മൈക്ക് പിടിച്ച കൈകളിൽ തോക്ക്; വൈറലായി BTS താരങ്ങളുടെ ചിത്രങ്ങൾ

കൊറിയൻ പോപ്പ് ബാൻഡ് ബിടിഎസ് അംഗങ്ങളുടെ സൈനിക സേവന വാർത്ത ആരാധകർ ഏറെ നിരാശയോടെയായിരുന്നു കേട്ടത്. പ്രിയ താരങ്ങളെ ഇനി എന്ന് കാണുമെന്നതായിരുന്നു ആരാധകരെ വിഷമിപ്പിച്ചത്.

ബിടിഎസ് സംഘത്തിൽ നിന്നും ജിൻ ആണ് ദക്ഷിണ കൊറിയയിലെ പുരുഷന്മാർക്ക് നിർബന്ധിതമായ സൈനിക സേവനത്തിന് ആദ്യം പോയത്. ജിന്നിനു പിന്നാലെ ജെ-ഹോപ്പും സൈനിക സേവനത്തിനു പോയി.

ഇപ്പോൾ സൈനിക കേന്ദ്രത്തിൽ നിന്നുമുള്ള താരങ്ങളുടെ ചിത്രങ്ങളാണ് ആരാധകർ ഏറ്റെടുത്തിരിക്കുന്നത്. മൈക്ക് പിടിച്ചു മാത്രം കണ്ടിരുന്ന താരങ്ങൾ തോക്കേന്തി നിൽക്കുന്ന ചിത്രങ്ങൾ ആരാധകർക്ക് വലിയ കൗതുകമാണുണ്ടാക്കിയത്.

സൈനിക യൂണിഫോം ധരിച്ച് മറ്റുള്ളവരിൽ ഒരാളായി ലോകം മുഴുവൻ ആരാധകരുള്ള ബിടിഎസ് താരം ജെ-ഹോപ്പിന്റെ ചിത്രങ്ങൾ ഇതിനകം വൈറലാണ്. ജെ-ഹോപ്പിന്റെ സൈനിക സേവനം തുട‌ങ്ങുന്ന ദിവസം സ്വീകരിക്കാനെത്തിയ ജിന്നിന്റെ ചിത്രവും നേരത്തേ വൈറലായിരുന്നു.

സൈനിക കേന്ദ്രത്തിൽ യുദ്ധ വൈദഗ്ധ്യം, തോക്കുകളുടെ പരിശീലനം എന്നിവയാണ് ജെ-ഹോപ്പിന് ഇപ്പോൾ ലഭിച്ചു കൊണ്ടിരിക്കുന്നതെന്നാണ് റിപ്പോർട്ടുകൾ.

ലോകം മുഴുവൻ ആരാധകരുള്ള സംഗീത ബാൻഡാണ് ബി‌ടിഎസ്. ആർഎം,  സുഗ, ജിൻ, ജെ-ഹോപ്പ്, ജിമിൻ, വി, ജങ്കൂക്ക് എന്നിവരാണ് ബിടിഎസ് അംഗങ്ങൾ. 

20 മാസമാണ് ദക്ഷിണ കൊറിയയിലെ നിർബന്ധിത സൈനിക സേവനം. ജെ-ഹോപ്പിനു ശേഷം സുഗ, ആർഎം, ജിമിൻ, വി, ജംഗ്കൂക്ക് എന്നിവരും സൈനിക സേവനം പൂർത്തിയാക്കും. 

2025 ഓടെ സൈനിക സേവനം പൂർത്തിയാക്കി ബിടിഎസ് താരങ്ങളെല്ലാം ഒന്നിച്ച് വീണ്ടും ആരാധകർക്കു മുന്നിലെത്തുമെന്നാണ് പ്രതീക്ഷിക്കുന്നത്.