Sanju samosn |'സഞ്ജുവിന്റെ പ്രകടനത്തില്‍ നിരാശ തോന്നുന്നു; അവസരങ്ങള്‍ മുതലെടുത്തില്ല': വസിം ജാഫര്‍

ശ്രീലങ്കയ്‌ക്കെതിരെ നടന്ന ടി20 പരമ്പരയില്‍ മലയാളി താരം സഞ്ജു സാംസണിന്റെ പ്രകടനത്തില്‍ നിരാശ പ്രകടിപ്പിച്ച് മുന്‍ ഇന്ത്യന്‍ ഓപ്പണര്‍ വസിം ജാഫര്‍. അവസരങ്ങള്‍ ലഭിച്ചിട്ടും അതു മുതലെടുക്കാന്‍ കഴിയാതിരുന്ന സഞ്ജുവിന്റെ പ്രകടനത്തില്‍ നിരാശയുണ്ടെന്ന് വസീം ജാഫര്‍ ഒരു സ്‌പോര്‍ട്‌സ് മാധ്യമത്തോടു പറഞ്ഞു.

'അദ്ദേഹം അവസരങ്ങള്‍ മുതലെടുക്കുന്നില്ല. ശനി, ഞായര്‍ ദിവസങ്ങളിലെ ശ്രീലങ്കയ്‌ക്കെതിരായ മത്സരങ്ങള്‍ സഞ്ജുവിനു മികച്ചൊരു അവസരമായിരുന്നു. വിക്കറ്റ് കീപ്പിങ്ങിലെ മൂന്നാമതൊരു ഓപ്ഷനായും ബാറ്ററായും താരത്തിന് അവകാശവാദം ഉന്നയിക്കാമായിരുന്നു.'- വസിം ജാഫര്‍ പറഞ്ഞു.

'തനിക്ക് എന്തൊക്കെ സാധിക്കുമെന്നതിന്റെ സൂചന നല്‍കാന്‍ സഞ്ജുവിനു കഴിഞ്ഞു. പക്ഷേ അവസരം മുതലെടുക്കാനായില്ല. എനിക്കു വളരെ സങ്കടം തോന്നുന്നു, കാരണം ഈ ഫോര്‍മാറ്റില്‍ സഞ്ജുവിന് അത്രയേറെ കാര്യങ്ങള്‍ ചെയ്യാനാകുമായിരുന്നു.'- വസീം ജാഫര്‍ കൂട്ടിച്ചേര്‍ത്തു.

ടീം ഇന്ത്യയിലെ സ്ഥിരം സാന്നിധ്യങ്ങളായ വിരാട് കോഹ്ലി, റിഷഭ് പന്ത്, സൂര്യകുമാര്‍ യാദവ്, കെ.എല്‍. രാഹുല്‍ തുടങ്ങിയ താരങ്ങള്‍ ശ്രീലങ്കയ്‌ക്കെതിരെ കളിച്ചിരുന്നില്ല. അതുകൊണ്ടുതന്നെ സഞ്ജുവിന് കഴിവ് തെളിയിക്കാന്‍ മികച്ച അവസരമായിരുന്നു ഇത്.

ശ്രീലങ്കയ്ക്കെതിരെ ആദ്യ മത്സരത്തില്‍ സഞ്ജു കളിച്ചിരുന്നെങ്കിലും ബാറ്റിങ്ങിനു അവസരം ലഭിച്ചില്ല. ധരംശാലയില്‍ നടന്ന രണ്ടാം ട്വന്റി20യില്‍ ഐപിഎല്ലിലെ അതേ മികവ് ബാറ്റിങ്ങില്‍ പുറത്തെടുത്ത താരം 25 പന്തില്‍ 39 റണ്‍സെടുത്തു. മൂന്ന് സിക്‌സും രണ്ട് ഫോറും അടങ്ങുന്നതായിരുന്നു സഞ്ജുവിന്റെ ഇന്നിങ്‌സ്.

അവസാന മത്സരത്തില്‍ ഇഷാന്‍ കിഷന്‍ കളിക്കാത്തതിനാല്‍ വിക്കറ്റ് കീപ്പറുടെ ചുമതലയും സഞ്ജുവിന് ലഭിച്ചു. ബാറ്റിങ്ങില്‍ ക്യാപ്റ്റന്‍ രോഹിത് ശര്‍മയ്‌ക്കൊപ്പം ഓപ്പണറായി ഇറങ്ങിയ സഞ്ജു 12 പന്തില്‍ 18 റണ്‍സ് മാത്രമാണു നേടിയത്. ടി20 പരമ്പരയിലെ മൂന്ന് മത്സരങ്ങളും ജയിച്ച ഇന്ത്യ ശ്രീലങ്കയ്‌ക്കെതിരായ പരമ്പര സ്വന്തമാക്കി.