ബിടിഎസ്സിലെ രണ്ടാമനും സൈനിക സേവനത്തിന്; ജിന്നിന് പിന്നാലെ ജെ-ഹോപ്പും

കൊറിയൻ പോപ് ബാൻഡിലെ രണ്ടാമനും നിർബന്ധിത സൈനിക സേവനത്തിന് ഒരുങ്ങുന്നു. ബിടിഎസ്സിലെ മുതിർന്ന അംഗം ജിന്നിന് പിന്നാലെ ജെ-ഹോപ്പ് ആണ് സൈനിക സേവനത്തിന് തയ്യാറെടുക്കുന്നത്. (image: Instagram)

ബിടിഎസ് തന്നെ ഔദ്യോഗികമായി വാർത്ത പുറത്തുവിട്ടത്. സൈനിക പരിശീലനത്തിനുള്ള മുന്നൊരുക്കങ്ങൾ ജെ-ഹോപ്പ് ആരംഭിച്ചതായാണ് റിപ്പോർട്ടുകൾ. ബിടിഎസ് താരം ജിന്നിന്റെ സൈനിക സേവനം തുടരുന്നതിനിടയിലാണ് ഏഴംഗ ബാൻഡിലെ രണ്ടാമനും യാത്ര പറയാനൊരുങ്ങുന്നത്.

ലോകത്തിൽ ഏറ്റവും കൂടുതൽ ആരാധകരുള്ള കെ-പോപ് ബാൻഡാണ് ബിടിഎസ്. ദക്ഷിണ കൊറിയയിൽ 18 നും 35 നും ഇടയിൽ പ്രായമുള്ള പുരുഷന്മാർക്ക് നിർബന്ധിതമായ സൈനിക സേവനവമാണ് താരങ്ങളും പാലിക്കുന്നത്.

20 മാസമാണ് നിർബന്ധിത സൈനിക സേവനം. കഴിഞ്ഞ വർഷം അവസാനമാണ് ജിൻ സൈനിക സേവനത്തിന് പോയത്. സൈനിക സേവനത്തിൽ നിന്ന് നേരത്തേ ബിടിഎസ് അംഗങ്ങൾക്ക് കൊറിയൻ സർക്കാർ ചില ഇളവുകൾ നൽകിയിരുന്നു. ഇത് വലിയ രാഷ്ട്രീയ വിവാദങ്ങൾക്കും ഇടയാക്കിയിരുന്നു.

ഇതെല്ലാം അവസാനിപ്പിച്ചാണ് താരങ്ങൾ സൈനിക സേവനത്തിന് സ്വമേധയാ തയ്യാറായത്. നിലവിൽ ബിടിഎസ് താരങ്ങളെല്ലാം ബാൻഡിന് ഇടവേള നൽകി വ്യക്തിഗത മേഖലയിൽ പ്രവർത്തിക്കുകയാണ്.

ജെ-ഹോപ്പിനു ശേഷം സുഗ, ആർഎം, ജിമിൻ, വി, ജംഗ്കൂക്ക് എന്നിവരും സൈനിക സേവനം പൂർത്തിയാക്കും. അംഗങ്ങളെല്ലാം സൈനിക സേവനം പൂർത്തിയാക്കി 2025 ഓട‌െ ബാൻഡ് പൂർവാധികം ശക്തിയായി തിരിച്ചുവരുമെന്ന കാത്തിരിപ്പിലാണ് ആർമി എന്നു വിളിക്കുന്ന ആരാധകർ.