യുവരാജ് സിങ് വീണ്ടും ബാറ്റെടുക്കുന്നു; പന്തെറിയാൻ അക്രവും; പരിശീലകനായി സച്ചിൻ ടെൻഡുൽക്കർ

സിഡ്നി: ഓസ്ട്രേലിയയിലെ കാട്ടുതീ ദുരിതാശ്വാസത്തിനുള്ള ധനസമാഹരണത്തിനായി ക്രിക്കറ്റ് ലോകം കൈകോർക്കുന്നു. ലോകത്തെ ഇതിഹാസതാരങ്ങൾ വീണ്ടും കളത്തിലിറങ്ങുന്ന മത്സരത്തിൽ ഇന്ത്യയിൽനിന്ന് യുവരാജ് സിങ്, പാകിസ്ഥാനിൽനിന്ന് വാസിം അക്രം എന്നിവരും കളിക്കാനുണ്ടാകും.

റിക്കി പോണ്ടിങ്, ഷെയ്ൻ വോൺ എന്നിവരുടെ നായകത്വത്തിൽ രണ്ടു ടീമായാണ് ഇറങ്ങുന്നത്.

സച്ചിൻ ടെൻഡുൽക്കർ, കോർട്ട്നി വാൽഷ് എന്നിവർ നോൺ-പ്ലേയിങ് പരിശീലകരായി പ്രദർശന മത്സരത്തിന്‍റെ ഭാഗമാകും.

ഓസ്ട്രേലിയയിലെ മൂന്നു ക്രിക്കറ്റ് മത്സരങ്ങളിൽനിന്നാണ് ധനസമാഹരണം നടത്തുന്നത്. ഇതിൽ ഒന്ന് ഇന്ത്യ-ഓസ്ട്രേലിയ വനിതാ ടി20 മത്സരവും അതിനുശേഷം ലോകതാരങ്ങളുടെ പ്രദർശനമത്സരവും ഏറ്റവും ഒടുവിലായി ബിഗ് ബാഷ് ലീഗ് ഫൈനലും നടക്കും.

“ധനസമാഹരണത്തിനോ ഓസ്‌ട്രേലിയയിലെ ജനങ്ങളെ സഹായിക്കുന്നതിനോ കഴിയുന്ന വിധത്തിൽ ഇടപെടാൻ ആഗ്രഹിക്കുന്നുവെന്ന് വാസിം ആക്രം കഴിഞ്ഞ ദിവസം പറഞ്ഞിരുന്നു.

"ഞാൻ ഓസ്‌ട്രേലിയയിൽനിന്ന് വിവാഹം കഴിക്കുന്നതിന് മുമ്പുതന്നെ എല്ലായ്‌പ്പോഴും എന്റെ ഹൃദയത്തോട് വളരെയേറെ ചേർന്നുനിൽക്കുന്ന ഒരു രാജ്യമായിരുന്നു അത്. കടുത്ത വേനലിലാണ് ഓസ്ട്രേലിയയിൽ കാട്ടുതീ ശല്യം രൂക്ഷമായത്''- അക്രം പറഞ്ഞു.

എന്നാൽ കഴിഞ്ഞ രണ്ടു ദിവസങ്ങളിൽ ഓസ്ട്രേലിയയിൽ മഴ പെയ്തതിൽ ദൈവത്തിനോട് നന്ദി പറയുന്നുവെന്നും അക്രമം പറയുന്നു.

"ഓസ്‌ട്രേലിയക്കാർ നേരിട്ട ദുരന്തത്തിൽ ഹൃദയംകൊണ്ട് അവർക്ക് ഐക്യദാർഢ്യം പ്രഖ്യാപിക്കുകയാണ്- അക്രം പറഞ്ഞു.

ഷെയ്ൻ വോൺ (ക്യാപ്റ്റൻ), റിക്കി പോണ്ടിങ് (ക്യാപ്റ്റൻ), ആദം ഗിൽക്രിസ്റ്റ്, അലക്സ് ബ്ലാക്ക്വെൽ, ആൻഡ്ര്യൂ സൈമണ്ട്സ്, ബ്രാഡ് ഫിറ്റ്ലർ, ബ്രാഡ് ഹാഡിൻ, ബ്രെറ്റ് ലീ, എലിസ് വില്ലാനി, ഗ്രേസ് ഹാരിസ്, ജസ്റ്റിൻ ലാംഗർ, ലുക്ക് ഹോഡ്ജ്, മാത്യു ഹെയ്ഡൻ, മാത്യു ഹെയ്ഡൻ, മൈക്ക് ഹസി, ഫോബെ ലിച്ചഫീൽഡ്, ഷെയ്ൻ വാട്സൺ, യുവരാജ് സിങ്, വാസിം ആക്രം എന്നിവരാണ് ഇതുവരെ മത്സരത്തിൽ പങ്കെടുക്കുമെന്ന് ഉറപ്പ് നൽകിയിട്ടുള്ള താരങ്ങൾ.

മൂന്നു മത്സരങ്ങളിൽനിന്നുള്ള വരുമാനവും ലാഭവിഹിതവും ഓസ്‌ട്രേലിയൻ റെഡ്ക്രോസ് ഡിസാസ്റ്റർ റിലീഫ് ആന്റ് റിക്കവറി ഫണ്ടിലേക്ക് നൽകുമെന്ന് ക്രിക്കറ്റ് ഓസ്ട്രേലിയ അറിയിച്ചു.