ഇൻസ്റ്റഗ്രാമിലെ മാസ് എൻട്രി; റെക്കോർഡ് വേഗത്തിൽ ഫോളോവേഴ്സിനെ കൂട്ടിയവരിൽ വിജയ് മൂന്നാമൻ

'ഹലോ നൻപൻ ആൻഡ് നൻപീസ്' ഇങ്ങനെയൊരു കുറിപ്പ് ദളപതി വിജയിയുടെ ഫോട്ടോയ്ക്കൊപ്പം വന്നതോടെ ഇൻസ്റ്റഗ്രാമിനെ ഇളക്കിമറിച്ചുള്ള ആവേശമായിരുന്നു പിന്നെ നടന്നത്. ഇൻസ്റ്റഗ്രാമിൽ അക്കൗണ്ട് തുറന്നുകൊണ്ട് വിജയിയുടെ മാസ് എൻട്രിയായിരുന്നു അത്.

ഏപ്രിൽ രണ്ടിന് ഇൻസ്റ്റഗ്രാമിൽ അക്കൗണ്ട് തുറന്ന താരത്തിന്റെ നിലവിലെ ഫോളോവേഴ്സിന്റെ എണ്ണം 5.9 മില്യണാണ്. ഇൻസ്റ്റഗ്രാമിലെ എൻ‌ട്രിയിൽ റെക്കോർഡ് വേഗത്തിലാണ് താരത്തിന്റെ ഫോളോവേഴ്സിന്റെ എണ്ണം പത്ത് ലക്ഷം കടന്നത്.

വെറും 99 മിനുട്ടിനുള്ളിലാണ് ഫോളോവേഴ്സിന്റെ എണ്ണം പത്ത് ലക്ഷം കടന്നത്. ഈ സമയത്തിനുള്ളിൽ ഒരു മില്യൺ ഫോളോവേഴ്സിനെ സ്വന്തമാക്കുന്ന ആദ്യ ഇന്ത്യൻ താരം കൂടിയാണ് വിജയ്.

മിനുട്ടുകൾക്കുള്ളിൽ റെക്കോർഡ് വേഗത്തിൽ 1 മില്യൺ ഫോളോവേഴ്സിനെ നേടിയ ലോകത്തിലെ മൂന്നാമത്തെ താരവും വിജയ് ആണ്. വിജയിയുടെ മുന്നിലുള്ളത് വെറും രണ്ടേ രണ്ടു പേർ.

കെ-പോപ്പ് സംഗീത ബാൻഡായ ബിടിഎസ് താരം വി എന്ന കിം തേഹ്യൂങ്, ഹോളിവുഡ് താരം ആഞ്ജലീന ജോളി എന്നിവരാണ് അക്കൗണ്ട് തുറന്ന് കുറഞ്ഞ സമയത്തിനുള്ളിൽ 1 മില്യൺ ഫോളോവേഴ്സിനെ നേടിയത്.

ആദ്യ പോസ്റ്റിട്ട് 24 മണിക്കൂറിനുള്ളിൽ വിജയിയുടെ ഫോളോവേഴ്സ് 4.5 മില്യൺ കടന്നിരുന്നു. വിജയിയുടെ പോസ്റ്റിന് ലഭിച്ച ലൈക്ക് 50 ലക്ഷവും കടന്നു.

2021 ഡിസംബർ 6 നാണ് ബിടിഎസ് താരങ്ങൾ ഇൻസ്റ്റഗ്രാമിൽ എത്തുന്നത്. അക്കൗണ്ട് ആരംഭിച്ച് 43 മിനുട്ടിനുള്ളിലാണ് വിയുടെ ഫോളോവേഴ്സ് 1 മില്യൺ കടക്കുന്നത്. വി ആണ് പട്ടികയിൽ ഒന്നാമത്.

2021 ഓഗസ്റ്റ് 20 നാണ് ആഞ്ജലീന ജോളി ഇൻസ്റ്റഗ്രാമിൽ എത്തുന്നത്. 59 മിനുട്ടിനുള്ളിലാണ് താരത്തിന്റെ ഫോളോവേഴ്സിന്റെ എണ്ണം 1 മില്യൺ കടന്നത്.