നമ്മുടെ ഓർമ്മകളിലെ പഴയ ഗ്രാമീണ ഇടവഴിയെ ഓർമ്മിപ്പിക്കുന്നതാണ് ഇവിടുത്തെ നടപ്പാത. തണൽ വിരിച്ച് നിൽക്കുന്ന മരങ്ങൾ ആ നടപ്പാതയ്ക്ക് കൂട്ടായി നിൽക്കുന്നു. ചിങ്ങമാസത്തിലെ ഇളം കാറ്റ് മരച്ചില്ലകളിലൂടെ കടന്നുപോകുമ്പോൾ മനസ്സിന് കുളിരേകുന്ന ഒരു അനുഭൂതിയാണ് ഈ പാർക്ക് നൽകുന്നത്. മുതിർന്നവരെയും കുട്ടികളെയും ഒരുപോലെ ലക്ഷ്യമിട്ടാണ് ഇത് നിർമ്മിച്ചിട്ടുള്ളത്. ഇവിടെയെത്തുന്ന ഓരോ വ്യക്തിക്കും സന്തോഷം നൽകുന്ന ഒരിടമായി ഇത് മാറുമെന്നതിൽ സംശയമില്ല.
പ്രകൃതിയെ അടുത്തറിയാൻ ഒരിടം... മലയിൻകീഴ് പഞ്ചായത്തിൽ നിർമാണം പൂർത്തിയാകുന്ന ആറ് ഹാപ്പിനെസ്സ് പാർക്കുകളിൽ അഞ്ചാമത്തേതാണ് കുന്നുപാറയിൽ ഉദ്ഘാടനം ചെയ്തത്. ഐ.ബി. സതീഷ് എംഎൽഎയാണ് പാർക്ക് നാടിന് സമർപ്പിച്ചത്. പ്രകൃതിയെ സ്നേഹിക്കുന്ന ഒരു തലമുറയെ വാർത്തെടുക്കുക എന്ന ലക്ഷ്യത്തോടെ, പാർക്കിനോട് ചേർന്നുള്ള കുളത്തിൽ മത്സ്യക്കുഞ്ഞുങ്ങളെ നിക്ഷേപിച്ചുകൊണ്ടായിരുന്നു ഉദ്ഘാടന ചടങ്ങ്.
advertisement
വായനയ്ക്കും സൗഹൃദത്തിനും നടപ്പാതയ്ക്ക് അരികിലായി സ്ഥാപിച്ചിട്ടുള്ള ഒരു പുസ്തകക്കൂട് പാർക്കിലെ മറ്റൊരു പ്രധാന ആകർഷണമാണ്. ഇവിടെയെത്തുന്ന ആർക്കും പുസ്തകങ്ങൾ വായിക്കാനും പുതിയ പുസ്തകങ്ങൾ നൽകാനും സാധിക്കും. വയോജനങ്ങൾക്കും പുതുതലമുറക്കാർക്കും ഒത്തുചേർന്ന് സന്തോഷം പങ്കിടാനും അറിവ് നേടാനും ഈ പുസ്തകക്കൂട് ഒരു വേദി ഒരുക്കുന്നു.
മൊബൈൽ ഫോണുകളിലും ഓൺലൈൻ ലോകത്തും ഒതുങ്ങിക്കൂടുന്ന പുതുതലമുറയ്ക്ക് പുസ്തകങ്ങളും പ്രകൃതിയും നൽകുന്ന സന്തോഷം അനുഭവിച്ചറിയാൻ ഈ പാർക്ക് ഒരു വഴി തുറക്കും. എല്ലാ പ്രായക്കാർക്കും ഒത്തുകൂടാനും, സൗഹൃദങ്ങൾ പുതുക്കാനും, മനസ്സിന് സന്തോഷം നൽകാനും ഈ പാർക്ക് എന്നും ഒരു പ്രതീക്ഷയായി നിലകൊള്ളും.