നരേന്ദ്ര മോദി അധികാരത്തിൽ തുടരുന്നിടത്തോളം കാലം ഇന്ത്യാ- പാക് ബന്ധം മെച്ചപ്പെടില്ല: ഷാഹിദ് അഫ്രീദി

പ്രധാനമന്ത്രി നരേന്ദ്രമോദി ചിന്തിക്കുന്നത് നിഷേധാത്മകമായിട്ടാണെന്നും അദ്ദേഹം അധികാരത്തിൽ തുടരുന്നിടത്തോളം കാലം ഇന്ത്യ- പാക് ബന്ധം മെച്ചപ്പെടില്ലെന്നും മുൻ പാക് ക്രിക്കറ്റ് താരം ഷാഹിദ് അഫ്രീദി.

മോദി അധികാരത്തിൽ തുടരുന്നിടത്തോളം ഇന്ത്യയിൽ നിന്ന് അനുകൂലമായ പ്രതികരണമുണ്ടാകുമെന്ന് ഞാൻ കരുതുന്നില്ല. ഇന്ത്യക്കാർ ഉൾപ്പെടെ നമ്മളെല്ലാവരും മോദി ചിന്തിക്കുന്നതിനെ കുറിച്ച് മനസ്സിലാക്കണം. നിഷേധാത്മകമായിട്ടാണ് അദ്ദേഹം ചിന്തിക്കുന്നത്- ക്രിക്കറ്റ് പാകിസ്ഥാന് നൽകിയ അഭിമുഖത്തിൽ അഫ്രദി പറഞ്ഞു.

ഇന്ത്യയും പാകിസ്ഥാനും തമ്മിലുള്ള ക്രിക്കറ്റ് മത്സരം പുനരാരംഭിക്കുന്നത് സംബന്ധിച്ച ചോദ്യത്തോട് പ്രതികരിക്കുകയായിരുന്നു അഫ്രീദി.

ഇന്ത്യ - പാകിസ്ഥാൻ ബന്ധം വഷളാകാൻ ഒരേ ഒരാളാണ് കാരണം. അതല്ല നമുക്ക് വേണ്ടത്. അതിർത്തിയുടെ ഇരുഭാഗത്തുള്ളവരും പരസ്പരം ഇരുരാജ്യങ്ങളിലേക്കും സഞ്ചരിക്കാൻ ആഗ്രഹിക്കുന്നു. മോദി എന്താണ് ചെയ്യാൻ ആഗ്രഹിക്കുന്നതെന്നും അദ്ദേഹത്തിന്റെ അജണ്ട എന്താണെന്നും മനസ്സിലാകുന്നില്ല- അഫ്രീദി കൂട്ടിച്ചേർത്തു.

2013 മുതൽ മറ്റ് രാജ്യങ്ങളിൽ വെച്ചുനടക്കുന്ന പരമ്പരകളിൽ അല്ലാതെ ഇന്ത്യയും പാകിസ്ഥാനും തമ്മിൽ ഉഭയകക്ഷി മത്സരങ്ങൾ കളിക്കുന്നില്ല. ഏറ്റവും ഒടുവിൽ മൂന്ന് ഏകദിന മത്സരങ്ങൾക്കായാണ് പാകിസ്ഥാൻ ടീം ഇന്ത്യയിലേക്ക് എത്തിയത്. ഇന്ത്യൻ ടീം അവസാനമായി പാകിസ്ഥാൻ സന്ദർശിച്ചത് 2006ൽ രാഹുൽ ദ്രാവിഡ് ക്യാപ്ററനായിരുന്നപ്പോഴായിരുന്നു. 2008ലെ മുംബൈ ഭീകരാക്രമണത്തിന് ശേഷം ഐസിസി പരമ്പരകളില്‍ അല്ലാതെ ഇന്ത്യയും പാകിസ്ഥാനും മുഖാമുഖം ഏറ്റുമുട്ടിയിട്ടില്ല.