക്കോർഡ് മറികടക്കാൻ മറ്റൊരു താരത്തിനും സാധിച്ചിട്ടില്ല.

20 വര്‍ഷം നീണ്ട കരിയറിനിടയിൽ നേരിട്ട 50 എതിരാളികളില്‍ 44 പേരേയും ഇടിച്ചിട്ട താരത്തിന്റെ മറ്റൊരു തകർപ്പൻ പ്രകടനത്തിന് കാത്തിരിക്കുകയാണ് ആരാധകർ.

ഇടിക്കൂട്ടിൽ എതിരാളികളെ ഇടിച്ചിടുമ്പോഴും പുറത്ത് വിവാദങ്ങൾ നിറഞ്ഞതായിരുന്നു ടൈസന്റെ ജീവിതം.