പാക് പേസർ ഷഹീൻ അഫ്രീദി വിവാഹിതനായി; വധു ഷാഹിദ് അഫ്രീദിയുടെ മകൾ അൻഷ

പാകിസ്ഥാൻ യുവ പേസർ ഷഹീൻ അഫ്രീദി വിവാഹിതനായി. പാക്കിസ്ഥാൻ ക്രിക്കറ്റ് ടീം മുൻ ക്യാപ്റ്റൻ ഷാഹിദ് അഫ്രീദിയുടെ മകൾ അൻഷയാണു വധു.

കറാച്ചിയിൽ നടന്ന വിവാഹച്ചടങ്ങിൽ പാകിസ്ഥാൻ ക്യാപ്റ്റൻ ബാബർ അസം ഉൾപ്പെടെയുള്ള പ്രമുഖര്‍ പങ്കെടുത്തു. കഴിഞ്ഞ വർഷം ഷഹീൻ അഫ്രീദിയും അൻഷയും തമ്മിലുള്ള വിവാഹ നിശ്ചയം നടത്തിയിരുന്നു

പാകിസ്ഥാൻ ക്രിക്കറ്റ് താരങ്ങളായ സർഫറാസ് ഖാൻ, ശതബ് ഖാൻ, നസീം ഷാ തുടങ്ങിയവരും കറാച്ചിയിലെ വിവാഹത്തിൽ പങ്കെടുക്കാനെത്തിയിരുന്നു

ഷഹീന്റെയും അൻഷയുടെയും മെഹന്ദി ചടങ്ങ് നടന്നതായി കുടുംബ വൃത്തങ്ങൾ അറിയിച്ചു. വിവാഹത്തിന് രണ്ട് ദിവസം മുമ്പ് ഷഹീന്റെ കുടുംബം കറാച്ചിയിൽ എത്തിയിരുന്നു.

പാകിസ്ഥാൻ സൂപ്പർ ലീഗ് ടീം ലാഹോർ ക്വാലാൻഡേഴ്സ് ഔദ്യോഗിക ട്വിറ്റർ ഹാൻഡിലിൽ വിവാഹ ചിത്രങ്ങൾ പങ്കുവച്ചിട്ടുണ്ട്.

കഴിഞ്ഞ വർഷം ട്വന്റി20 ലോകകപ്പിനിടെ കാലിന് പരുക്കേറ്റ അഫ്രീദി, പാകിസ്ഥാൻ സൂപ്പർ ലീഗിനു മുന്‍പേ ഫിറ്റ്നസ് വീണ്ടെടുക്കാനുള്ള ശ്രമത്തിലാണ്

ഫെബ്രുവരി പതിമൂന്നിനാണ് പാകിസ്ഥാൻ സൂപ്പര്‍ ലീഗിന്റെ എട്ടാം പതിപ്പിന് തുടക്കമാകുന്നത്. ലാഹോർ ക്വാലാന്‍ഡേഴ്സും മുൾട്ടാൻ സുൽത്താൻസും തമ്മിലാണ് ആദ്യ മത്സരം. ലാഹോർ ടീമിന്റെ ക്യാപ്റ്റനാണ് ഷഹീൻ അഫ്രീദി. പിഎസ്എല്ലിന്റെ അവസാന സീസണിൽ ക്വാലാൻഡേഴ്സായിരുന്നു വിജയികൾ.

പുതുവർഷാരംഭത്തിൽ 4 പാക് താരങ്ങൾ വിവാഹിതരായി. ഇപ്പോൾ എല്ലാ കണ്ണുകളും ക്യാപ്റ്റൻ ബാബർ അസമിലാണ്. എപ്പോഴായിരിക്കും അസമിന്റെ വിവാഹം എന്നുള്ളതാണ് നഗരത്തിലെ സംസാര വിഷയം. അതേസമയം, ബാബർ അസം ഒരു പെൺകുട്ടിയുമായി പ്രണയത്തിലാണെന്ന് പറയപ്പെടുന്നു. ബാബറിന്റെ ബന്ധുവാണ് യുവതിയെന്നും പാക് മാധ്യമങ്ങൾ റിപ്പോർട്ട് ചെയ്യുന്നു.