Death of over 350 Elephants | ബോട്സ്വാനയിലെ 350 ആനകളുടെ ദുരൂഹമരണം; അന്വേഷണം തടസപ്പെടുത്തി കോവിഡ് 19

ബോട്സ്വാന: തെക്കൻ ആഫ്രിക്കൻ രാജ്യമായ ബോട്സ്വാനയിൽ കഴിഞ്ഞ രണ്ടുമാസത്തിനിടെ ചത്തത് 350ഓളം ആനകൾ. പ്രശസ്തമായ ഒകാവാംഗോ ഡെൽറ്റ പ്രകൃതി സംരക്ഷണ കേന്ദ്രത്തിൽ ആയിരുന്നു ആനകൾ കൂട്ടത്തോടെ ചത്തൊടുങ്ങിയത്.

അതേസമയം, ആനകളുടെ ദുരൂഹമരണത്തിന്റെ കാരണങ്ങൾ അന്വേഷിക്കാൻ ബോട്സ്വാനയിൽ ശ്രമങ്ങൾ നടന്നുവരികയാണ്. മെയിൽ 169 ആനകളെയാണ് ചരിഞ്ഞ നിലയിൽ കണ്ടെത്തിയത്. ജൂൺ പകുതിയോടെ മരണസംഖ്യ ഇരട്ടിയായി.

അതേസമയം, ആനകളുടെ മരണകാരണം കണ്ടെത്താനുള്ള അന്വേഷണങ്ങൾ കോവിഡ് കാരണം നിലച്ചിരിക്കുകയാണ്. ആഫ്രിക്കയിലെ ആനകളുടെ മൂന്നിലൊന്നും ബോട്സ്വാനയിലാണ്. എന്നാൽ, മരണകാരണം കണ്ടെത്താൻ അന്താരാഷ്ട്ര ഏജൻസികൾക്ക് സാംപിളുകൾക്ക് എത്തിച്ചു നൽകാൻ അധികൃതർക്ക് കഴിയുന്നില്ല. കോവിഡ് 19 കാരണം ലോക്ക്ഡൗൺ പ്രഖ്യാപിച്ചിരിക്കുന്നതിനാൽ വിമാനങ്ങൾ കുറവാണ്. അതിനാലാണ് സാംപിളുകൾ അയയ്ക്കാൻ കഴിയാത്തത്.

മെയ് അവസാനം നടത്തിയ ആകാശ നിരീക്ഷണത്തിലാണ് ആനകളുടെ കൂട്ടമരണം അധികൃതരുടെ ശ്രദ്ധയിൽപ്പെട്ടത്. മിക്ക ആനകളും മരിച്ചു വീണിരിക്കുന്നത് വെള്ളമൊഴുകുന്ന സ്ഥലങ്ങളുടെ അരികിലാണ്. അതുകൊണ്ട് തന്നെ എന്തെങ്കിലും വിഷം കഴിച്ചതാകാമെന്നാണ് അധികൃതർ സംശയിക്കുന്നത്.

യുകെ ആസ്ഥാനമായി പ്രവര്‍ത്തിക്കുന്ന സന്നദ്ധ സംഘടനയായ ചാരിറ്റി നാഷണൽ പാർക്ക് റെസ്ക്യു ഡയറക്ടർ ഡോ.നീൽ മക്കൻ ആണ് ആനകളുടെ കൂട്ടമരണം അധികൃതരുടെ ശ്രദ്ധയിൽ ആദ്യം കൊണ്ടുവന്നത്. ഇതിന് പിന്നാലെയാണ് ഡെൽറ്റ പ്രദേശത്തിന് മുകളിലൂടെ ആകാശനിരീക്ഷണം നടത്തിയത്.

അതേസമയം, വെള്ളത്തിൽ എന്തെങ്കിലും വിഷാംശങ്ങൾ ഉണ്ടായിരുന്നെങ്കിൽ അത് മറ്റ് മൃഗങ്ങളെയും കൊല്ലുമായിരുന്നു എന്നാണ് ഗവേഷകർ പറയുന്നത്. അതേസമയം, ആന്ത്രാക്സിനുള്ള സാധ്യതയും പറയുന്നുണ്ട്. കഴിഞ്ഞവർഷം ഈ അസുഖം ബാധിച്ച് നൂറോളം ആനകൾ ചത്തിരുന്നു.

പല ആനകളും മുഖം കുത്തി വീണ നിലയിലാണ് കിടക്കുന്നത്. അതുകൊണ്ട് തന്നെ പെട്ടെന്ന് തന്നെ വീണുള്ള മരണമാകാമെന്നാണ് കരുതപ്പെടുന്നത്. ചില ആനകൾ മരണത്തിന് മുമ്പായി വട്ടത്തിൽ കറങ്ങുന്നത് ശ്രദ്ധയിൽപ്പെട്ടതായും പറയുന്നുണ്ട്. അതുകൊണ്ട് തന്നെ അവയുടെ നാഡീവ്യവസ്ഥയെ ബാധിച്ച എന്തെങ്കിലും അസുഖങ്ങളാകാമെന്ന സംശയവും ഉയരുന്നു

ഒകവാംങ്കോ ഡെൽറ്റയിൽ ഏകദേശം 15,000 ആനകളുണ്ടെന്നാണ് കണക്കുകൾ. ഇത് രാജ്യത്തെ ആനകളുടെ പത്തു ശതമാനത്തോളം വരും. ലോകത്തിൽ ഏറ്റവും അധികം ആനകളുള്ള രാജ്യമാണ് ബോട്സ്വാനിയ. 130,000ത്തിൽ അധികം ആനകൾ രാജ്യത്ത് ഉണ്ടെന്നാണ് കണക്കാക്കുന്നത്.