പന്ത്രണ്ടാം വയസ്സിൽ ഒളിംപ്യൻ ശങ്കർ എന്ന ഇമെയിൽ വിലാസമുണ്ടാക്കിയ ശ്രീശങ്കർ; നാളെ ഒളിംപിക്സിന് ടോക്യോവിലേക്ക്

പന്ത്രണ്ടാം വയസ്സിൽ ഒളിംപ്യൻശങ്കർ എന്ന പേരിൽ ഇ മെയിൽ വിലാസമുണ്ടാക്കിയ ആളാണ് പാലക്കാട് യാക്കര സ്വദേശി ശ്രീശങ്കർ. ദേശീയ ട്രിപ്പിള്‍ ജംപ് താരമായിരുന്ന എസ് മുരളിയുടെയും ദേശീയ അത് ലറ്റായിരുന്ന കെ എസ് ബിജിമോളുടെയും മകനായ ശ്രീശങ്കറിന് മാതാപിതാക്കളെ പോലെ തന്നെ ജീവനായിരുന്നു സ്പോർട്സ്. അച്ഛൻ്റെയും അമ്മയുടെയും കായിക ജീവിതം ഈ മകനെ അത്രമേൽ സ്വാധീനിച്ചിരുന്നു.‌

ഒളിംപിക്സായിരുന്നു സ്വപ്നം. അങ്ങനെയാണ് ചെറുപ്പത്തിൽ തന്നെ ഒളിംപ്യൻശങ്കർ എന്ന പേരിൽ ഇ മെയിൽ വിലാസമുണ്ടാക്കിയത്.  ഇങ്ങനെയൊരു ഇമെയിൽ വിലാസം കണ്ടാൽ നാട്ടുകാർ കളിയാക്കുമെന്ന് വീട്ടുകാർ പറഞ്ഞു. എന്നാൽ തൻ്റെ സ്വപ്നമാണെന്ന് പറഞ്ഞ് ആ ഇ മെയിൽ വിലാസം ഉപേക്ഷിച്ചില്ല. ഇപ്പോഴിതാ ഇരുപത്തിരണ്ടാമത്തെ വയസിൽ ശ്രീശങ്കർ രാജ്യത്തെ പ്രതിനിധീകരിച്ച് ഒളിംപിക്സിൽ പങ്കെടുക്കാൻ ടോക്യോവിലേയ്ക്ക് പോവുകയാണ്.

വീട്ടുകാരെ സംബന്ധിച്ച് അഭിമാന നിമിഷമാണ്. കായിക താരങ്ങളായ മാതാപിതാക്കളുടെ സ്വപ്നമായിരുന്നു ഒളിംപിക്സ്. ആ സ്വപ്നമാണ് മകനിലൂടെ നിറവേറുന്നത്. തികഞ്ഞ വിജയപ്രതീക്ഷയിലാണ് ശ്രീശങ്കർ. ലോംഗ്ജംപിലാണ് ശ്രീശങ്കർ മത്സരിയ്ക്കുന്നത്. കായിക താരമായ പിതാവ് എസ് മുരളി തന്നെയാണ് പരിശീലകൻ. ജൂലൈ 31 ന്  ഇന്ത്യൻ സമയം 3.30 നാണ് മത്സരം. 

മികച്ച രീതിയിൽ പരിശീലനം നടത്താൻ കഴിഞ്ഞതിൻ്റെ ആത്മവിശ്വാസമുണ്ടെന്ന് ശ്രീശങ്കർ പറയുന്നു. ഒളിംപിക്സിൽ മികച്ച പ്രകടനം നടത്താൻ കഴിയുമെന്ന് പ്രതീക്ഷിയ്ക്കുന്നു. രണ്ടു വർഷത്തിലേറെയായി നടത്തുന്ന കഠിന പരിശീലനത്തിന് ഫലമുണ്ടാകുമെന്ന് കരുതുന്നതായും എല്ലാവരുടെയും പ്രാർത്ഥനയുണ്ടാകണമെന്നും ശ്രീശങ്കർ പറഞ്ഞു. 

പരിശീലകൻ കൂടിയായ അച്ഛൻ മുരളിയും തികഞ്ഞ ആത്മവിശ്വാസത്തിലാണ്. ഞങ്ങൾ ഈയൊരു നിമിഷത്തിന് വേണ്ടിയാണ് കാത്തിരുന്നതെന്നും മെഡൽ നേടാൻ കഴിയുമെന്ന് പ്രതീക്ഷിയ്ക്കുന്നതായും മുരളി പറഞ്ഞു.  മകനോടൊപ്പം അച്ഛൻ മുരളി ടോക്യോവിലേക്ക് പോവുമ്പോൾ അമ്മ. ബിജിമോൾ, പ്രാർത്ഥനകളുമായി പാലക്കാട് യാക്കരയിലെ വീട്ടിലുണ്ട്.

മകൻ രാജ്യത്തിന് വേണ്ടി മെഡൽ ഉയർത്തുമെന്ന ഉറച്ച പ്രതീക്ഷയിലാണ് ബിജിമോൾ. ഒളിംപിക്സിൽ പങ്കെടുക്കുകയെന്നത് മകൻ്റെ മാത്രമല്ല ഞങ്ങളുടെയും സ്വപ്നമായിരുന്നുവെന്നും അതാണ് യഥാർത്ഥ്യമാവുന്നതെന്നും ബിജിമോൾ പറഞ്ഞു.

ചെറുപ്പത്തിലേ തന്നെ ഒളിംപിക്സ് ലക്ഷ്യമിട്ടാണ് മകൻ പരിശീലനങ്ങൾ നടത്തിയിരുന്നത്. അതിൻ്റെ ഫലം കൂടിയാണ് ടോക്യോ ഒളിംപിക്സിലേക്ക് യോഗ്യത നേടാൻ കഴിഞ്ഞതെന്നും ഇവർ വ്യക്തമാക്കി.

പട്യാല ഫെഡറേഷന്‍ കപ്പ് സീനിയര്‍ അത്ലറ്റിക് ചാന്പ്യന്‍ഷിപ്പില്‍ സ്വന്തം റെക്കോര്‍ഡ് തിരുത്തി 8.26 മീറ്റര്‍ ചാടിയാണ് ശ്രീശങ്കര്‍ ഒളിംപിക്സിന് യോഗ്യത നേടിയത്. എഷ്യന്‍ ജൂനിയര്‍ അത്ലറ്റിക് ചാംപ്യന്‍ഷിപ്പില്‍ വെങ്കല മെഡല്‍ നേടിയ ശ്രീശങ്കര്‍ ദേശീയ തലത്തില്‍ നിരവധി മെഡലുകള്‍ വേറെയും സ്വന്തമാക്കിയിട്ടുണ്ട്.  

ലോക് ഡൗൺ കാലത്തെല്ലാം  കഠിന പരിശീലനത്തിലായിരുന്നു രാജ്യത്തിൻ്റെ അഭിമാന താരം. ശ്രീശങ്കറിന് മികച്ച പരിശീലന സൗകര്യം ഒരുക്കി നൽകുന്നതിൽ സ്പീക്കർ എം ബി രാജേഷും സജീവമായി ഇടപെട്ടു.

ലോക്ഡൗൺ കാലത്ത് പുറത്ത് പരിശീലനം നടത്താൻ കഴിയാത്തതിനാൽ വീടിന് സമീപത്ത് സൗകര്യം ക്രമീകരിച്ചിരുന്നു.  ഇവിടേയ്ക്കാവശ്യമായ ഉപകരണങ്ങൾ തൃശൂർ സ്പോർട്സ് കൗൺസിലിൽ നിന്നും ലഭ്യമാക്കി നൽകിയത് എം ബി രാജേഷിൻ്റെ ഇടപെടലായിരുന്നു. രാജ്യം കാത്തിരിയ്ക്കുകയാണ്  ശ്രീശങ്കറിൻ്റെ മെഡൽ നേട്ടത്തിനായി.