വ്യാജ പാസ്പോർട്ടുമായി യാത്ര; ബ്രസീൽ ഫുട്ബോൾ താരം റൊണാൾഡീഞ്ഞോ അറസ്റ്റിൽ

അസുൻസിയോൺ: വ്യാജ പാസ്പോർട്ടുമായി യാത്ര ചെയ്യാനുള്ള ശ്രമത്തിനിടെ ബ്രസീലിയൻ ഫുട്ബോൾ ഇതിഹാസം റൊണാൾഡീഞ്ഞോയും സഹോദരനും അറസ്റ്റിൽ. പരാഗ്വേയിലാണ് ഇരുവരും അറസ്റ്റിലായത്.

ഒരു ചാരിറ്റി പരിപാടിയുമായി ബന്ധപ്പെട്ട് ബുധനാഴ്ചയാണ് റൊണാൾഡീഞ്ഞോ പാരഗ്വായിലെത്തിയത്. തലസ്ഥാന നഗരമായ അസുൻസിയോണിലെ ഒരു പ്രമുഖ ഹോട്ടലിൽ താമസ സ്ഥലത്തെത്തിയാണ് പാരഗ്വായ് പൊലീസ് താരത്തെയും സഹോദരൻ റോബർട്ട് ഡി അസീസിനെയും അറസ്റ്റ് ചെയ്തത്

റൊണാൾഡീഞ്ഞോയെയും സഹോദരൻ റോബർട്ടോയെയും പൊലീസ് സ്റ്റേഷനിൽ എത്തിച്ചിട്ടില്ലെന്നും വ്യാജ യാത്രാ രേഖകളുമായി കസ്റ്റഡിയിലാണെന്നും പാരഗ്വേ ആഭ്യന്തര മന്ത്രാലയം സ്ഥിരീകരിച്ചു. ഇരുവരും നിരീക്ഷണത്തിലാണെന്നും അതിനു ശേഷം മാത്രമേ ഇരുവരെയും അറസ്റ്റ് ചെയ്യുമോ വേണ്ടയോ എന്ന് തീരുമാനിക്കുന്നതെന്നും മന്ത്രാലയം വ്യക്തമാക്കുന്നു.

ഇവർക്കൊപ്പമുണ്ടായിരുന്ന മറ്റൊരാളേക്കൂടി കസ്റ്റഡിയിലെടുത്തു. മൂവരും താമസിച്ചിരുന്ന ഹോട്ടലിൽത്തന്നെ പൊലീസ് നിരീക്ഷണത്തിൽ തുടരുകയാണ്.

വ്യാജ രേഖകളുമായി രാജ്യത്തേക്ക് പ്രവേശിക്കാൻ അനുവദിച്ച അധികാരികളുടെ ഉത്തരവാദിത്തവും ഞങ്ങൾ അന്വേഷിക്കുമെന്നും ആഭ്യന്തരമന്ത്രാലയം വ്യക്തമാക്കി.

കുട്ടികളുടെ ചാരിറ്റി കാമ്പെയ്‌നിൽ പങ്കെടുക്കാനും റൊണാൾഡീഞ്ഞോയുടെ കരിയറിനെക്കുറിച്ച് ഒരു പുതിയ പുസ്തകം പ്രസിദ്ധീകരിക്കാനുമാണ് സഹോദരങ്ങൾ ബുധനാഴ്ച രാവിലെ പരാഗ്വേയിൽ എത്തിയത്.

റൊണാൾഡീഞ്ഞോയും അസീസും ഉൾപ്പെടുന്ന ആദ്യത്തെ പാസ്‌പോർട്ട് വിവാദമല്ല ഇത്. 2015 നവംബറിലെ ഒരു കേസിന്റെ ഫലമായി പിഴ അടയ്ക്കുന്നതിൽ പരാജയപ്പെട്ടതിനെത്തുടർന്ന് 2018 നവംബറിൽ അവരുടെ യാത്രാ രേഖകൾ ബ്രസീൽ അധികൃതർ പിടിച്ചെടുത്തു.

റൊണാൾഡീഞ്ഞോ 2018 ൽ ഫുട്ബോളിൽ നിന്ന് വിരമിച്ചു. 2002ലെ ലോകകപ്പ് വിജയവും രണ്ട് ഫിഫ പ്ലേയർ ഓഫ് ദി ഇയർ അവാർഡുകളും ഉൾപ്പെടുന്നതാണ് താരത്തിന്റെ കരിയർ.