Tokyo Olympics| മൂന്നാം ദിനം: മണിക ബത്ര, സിന്ധു, മേരി കോം മുന്നോട്ട്; ഹോക്കിയിലും ഷൂട്ടിങ്ങിലും നിരാശ

ഷൂട്ടിങ്ങിൽ ഇന്ത്യയുടെ മെഡൽ പ്രതീക്ഷയായിരുന്ന മനു ഭാകറിന്റെ പുറത്താകൽ ദൗർഭാഗ്യകാര്യമായിരുന്നു. ഷൂട്ടിങ്ങിൽ വനിതകളുടെ 10മീറ്റർ എയർ പിസ്റ്റളിൽ താരത്തിന്റെ തോക്കിലെ പിസ്റ്റൾ ട്രിഗറിൽ സംഭവിച്ച തകരാറാണ് ലോക രണ്ടാം നമ്പർ താരത്തിന് ആദ്യ പത്തിൽ ഉൾപ്പെടുന്നതിൽ നിന്നും തിരിച്ചടിയായത്. (AP Photo)

ഷൂട്ടിങ്ങിൽ ലോക ഒന്നാം നമ്പർ താരമായ ഇന്ത്യയുടെ യശസ്വി സിങ് ദേഷ്വാൾ നന്നായി തുടങ്ങിയെങ്കിലും സ്ഥിരത പുലർത്താൻ കഴിയാതിരുന്നതിനാൽ വനിതകളുടെ പിസ്റ്റൾ ഇനത്തിൽ 13ആം സ്ഥാനത്ത് ഒരുങ്ങുകയായിരുന്നു. (AFP Photo)

ടേബിൾ ടെന്നിസിൽ പുരുഷ വിഭാഗത്തിൽ രണ്ടാം റൗണ്ട് മത്സരത്തിൽ ജയത്തിന്റെ വക്കിൽ നിന്നുമാണ് സത്യൻ ജ്ഞാനശേഖരൻ തോൽവിയിലേക്ക് വീണത്. ഹോങ്കോങിന്റെ ലാം സിയു ഹാംഗിനോട് നാലിനെതിരെ മൂന്ന് സെറ്റുകൾക്കായിരുന്നു ഇന്ത്യൻ താരത്തിന്റെ തോൽവി. (AFP Photo)

ടെന്നിസിൽ ഡബിൾസിൽ ഇന്ത്യയുടെ പ്രതീക്ഷയായിരുന്ന സാനിയ മിർസ - അങ്കിത റെയ്‌ന സഖ്യം ഉക്രൈന്റെ ഇരട്ട സഹോദരിമാരായ നാദിയ കിച്ചെനോക്ക് - ലിയൂഡ് മൈല സഖ്യത്തോട് തോറ്റ് പുറത്തായി. ഒന്നിനെതിരെ രണ്ട് സെറ്റുകൾക്കാണ് ഇന്ത്യൻ സഖ്യം തോൽവി സമ്മതിച്ചത്. ആദ്യ സെറ്റ് ദയനീയമായി തോറ്റ അവർ രണ്ടാം സെറ്റ് നേടി പ്രതീക്ഷ പകർന്നെങ്കിലും മൂന്നാം സെറ്റിൽ ഉക്രൈൻ സഖ്യത്തിന്റെ പോരാട്ടവീര്യത്തിന് മുന്നിൽ കീഴ്നടങ്ങുകയായിരുന്നു. സ്കോർ: 6-0, 6-7, 8-10 (IG/Ankita Raina)

തുഴച്ചിലിൽ ലൈറ്റ്‌വെയ്റ്റ് ഡബിൾ സ്കൾസ് വിഭാഗത്തിൽ ഇന്ത്യയുടെ താരങ്ങളായ അർജുൻ ലാൽ ജാട്ടും അരവിന്ദ് സിങ്ങും ഹീറ്റ്സിലെ മികച്ച പ്രകടനത്തിന്റെ ബലത്തിൽ സെമിഫൈനലിലേക്ക് യോഗ്യത നേടി. സീ ഫോറെസ്റ് വാട്ടർവെയ്സിൽ നടന്ന മത്സരത്തിൽ 6:51:36 സെക്കൻഡിൽ മൂന്നാം സ്ഥാനത്താണ് ഇവർ മത്സരം അവസാനിപ്പിച്ചത്. (AFP Photo)

ഷൂട്ടിങ്ങിൽ ഒരു മെഡലിനായുള്ള ഇന്ത്യയുടെ കാത്തിരിപ്പ് തുടരുകയാണ്. മെഡൽ പ്രതീക്ഷ പുലർത്തി ഇറങ്ങിയ ദീപക് കുമാറും ദിവ്യാൻശ് സിങ് പൻവാറും (ചിത്രത്തിൽ) പുരുഷന്മാരുടെ 10മീറ്റർ എയർ റൈഫിൾ ഇനത്തിൽ യഥാക്രമം 26, 32 എന്നീ സ്ഥാനങ്ങളിൽ ഒതുങ്ങി. (AFP Photo)

ഒളിംപിക്സിൽ ഇന്ത്യയുടെ മെഡൽ പ്രതീക്ഷയായ പി. വി സിന്ധുവിന് ആദ്യ മത്സരത്തില്‍ ത്രസിപ്പിക്കുന്ന വിജയം. ആദ്യ റൗണ്ടില്‍ ഇസ്രായേലിന്റെ പോളികാര്‍പ്പോവയെ തോല്‍പ്പിച്ചാണ് സിന്ധു തുടങ്ങിയത്. കേവലം 13 മിനിട്ടിനുള്ളിൽ അവസാനിച്ച മത്സരത്തിൽ 21-7, 21-10 എന്ന സ്കോറിനായിരുന്നു സിന്ധുവിന്‍റെ തകർപ്പൻ ജയം. (AP Photo)

ഒളിമ്പിക്സിൽ വനിതകളുടെ ടേബിൾ ടെന്നീസ് സിംഗിൾസ് മത്സരത്തിൽ മണിക ബത്ര മൂന്നാം റൗണ്ടിൽ പ്രവേശിച്ചു. രണ്ടാം റൗണ്ട് മത്സരത്തിൽ ഉക്രൈൻ താരമായ മാർഗരിറ്റ പെസോട്‌സ്കയെയാണ് ബത്ര പരാജയപ്പെടുത്തിയത്. ആദ്യ രണ്ട് സെറ്റുകൾ നഷ്ടപെട്ടതിന് ശേഷം ശക്തമായി തിരിച്ചുവന്നാണ് ഇന്ത്യൻ താരം മത്സരം സ്വന്തമാക്കിയത്. ലോക റാങ്കിങ്ങിൽ തന്നെക്കാൾ മുന്നിലായിരുന്ന മാർഗരിറ്റ പെസോട്‌സ്കയെ 57 മിനിറ്റ് നീണ്ട പോരാട്ടത്തിനൊടുവിൽ മൂന്നിനെതിരെ നാല് സെറ്റുകൾ സ്വന്തമാക്കിയാണ് ബത്ര വിജയം നേടിയത്. സ്‌കോര്‍ 4-11, 4-11, 11-7, 12-10, 8-11, 11-5, 11-7. (AP Photo)

ജിംനാസ്റ്റിക്സിൽ ഇന്ത്യയുടെ ഏക താരമായ പ്രനീതി നായിക്കിന് ആർട്ടിസ്റ്റിക് ജിംനാസ്റ്റിക്സ് മത്സരത്തിന്റെ ഓൾ റൗണ്ട് ഫൈനൽസിലേക്ക് യോഗ്യത നേടാൻ കഴിഞ്ഞില്ല. ഫ്ലോർ എക്സർസൈസ്, വോൾട്ട്, അൺഈവൻ ബാർസ്, ബാലൻസ് ബീം എന്നീ നാല് വിഭാഗത്തിൽ മത്സരിച്ച താരം 42.565 മാർക്ക് നേടി. (AFP Photo)

ആറ് തവണ ലോക ചാമ്പ്യനും 2012 ലണ്ടൻ ഒളിമ്പിക്സിൽ വെങ്കല മെഡൽ ജേതാവുമായ മേരി കോം 51 കിലോ ഫ്രീസ്റ്റൈൽ ബോക്സിങ്ങിൽ ഡൊമിനിക്കൻ റിപ്പബ്ലിക്കിന്‍റെ മിഗ്വേലിന ഹെർണാണ്ടസിനെ വനിതകളുടെ 4-1 എന്ന സ്കോറിന് തോൽപ്പിച്ച് പ്രീക്വാർട്ടറിൽ പ്രവേശിച്ചു, (AFP Photo)

സെയ്‌ലിങ്ങിൽ രണ്ട് റൗണ്ട് മത്സരത്തിന് ശേഷം ഇന്ത്യയുടെ നേത്ര കുമാനന 27ആമതായി മത്സരം അവസാനിപ്പിച്ചു. അതേസമയം ആദ്യ റൗണ്ടിൽ 14ആമത് എത്തിയ വിഷ്ണു ശരവണന്റെ രണ്ടാം റൗണ്ടിലെ മത്സരം മോശം കാലാവസ്ഥയെ തുടർന്ന് മാറ്റിവെച്ചു (AFP Photo)

ബോക്സിങ്ങിൽ പുരുഷന്മാരുടെ 63കിലോ വിഭാഗത്തിലൂടെ ഇന്ത്യക്കായി ഒളിമ്പിക്സിൽ അരങ്ങേറിയ മനു കൗശിക് ( ചുവപ്പ് ജേഴ്‌സി) ബ്രിട്ടന്റെ ലൂക്ക് മക്കോർമാക്കിനോട് ആദ്യ റൗണ്ടിൽ 4-1ന് തോറ്റ് പുറത്തായി. അരങ്ങേറ്റ മത്സരത്തിൽ എതിരാളിക്കൊപ്പം നിൽക്കുന്ന പ്രകടനമാണ് പുറത്തെടുത്തതെങ്കിലും മികവ് തുടരാൻ കഴിഞ്ഞില്ല.  (AFP Photo)

നീന്തലിൽ പുരുഷ വിഭാഗം 100 മീറ്റർ ബാക്ക്സ്‌ട്രോക്കിൽ മത്സരിക്കാൻ ഇറങ്ങിയ ശ്രീഹരി നടരാജ്‌ ഹീറ്റ്‌സിൽ അഞ്ചാമതായാണ് ഫിനിഷ് ചെയ്തത്. മൊത്തം മത്സരാർഥികളിൽ 27ആമതായതിനാൽ താരത്തിന് സെമിയിലേക്ക് മുന്നേറാൻ കഴിഞ്ഞില്ല. (AFP Photo)

വനിതകളുടെ 100 മീറ്റർ ബാക്കസ്ട്രോക്ക് ഇനത്തിൽ 39ആം സ്ഥാനത്തായാണ് മാനാ പട്ടേൽ മത്സരം അവസാനിപ്പിച്ചത്. താരത്തിനും സെമിയിലേക്ക് മുന്നേറാൻ കഴിഞ്ഞില്ല. (AP Photo)

മൂന്നാം ദിനത്തിൽ ഇന്ത്യൻ ആരാധകർക്ക് ഏറ്റവും നിരാശ പകരുന്ന വാർത്ത ഇന്ത്യയുടെ ഹോക്കി ടീമിന്റെ തോൽവിയായിരുന്നു. ഹോക്കിയിൽ രണ്ടാമത്തെ പൂൾ മത്സരത്തിന് ഇറങ്ങിയ ഇന്ത്യയുടെ പുരുഷ ടീം ലോക ഒന്നാം നമ്പർ ടീമായ ഓസ്‌ട്രേലിയയോട് 7 - 1നാണ് തോറ്റത്. (AP Photo)