CWG 2022 | എന്താണ് ലോൺ ബൗൾസ്? കോമൺവെൽത്തിൽ ഇന്ത്യൻ വനിതകൾ സ്വർണം നേടിയ ഗെയിം

കോമൺവെൽത്ത് ഗെയിംസിൽ ഇന്ത്യ ലോൺ ബൗൾസിൽ ചരിത്രം കുറിച്ചതോടെ ഈയിനം ഏറെ ശ്രദ്ദ നേടുകയാണ്. പ്രതീക്ഷയില്ലാത്ത ഇനത്തിലാണ് ഇന്ത്യൻ വനിതകൾ ചരിത്രം കുറിച്ചത്. സുവർണ നേട്ടം ലോൺ ബൗൾസിന് ഇന്ത്യയിൽ പ്രചാരം വർധിപ്പിക്കും. എന്താണ് ലോൺ ബൗൾസ് എന്ന് നോക്കാം

നാല് പേരടങ്ങിയതാണ് ലോൺ ബൗൾസിലെ ടീമിനത്തിലെ മൽസരം. ഈയിനത്തിലാണ് ഇന്ത്യ ചരിത്ര നേട്ടം കുറിച്ചത്. ഒന്നര കിലോ ഭാരമുള്ള ബോൾ ലോൺ എന്നു പേരുള്ള മൽസര പ്രതലത്തിൽ ഉരുട്ടി കളിക്കുന്നതാണ് ഗെയിം.

സിംഗിൾസ്, ഡബിൾസ്, ട്രിപ്പിൾസ്, ഫോർസ് എന്നിങ്ങനെ നാലു വിഭാഗങ്ങളിലായാണ് മത്സരം. ടോസ് കിട്ടുന്ന ടീം ത്രോ ചെയ്ത് മഞ്ഞ നിറത്തിലുള്ള ചെറിയ പന്തിന് സമീപം എത്തിക്കുക എന്നതാണ് ഓരോ ടീമിന്റെയും ലക്ഷ്യം. ജാക്ക് എന്നാണ് ഈ മഞ്ഞ ബോളിനെ വിളിക്കുന്നത്. ജാക്കിന്റെ ഏറ്റവും അടുത്തെത്തിച്ചാലും പോയിന്റ് ലഭിക്കും.

പതിനഞ്ച് എൻഡുകളിൽ നിന്നാണ് ത്രോ. ഒരു ടീമിന് എട്ട് ത്രോകളുണ്ടാകും. എതിർ ടീമിനേക്കാൾ എത്ര ബോൾസ് ജാക്കിന് സമീപം എത്തിച്ചു എന്നതനുസരിച്ചാണ് പോയിന്റ് ലഭിക്കുക. ടാർഗറ്റിനോട് ഏറ്റവും അടുത്ത് പന്തെത്തിക്കുന്നവർക്ക് ലഭിക്കുന്ന പോയിന്റിന്റെ അടിസ്ഥാനത്തിലാണ് വിജയിയെ നിശ്ചയിക്കുക.

ഫൈനലിൽ ഇന്ത്യ 17 പോയിന്റ് സ്വന്തമാക്കിയപ്പോൾ എതിരാളികളായ ദക്ഷിണാഫ്രിക്കയ്ക്ക് 10 പോയിന്റ് മാത്രമാണ് നേടാനായത്.