ലോകകപ്പിൽ ഏറ്റവുമധികം ഗോൾ നേടുന്ന താരത്തിനുള്ള സുവർണപാദുകം ആർക്ക് ലഭിക്കും?

ലോകകപ്പ് പോരാട്ടം സെമിയിലേക്ക് കടക്കുകയാണ്. ഇനി രണ്ട് സെമിയും ഒരു ലൂസേഴ്സ് ഫൈനലും ഫൈനലും മാത്രമാണ് ലോകകപ്പിൽ അവശേഷിക്കുന്നത്. ഇത്തവണ ആരായിരിക്കും ഏറ്റവുമധികം ഗോൾ നേടുന്നതിനുള്ള സുവർണ പാദുകം നേടുക. ഈ പോരാട്ടത്തിനായി പ്രധാനമായും മുന്നിലുള്ള കീലിയൻ എംബാപ്പെയും ലയണൽ മെസിയും ഒലിവിയർ ജിറൂദുമാണ്.

കീലിയൻ എംബാപ്പെ- ഈ ലോകകപ്പിലെ ഗോൾ വേട്ടക്കാരിൽ ഒന്നാമനാണ് എംബാപ്പെ. ഇതിനോടകം അഞ്ച് മത്സരങ്ങളിൽനിന്ന് 5 ഗോളുകളാണ് എംബാപ്പെ നേടിയത്. രണ്ട് അസിസ്റ്റുകളും അദ്ദേഹത്തിന്റെ പേരിലുണ്ട്. 387 മിനിട്ട് കളത്തിൽ ചെലവഴിച്ചാണ് എംബാപ്പെ അഞ്ച് ഗോളുകൾ നേടിയത്.

ലണയൽ മെസി- നാല് ഗോളുകളുമായി ഈ പട്ടികയിൽ രണ്ടാമതാണ് ലയണൽ മെസി. അഞ്ച് മത്സരങ്ങളിൽനിന്നാണ് മെസി നാല് ഗോളടിച്ചത്. രണ്ട് അസിസ്റ്റുകളും അദ്ദേഹത്തിന്‍റെ പേരിലുണ്ട്. ഇതുവരെ 480 മിനിട്ടാണ് അർജന്‍റീന താരം കളിച്ചത്.

ഒലിവിയർ ജിറൂദ്- ഫ്രാൻസിന്‍റെ സെൻട്രൽ ഫോർവേഡായ ജിറൂദ് ഇതിനോടകം നാല് ഗോൾ നേടി കഴിഞ്ഞു. ക്വാർട്ടറിൽ ഇംഗ്ലണ്ടിനെതിരെ വിജയഗോൾ നേടിയതും ജിറൂദ് ആയിരുന്നു. നാല് അസിസ്റ്റുകളും അദ്ദേഹത്തിന്‍റെ പേരിലുണ്ട്. 318 മിനിട്ടാണ് ജിറൂദ് കളിച്ചത്.

ആൻഡ്രെജ് ക്രെമാറിക്- രണ്ട് ഗോളുകളാണ് ക്രൊയേഷ്യൻ താരമായ ക്രെമാറിക് നേടിയിട്ടുള്ളത്. അഞ്ച് കളികളിലായി 348 മിനിട്ട് നേരമാണ് ക്രെമാറിക് കളത്തിൽ ചെലവഴിച്ചത്.

യൂസെഫ് എൻ-നെസ്റി- പോർച്ചുഗലിനെ അട്ടിമറിച്ച് സെമിയിലെത്തിയ യൂസെഫ് എൻ-നെസ്റി ഇതുവരെ രണ്ടു ഗോളുകൾ നേടിയിട്ടുണ്ട്. അഞ്ച് മത്സരങ്ങളിലായി 391 മിനിട്ടുകളാണ് അദ്ദേഹം കളത്തിൽ ചെലവിട്ടത്. മൂന്ന് ഗോൾ നേടിയ അഞ്ചോളം താരങ്ങളും രണ്ടുഗോൾ നേടിയ ഇരുപതോളം താരങ്ങളും ഒരു ഗോൾ നേടിയ 81 താരങ്ങളും ഗോൾവേട്ടക്കാരുടെ പട്ടികയിലുണ്ട്. എന്നാൽ സെമിയിലെത്താതെ പുറത്താവരുടെ പേരുകൾ സുവർണപാദുകം നേടാൻ സാധ്യതയുള്ളവരുടെ പട്ടികയിൽ ഉൾപ്പെടുത്തിയിട്ടില്ല.