Afghanistan | അഫ്ഗാനിസ്ഥാനില്‍ അധികാരം പിടിച്ചടക്കിയ താലീബാന്‍ ആരാണ് ? അറിയാം

പാഷ്തൂണ്‍ ഭാഷയില്‍ ''വിദ്യാര്‍ത്ഥികള്‍'' എന്നര്‍ഥമുള്ള വാക്കാണ് 'താലിബാന്‍'. 1994 ല്‍ തെക്കന്‍ അഫ്ഗാന്‍ നഗരമായ കാണ്ഡഹാറിന് ചുറ്റുമുള്ള മേഖലകളില്‍ 'താലിബാന്‍' ഉയര്‍ന്നുവന്നു.

1994 ലാണ് താലിബാന്‍ രൂപീകൃതമായത്. 1980കളില്‍ അമേരിക്കന്‍ പിന്തുണയോടെ സോവിയറ്റ് സൈന്യത്തെ ആക്രമിച്ച മുജഹിദ്ദീന്‍ എന്നറിയപ്പെടുന്ന മുന്‍ അഫ്ഗാന്‍ പോരാളികളാണ് ഇതിന് രൂപം നല്‍കിയത്.

രണ്ട് വര്‍ഷത്തിനുള്ളില്‍, താലിബാന്‍ രാജ്യത്തിന്റെ ഭൂരിഭാഗവും സ്വന്തമാക്കി, 1996 ല്‍ ഇസ്ലാമിക നിയമത്തിന്റെ കടുത്ത വ്യാഖ്യാനങ്ങള്‍ അധിഷ്ടിതമാക്കി അവര്‍ ഒരു ഇസ്ലാമിക് എമിറേറ്റ് പ്രഖ്യാപിച്ചു.

മുല്ല മുഹമ്മദ് ഒമര്‍ ആയിരുന്നു താലിബാന്റെ സ്ഥാപകനും ആദ്യ നേതാവും. താലിബാനെ അട്ടിമറിച്ച ശേഷം മുല്ല മുഹമ്മദ് ഒമര്‍ ഒളിവില്‍ പോയിരുന്നു. 2013 ല്‍ മുല്ല മുഹമ്മദ് ഒമറിന്റെ മരണം സംഭവിച്ചെങ്കിലും രണ്ട് വര്‍ഷത്തിന് ശേഷം മാത്രമാണ് മകന്‍ അത് സ്ഥിരീകരിച്ചത്.

രണ്ട് പതിറ്റാണ്ട് കഴിഞ്ഞ് താലിബാന്‍ അധികാരം കൈക്കലാക്കുമ്പോള്‍ അഫഗാനിലെ സ്ത്രീകള്‍ക്ക് യാതൊരു സുരക്ഷിതത്വവും ഉണ്ടാവില്ലെന്നാണ് നിരീക്ഷകര്‍ പറയുന്നത്. എന്നാല്‍ സാംസ്‌കാരിക പാരമ്പര്യങ്ങള്‍ക്കും മത നിയമങ്ങള്‍ക്കും അനുസൃതമായി സ്ത്രീകളുടെയും ന്യൂനപക്ഷങ്ങളുടെയും അവകാശങ്ങള്‍ക്ക് ഇടം നല്‍കിക്കൊണ്ട് അഫ്ഗാനിസ്ഥാനില്‍ ഒരു ''യഥാര്‍ത്ഥ ഇസ്ലാമിക സംവിധാനം'' വേണമെന്നാണ് താലിബാന്റെ വാദം.