ചരിത്രത്തിലാദ്യമായി ബ്രിട്ടനിൽ ലക്ഷത്തോളം നഴ്സുമാരുടെ പണിമുടക്ക്

ലണ്ടൻ: ബ്രിട്ടനിലെ നാഷണൽ ഹെൽത്ത് സർവീസിന്റെ (എൻഎച്ച്എസ്) ചരിത്രത്തിലാദ്യമായി നഴ്സുമാർ പണിമുടക്കി. റോയൽ കോളജ് ഓഫ് നഴ്സിങ് യൂണിയന്റെ നേതൃത്വത്തിൽ ഒരുലക്ഷത്തോളം നഴ്സുമാർ പണിമുടക്കിയതോടെ 76 സർക്കാർ ആശുപത്രികളുടെയും ആരോഗ്യകേന്ദ്രങ്ങളുടെയും പ്രവർത്തനം തടസ്സപ്പെട്ടു. (Image Credit- Reuters)

അമിത ജോലിഭാരം ചൂണ്ടിക്കാട്ടിയും ശമ്പള വർധനവും ആവശ്യപ്പെട്ടാണ് പണിമുടക്ക്. നാണ്യപ്പെരുപ്പം 10 ശതമാനത്തിലേറെ ആയതിനാൽ ജീവിതച്ചെലവു വർധിച്ചുവെന്നും 19% ശമ്പളവർധന വേണമെന്നുമാണ് നഴ്സിങ് യൂണിയന്റെ ആവശ്യം. (Image Credit- Reuters)

കീമോതെറപ്പി, ഡയാലിസിസ്, ഇന്റൻസീവ് കെയർ മേഖലകളെ പണിമുടക്കിൽനിന്ന് ഒഴിവാക്കിയിരുന്നു. ഈ മാസം 20നും പണിമുടക്കുമെന്ന് നഴ്സിങ് യൂണിയൻ അറിയിച്ചിട്ടുണ്ട്. എൻഎച്ച്എസിന്റെ കീഴിൽ സർക്കാർ എല്ലാവർക്കും സൗജന്യ ചികിത്സ ഉറപ്പാക്കുന്ന രീതിയാണ് ബ്രിട്ടനിൽ നിലവിലുള്ളത്. (Image Credit- Reuters)

അതേസമയം ശമ്പള വിഷയത്തിൽ സ്വതന്ത്ര സമിതി നിശ്ചയിച്ച 4-5 ശതമാനത്തിൽ കൂടുതൽ വർധന സാധ്യമല്ലെന്നാണ് സർക്കാർ നിലപാട്. ഇതിൽ കൂടുതൽ വർധന വരുത്തിയാൽ മറ്റു സേവന മേഖലകളെ ബാധിക്കുമെന്ന് ആരോഗ്യമന്ത്രി സ്റ്റീവ് ബാർക്ലേ പറയുന്നു. (Image Credit- Reuters)

ശമ്പളക്കാര്യത്തിൽ ചർച്ചയ്ക്കു പോലും സർക്കാർ തയാറാകുന്നില്ലെന്ന് യൂണിയൻ ആരോപിക്കുന്നു. റെയിൽ, പോസ്റ്റൽ, വ്യോമഗതാഗത സർവീസുകളിലും ഈ മാസം പണിമുടക്ക് നടന്നിരുന്നു. ക്രിസ്മസ് കാലത്ത് വിമാനത്താവളങ്ങൾ ഉൾപ്പെടെ സേവനങ്ങൾ തടസ്സപ്പെട്ടേക്കുമെന്ന ആശങ്കയുണ്ട്. (Image Credit- Reuters)

നഴ്സുമാരുടെ പണിമുടക്കിനു മുൻപ് നടത്തിയ സർവേയിൽ ജനം നഴ്സുമാരെ പിന്തുണച്ചിരുന്നു. സേവനമേഖലകൾ ഒന്നൊന്നായി തടസ്സപ്പെടുമ്പോൾ ജനത്തിന്റെ പ്രതികരണം എന്താകുമെന്ന ആശങ്കയിലാണ് സർക്കാർ. (Image Credit- Reuters)