19 വര്‍ഷത്തിനിടെ ആദ്യമായി റാഫേല്‍ നദാല്‍ ഫ്രഞ്ച് ഓപ്പണില്‍ നിന്ന് പിന്‍മാറി

സ്പാനിഷ് സൂപ്പർ താരം റാഫേൽ‌ നദാൽ ഫ്രഞ്ച് ഓപ്പൺ ടെന്നീസിൽ നിന്ന് പിന്മാറി. 2005-ൽ അരങ്ങേറ്റം കുറിച്ച 22 ഗ്രാൻഡ് സ്ലാം ജേതാവ് 19 വർഷത്തിനിടെ ഇതാദ്യമായാണ് ഫ്രഞ്ച് ഓപ്പണിൽ നിന്ന് പിന്മാറുന്നത്. പരിക്ക് കാരണമാണ് താരം മത്സരത്തില്‍ നിന്ന് പിന്മാറുന്നത്.

ഈ വർഷം ജനുവരിയിൽ നടന്ന ഓസ്‌ട്രേലിയൻ ഓപ്പണിൽ റാഫേൽ പരിക്കിനെ തുടർന്ന് അദ്ദേഹം പിന്മാറിയിരുന്നു.പുരുഷ സിംഗിൾസിൽ റാഫേൽ നദാലാണ് നിലവിലെ ചാമ്പ്യൻ. മെയ് 22 മുതലാണ് ഫ്രഞ്ച് ഓപ്പൺ ആരംഭിക്കുന്നത്. ജൂൺ 11ന് അവസാനിക്കും.

14 തവണ സിംഗിൾസ് കിരീടം നേടിയ നദാലിൻഫെ പേരിലാണ് ഫ്രഞ്ച് ഓപ്പൺ‌ ഏറ്റവും കൂടുതൽ സ്വന്തമാക്കിയതിന്‌റെ റെക്കോർഡ്. 2005ൽ അരങ്ങേറ്റത്തിൽ തന്നെ ഫ്രഞ്ച് ഓപ്പൺ നേടാൻ നദാലിന് കഴിഞ്ഞു. 19-ാം വയസിലായിരുന്നു ഈ നേട്ടം.

2022ല്‍ പതിനാലാം കിരീടനേട്ടവുമായി റെക്കോർഡ് ഇടുമ്പോൾ ഫ്രഞ്ച് ഓപ്പണ്‍ കിരീടം നേടുന്ന ഏറ്റവും പ്രായമുള്ള താരം എന്ന നേട്ടവും നദാൽ തന്റെ പേരിലാക്കിയിരുന്നു. എ.ടി.പി റാങ്കിങ്ങിൽ നിലവിൽ അഞ്ചാം സ്ഥാനത്താണ് നദാൽ.

ഓസ്‌ട്രേലിയൻ ഓപ്പണിനിടെ രണ്ടാം റൗണ്ടിൽ തോറ്റു പുറത്തായതിനെ തുടർന്ന് ജനുവരി മുതൽ നദാൽ കളിക്കളത്തിന് പുറത്തായിരുന്നു.മെൽബണിൽ മക്കെൻസി മക്‌ഡൊണാൾഡിനോട് തോറ്റ നദാൽ ഇടുപ്പിന് പരിക്കേറ്റതിനെ തുടർന്ന് മത്സരങ്ങൾ നിയന്ത്രിച്ചു. 2016ന് ശേഷം നദാലിന്റെ ആദ്യ ഗ്രാൻഡ്സ്ലാം പുറത്താകലായിരുന്നു ഇത്.