Angling Championship | മഴയിലും തോരാത്ത ആവേശമായി ഏഴോം പുഴയോരത്തെ ദേശീയ ചൂണ്ടയിടല്‍ മത്സരം; ജേതാവായി കാസര്‍കോട് സ്വദേശി
69 പേര്‍ പങ്കെടുത്ത മത്സരത്തില്‍, 850 ഗ്രാം തൂക്കമുള്ള കൊളോന്‍ മത്സ്യം ചൂണ്ടയിട്ട് പിടിച്ച് കാസര്‍കോട് സ്വദേശി റഫീക്ക് കാദര്‍ ജേതാവായി
മഴയിലും തോരാത്ത ആവേശത്തോടെയാണ് ഏഴോം പുഴയില്‍ ദേശീയ ചൂണ്ടയിടല്‍ മത്സരം നടന്നത്. ഇടവിട്ട് പെയ്യുന്ന മഴയെ കൂസാതെ പുഴക്കരയില്‍ അക്ഷമരായിരുന്ന നൂറോളം പേര്‍. മത്സരം കാണികള്‍ക്ക് കൗതുകവുമായി. ചൂണ്ടയിടല്‍ അത്ര നിസ്സാരമല്ലെന്ന് തെളിയിച്ചു കൊണ്ട് വിവിധ സംസ്ഥാനങ്ങളില്‍ നിന്നും നൂറോളം പേരാണ് മത്സരത്തില്‍ പങ്കെടുത്തത്.
ജില്ലാ ടൂറിസം പ്രൊമോഷന്‍ കൗണ്‍സിലും ഏഴിലം ടൂറിസവുമായി ചേര്‍ന്ന് നടത്തിയ ചൂണ്ടയിടല്‍ മത്സരത്തില്‍ ആദ്യമീനെ ചൂണ്ടയിലാക്കിയത് ആലക്കോട് സ്വദേശി എം സി രാജേഷാണ്. 69 പേര്‍ പങ്കെടുത്ത മത്സരത്തില്‍, 850 ഗ്രാം തൂക്കമുള്ള കൊളോന്‍ മത്സ്യം ചൂണ്ടയിട്ട് പിടിച്ച് കാസര്‍കോട് സ്വദേശി റഫീക്ക് കാദര്‍ ജേതാവായി. 530 ഗ്രാമുള്ള ചെമ്പല്ലിയെ ചൂണ്ടയില്‍ കോര്‍ത്ത മലപ്പുറം സ്വദേശി എന്‍ സലാഹുദ്ദീന്‍ രണ്ടാം സ്ഥാനം നേടി. എം സി രാജേഷ് മൂന്നാം സ്ഥാനവും അഷ്റഫ് കാസര്‍കോട് നാലാം സ്ഥാനവും നേടി. ഒന്നാം സ്ഥാനത്തിന് 50,000 രൂപയും രണ്ടാം സ്ഥാനത്തിന് 25000 രൂപയുമാണ് സമ്മാനമായി ലഭിച്ചത്.
മഹാരാഷ്ട്ര, കര്‍ണാടക, ജാര്‍ഖണ്ഡ്, ആന്ധ്ര, തമിഴ്നാട് തുടങ്ങി വിവിധ സംസ്ഥാനങ്ങളില്‍ നിന്നെത്തിയ താരങ്ങള്‍ ഉള്‍പ്പെടെ 69 പേര്‍ ഏഴോം നങ്കലത്തെ കൊട്ടിലപ്പുഴയില്‍ നടന്ന മത്സരത്തില്‍ പങ്കാളികളായി. വേറിട്ട മത്സരത്തിലൂടെ വിനോദസഞ്ചാരത്തിന്റെ പുതിയ സാധ്യതകള്‍ തുറന്നതില്‍ ഏറെ സന്തോഷമുണ്ടെന്ന് മത്സരാര്‍ഥികള്‍ പറഞ്ഞു. ദേശിയ ചൂണ്ടയിടല്‍ താരം ബാഗ്ലൂര്‍ സ്വദേശി ഡെറിക് മുഖ്യാതിഥിയായി.
ഉദ്ഘാടന ചടങ്ങില്‍ ഏഴോം പഞ്ചായത്ത് പ്രസിഡണ്ട് പി ഗോവിന്ദന്‍, വൈസ് പ്രസിഡണ്ട് കെ എന്‍ ഗീത, സ്ഥിരം സമിതി അധ്യക്ഷന്‍ കെ പിഅനില്‍കുമാര്‍, പഞ്ചായത്തംഗം കെ വി രാജന്‍, മുന്‍ ജില്ലാ പഞ്ചായത്ത് പ്രസിഡണ്ട് ഒ വി നാരായണന്‍, സബ്കലക്ടര്‍ അനുകുമാരി, ടൂറിസം ഡെപ്യൂട്ടി ഡയറക്ടര്‍ കെ എസ് ഷൈന്‍, ഡിടിപിസി സെക്രട്ടറി ജെ കെ ജിജേഷ് കുമാര്‍, മാനേജര്‍ കെ സജീവന്‍, ഏഴിലം ചെയര്‍മാന്‍ പി അബ്ദുള്‍ ഖാദര്‍, എംഡി പി പി രവീന്ദ്രന്‍, ഏഴോം ബാങ്ക് പ്രസിഡണ്ട് കെ ചന്ദ്രന്‍, രാഷ്ട്രീയ പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
