ICCയിൽ സൂര്യോദയം; ഏറ്റവും മികച്ച ട്വന്റി 20 താരത്തിനുള്ള പുരസ്‌കാരം സൂര്യകുമാർ യാദവിന്

2022-ലെ ഏറ്റവും മികച്ച ട്വന്റി 20 ക്രിക്കറ്റ് താരത്തിനുള്ള ഐ.സി.സിയുടെ പുരസ്‌കാരം ഇന്ത്യയുടെ സൂര്യകുമാര്‍ യാദവിന്. 2021 മാര്‍ച്ചില്‍ ഇംഗ്ലണ്ടിനെതിരെ ടി20 ക്രിക്കറ്റില്‍ അരങ്ങേറിയ സൂര്യകുമാര്‍ യാദവ് രണ്ട് വര്‍ഷത്തിനുള്ളിലാണ് ഐസിസിയുടെ മികച്ച താരമായി തെരഞ്ഞെടുക്കപ്പെടുന്നത്.

നിലവില്‍ ടി20 റാങ്കിംഗില്‍ ഒന്നാം സ്ഥാനത്താണ് സൂര്യകുമാര്‍ യാദവ്.പാകിസ്താന്റെ മുഹമ്മദ് റിസ്വാനെ മറികടന്നാണ് സൂര്യകുമാര്‍ പുരസ്‌കാരം നേടിയത്.2022-ല്‍ ആയിരത്തിലധികം റണ്‍സ് നേടിക്കൊണ്ട് സൂര്യകുമാര്‍ ചരിത്രം കുറിച്ചിരുന്നു.

2022-ല്‍ ഇന്ത്യയ്ക്ക് വേണ്ടി 31 മത്സരങ്ങള്‍ കളിച്ച സൂര്യകുമാര്‍ 46.56 ശരാശരിയില്‍ അടിച്ചുകൂട്ടിയത് 1164 റണ്‍സാണ്. 187.43 ആണ് താരത്തിന്റെ ശരാശരി. കഴിഞ്ഞ വര്‍ഷം ആകെ രണ്ട് സെഞ്ചുറികളും ഒമ്പത് അര്‍ധസെഞ്ചുറികളും നേടിയ സൂര്യ ഈ വര്‍ഷം ആദ്യം ആദ്യം ശ്രീലങ്കക്കെതിരെയും സെഞ്ചുറി നേടിയിരുന്നു.

കഴിഞ്ഞ വര്‍ഷം അന്താരാഷ്ട്ര ട്വന്റി 20യില്‍ ഏറ്റവുമധികം റണ്‍സെടുത്ത താരവും സൂര്യകുമാറാണ്. ട്വന്റി20 ചരിത്രത്തിൽ ഒരു വർഷത്തിൽ ഏറ്റവും കൂടുതൽ സിക്സുകൾ നേടുന്ന താരവും സൂര്യയാണ്. 68 സിക്സുകളാണ് സൂര്യകുമാർ യാദവ് 2022ൽ നേടിയത്.

ട്വന്റി20 ക്രിക്കറ്റിൽ 45 മത്സരങ്ങളിൽനിന്ന് 1578 റൺസാണു താരം ഇതുവരെ സ്വന്തമാക്കിയിട്ടുള്ളത്. 2021-ല്‍ ഇംഗ്ലണ്ടിനെതിരായ മത്സരത്തിലൂടെയാണ് താരം ട്വന്റി 20യില്‍ ഇന്ത്യയ്ക്ക് വേണ്ടി അരങ്ങേറ്റം നടത്തിയത്.