ഏറ്റവും പ്രായം കുറഞ്ഞ പ്രധാനമന്ത്രിയുടെ നാട്ടിലെ രസകരമായ ചില കാര്യങ്ങൾ

ലോകത്തിലെ ഏറ്റവും സന്തോഷമുള്ള രാജ്യമായ ഫിൻലൻഡിൽ നിന്ന് കഴിഞ്ഞദിവസം എത്തിയ വാർത്ത വളരെ സന്തോഷം നൽകുന്നത് ആയിരുന്നു. 34 വയസ് മാത്രം പ്രായമുള്ള സന്ന മാരിൻ ഫിൻലൻഡ് പ്രധാനമന്ത്രിയായി തെരഞ്ഞെടുക്കപ്പെട്ട വാർത്ത എത്തിയത് ഇന്നലെ ആയിരുന്നു. അത് മാത്രമല്ല, ഫിൻലൻഡ് രാഷ്ട്രീയത്തെ രസകരമാക്കുന്നത്. അഞ്ച് പാർട്ടികൾ ഉൾപ്പെട്ട സഖ്യകക്ഷി സർക്കാരാണ് ഫിൻലൻഡിലെ ഭരണകക്ഷി. അതിൽ, നാല് പാർട്ടികളെയും നയിക്കുന്നത് വനിതകൾ. അതിൽ തന്നെ, ഒരാളൊഴിച്ച് ബാക്കി എല്ലാവരുടെയും പ്രായം 35 വയസിന് താഴെ. ഫിൻലൻഡ് ഒരേസമയം വ്യത്യസ്തവും മനസിന് ആനന്ദം നൽകുന്നതുമായ ഒരു രാജ്യമാണ്. ഇത് മാത്രമല്ല ഫിൻലൻഡിന്‍റെ പ്രത്യേകത. ഫിൻലൻഡിനെ വ്യത്യസ്തമാക്കുന്ന നിരവധി കാര്യങ്ങളുണ്ട്. അതിൽ ചിലത് പറയാം,

1. ലോകത്തിലെ ഏറ്റവും സന്തോഷമുള്ള രാജ്യങ്ങളുടെ പട്ടികയിൽ ഒന്നാമതാണ് ഫിൻലൻഡ്. ഐക്യരാഷ്ട്ര സഭയുടെ റിപ്പോർട്ട് അനുസരിച്ച് ലോകത്തിലെ ഏറ്റവും സന്തോഷമുള്ള രാജ്യങ്ങളിൽ ഒന്നാമത് ഫിൻലൻഡ് ആണ്. സ്കാൻഡിനേവിയൻ രാജ്യങ്ങൾ എല്ലാ തവണയും സന്തോഷത്തിന്‍റെ കാര്യത്തിൽ മുകളിൽ തന്നെയാണെങ്കിലും ഫിൻലൻഡ് ഇത്തവണ അഞ്ചാം സ്ഥാനത്ത് നിന്ന് ഒന്നാം സ്ഥാനത്തേക്ക് കുതിച്ചുയരുകയായിരുന്നു.

2. വേഗപരിധിയേക്കാൾ വേഗത്തിൽ ഡ്രൈവ് ചെയ്താൽ അതിന് ചെലവ് കൂടുമെന്നതാണ് ഫിൻലൻഡിന്‍റെ മറ്റൊരു പ്രത്യേകത. വാഹനങ്ങൾക്ക് ഇവിടെ വേഗപരിധി നിശ്ചയിച്ചിട്ടുണ്ട്. വേഗപരിധി ലംഘിച്ചാൽ നിയമം ലംഘിക്കുന്ന ആളുടെ ആകെ വരുമാനം അടിസ്ഥാനമാക്കിയാണ് പിഴത്തുക ഈടാക്കുക. കോടീശ്വരൻമാർ ആണെങ്കിൽ വേഗപരിധി ലംഘിച്ചാൽ ലക്ഷങ്ങളാണ് പിഴയായി നൽകേണ്ടി വരികയെന്ന് ചുരുക്കം.

3. ഫിൻലൻഡിന് മാത്രം അവകാശപ്പെട്ട കായികവിനോദങ്ങൾ വളരെ രസകരമാണ്. (1) വൈഫ് കാരിയിങ് ചാമ്പ്യൻഷിപ്പ്, (2) കൊതുക് വേട്ടയാടൽ ചാമ്പ്യൻഷിപ്പ് ( 3) മൊബൈൽ ഫോൺ എറിയൽ, (4) ചെളിയിൽ ഫുട്ബോൾ കളിക്കുക, (5) എയർ ഗിറ്റാർ. ഇതിൽ, വൈഫ് കാരിയിങ് ചാമ്പ്യൻഷിപ്പിൽ വിജയിക്കുന്നവർക്ക് ഭാര്യയുടെ ഭാരത്തിന് തുല്യമായ അത്രയും ബിയറാണ് സമ്മാനമായി ലഭിക്കുക.

4. ഫിൻലൻഡിൽ മാത്രം 187,888 തടാകങ്ങളാണ് ഉള്ളത്. ആയിരക്കണക്കിന് തടാകങ്ങളുടെ ഭൂമി എന്നാണ് ഫിൻലൻഡ് വിശേഷിപ്പിക്കപ്പെടുന്നത് തന്നെ.

5. കാപ്പി കുടിയിൽ ഫിൻലൻഡുകാരെ തോൽപിക്കാൻ പറ്റുമെന്ന് തോന്നുന്നില്ല. ഒരാൾ ഒരു വർഷം എത്ര കപ്പ് കാപ്പി കുടിക്കും എന്നത് പറയാൻ കഴിയില്ല, എന്നാൽ ഒരു ശരാശരി ഫിൻലൻഡുകാരൻ 12 കിലോ കാപ്പി ഒരു വർഷം ഉപയോഗിക്കുന്നുണ്ടെന്നാണ് കണക്ക്.

6. രാജ്യത്ത് കാറിനേക്കാൾ അധികമായി ഉപയോഗിക്കുന്നത് സോനകളാണ്. സോന എന്ന് പറയുന്നത് തടികൊണ്ട് കെട്ടി മറച്ചുണ്ടാക്കിയ ഒരു ചെറിയ കെട്ടിടമാണ്. ഭിത്തി തടി കൊണ്ട് ആയിരിക്കും നിർമിച്ചിട്ടുണ്ടാകുക. ആവി കൊണ്ട് ഉയർന്ന ഊഷ്മാവിൽ ചൂടാക്കുകയാണ് സോനകളിൽ ചെയ്യുക. സോനാസ് ബാത്ത് ഇവിടെ പ്രസിദ്ധമാണ്. ഫിൻലൻഡിന്‍റെ സോന സംസ്കാരം വളരെ പ്രസിദ്ധമാണ്. ഹെൽസിങ്കിയിലെ ബർഗർ കിംഗിൽ പോലും സോനയുണ്ടെന്ന് കേൾക്കുമ്പോൾ അറിയാം ഇവിടെയുള്ള ആൾക്കാരുടെ ജീവിതവുമായി സോനകൾ എത്രത്തോളം ബന്ധപ്പെട്ടിരിക്കുന്നെന്ന്.

7. ഫിൻലൻഡുകാർ അവരുടെ കാര്യത്തിൽ ഏറ്റവുമധികം അഭിമാനിക്കുന്ന കാര്യങ്ങളിൽ ഒന്ന് സൗജന്യവിദ്യാഭ്യാസം ആണ്. വിദ്യാർഥികൾക്ക് സർവകലാശാല തലം വരെ രാജ്യത്ത് സൗജന്യവിദ്യാഭ്യാസമാണ്. യുറോപ്യൻ യൂണിയനിൽ നിന്നുമുള്ള വിദ്യാർഥികൾക്കും സൗജന്യ വിദ്യാഭ്യാസം ബാധകമാണ്.

8. ലോകത്തിലെ ഏറ്റവും മികച്ച പാസ്പോർട്ടുകളിൽ മൂന്നാമത്തേതാണ് ഫിൻലൻഡിലെ പാസ്പോർട്ട്. ജർമനി, സിംഗപ്പൂർ, ജപ്പാൻ എന്നീ രാജ്യങ്ങൾക്ക് തൊട്ടു പിന്നിലാണ് ഫിന്നിഷ് പാസ്പോർട്ട്. അതിന്‍റെയർത്ഥം, ഈ രാജ്യങ്ങളിൽ നിന്നുള്ളവർക്ക് ലോകത്തിലെ ഏതാണ്ടെല്ലാ രാജ്യങ്ങളിലും വിസയില്ലാതെ യാത്ര ചെയ്യാം എന്നു കൂടിയാണ്.

9. യുറോപ്പിൽ ലിംഗ സമത്വം പ്രവൃത്തി പഥത്തിൽ കൊണ്ടുവന്ന ആദ്യത്തെ രാജ്യമാണ് ഫിൻലൻഡ് എന്ന് വേണമെങ്കിൽ പറയാം. 1906ലാണ് സ്ത്രീകൾക്ക് ഫിൻലൻഡിൽ വോട്ടവകാശം കൊണ്ടുവന്നത്. ഇന്നത്തെ കാലത്ത് ഇതിന് വലിയ പ്രസക്തി ഇല്ലെങ്കിലും, യൂറോപ്പിൽ എല്ലാ വനിതകൾക്കും വോട്ടവകാശം ഉറപ്പാക്കിയ ആദ്യത്തെ രാജ്യമാണ് ഫിൻലൻഡ്.

10. ഫിൻലൻഡിലെ കാലാവസ്ഥയാണ് മറ്റൊരു പ്രത്യേകത. മഞ്ഞുകാലത്ത് നോർത്തേൺ ലൈറ്റ്സ് കാണാം. ഒപ്പം, രാജ്യത്തിന്‍റെ വടക്കൻഭാഗത്ത് പോളാർ നൈറ്റ് അനുഭവിക്കാം. മഞ്ഞു കാലത്ത് സൂര്യനുദിക്കാത്ത പകലുകളും വേനൽക്കാലത്ത് സൂര്യൻ അസ്തമിക്കാത്ത രാത്രികളും ഫിൻലൻഡിന്‍റെ പ്രത്യേകതകളാണ്.