നടൻ വിനായകന്റെ ഫേസ്ബുക് പേജിൽ വിചിത്രമായ പോസ്റ്റുകൾ; കാരണം അന്വേഷിച്ച് ആരാധകർ കമന്റ് ബോക്സിൽ

നടൻ വിനായകന്റെ വിചത്രമായ പോസ്റ്റുകൾ സോഷ്യൽ മീഡിയയിൽ ചർച്ചയാവുന്നു. കാരണമോ, വിവരണമോ ഇല്ലാതെ പ്രമുഖ വ്യക്തികളുടെ ചിത്രങ്ങൾ പോസ്റ്റ് ചെയ്യുകയാണ് വിനായകൻ

ഏറ്റവും അടുത്തായി നടി കങ്കണ റാണട്ടിന്റെ ചിത്രമാണ് വിനായകന്റെ ഫേസ്ബുക് വാളിലുള്ളത്. കഴിഞ്ഞ ദിവസം കങ്കണയുടെ മുംബൈ ഓഫീസ് മുനിസിപ്പൽ കോർപറേഷൻ ഇടിച്ച് നിരത്തിയിരുന്നു. ഇതിലുള്ള പ്രതിഷേധമാണോ, പിന്തുണയാണോ അതോ കങ്കണയുമായി ബന്ധപ്പെട്ട മറ്റേതെങ്കിലും വിഷയമാണോ എന്നൊന്നും വ്യക്തമല്ല. മുന്നൂറില്പരം കമന്റ് ഈ പോസ്റ്റിനു താഴെ വന്നതായും കാണിക്കുന്നുണ്ട്

കഴിഞ്ഞ ദിവസങ്ങളിൽ നടി ലിസി, ഡബ്ബിങ് ആർട്ടിസ്റ്റും അഭിനേതാവുമായ ഭാഗ്യലക്ഷ്മി എന്നിവരുടെ ചിത്രങ്ങൾ പോസ്റ്റ് ചെയ്യുകയും ചർച്ചക്ക് വഴിവയ്ക്കുകയും ചെയ്തിരുന്നു. എന്നാൽ ഈ പോസ്റ്റുകൾ ഇപ്പോൾ വിനായകന്റെ ടൈംലൈനിൽ നിന്നും അപ്രത്യക്ഷമായിട്ടുണ്ട്

ലോക്സഭാ തിരഞ്ഞെടുപ്പിന് ശേഷം ബി.ജെ.പി. മുന്നോട്ടു വെച്ച ആശയം കേരളത്തിലെ ജനത തള്ളിക്കളഞ്ഞതില്‍ സന്തോഷമുണ്ടെന്ന് പറഞ്ഞ വിനായകന് നേരെ  സൈബർ ആക്രമണം ഉണ്ടായിട്ടുണ്ട്. അന്ന് കാളിയുടെയും അയ്യപ്പന്റേയും ചിത്രങ്ങൾ പ്രൊഫൈൽ ചിത്രവും കവർ ഫോട്ടോയുമാക്കി  മാറ്റിയിരുന്നു വിനായകൻ

എന്നാൽ ഇതിനു ശേഷം വനിതാ ആക്ടിവിസ്റ്റുകൾ വിനായകനിൽ നിന്നും ദുരനുഭവം നേരിട്ടെന്ന ആരോപണവുമായി മുന്നോട്ടുവന്നിരുന്നു. സ്ത്രീ വിരുദ്ധമായ കാര്യങ്ങൾ നേരിടേണ്ടി വന്നു എന്നായിരുന്നു ആരോപണം. വിനായകനെതിരെ കേസും രജിസ്റ്റർ ചെയ്തിരുന്നു 

ഈ വർഷമാദ്യം പുറത്തിറങ്ങിയ 'ട്രാൻസ്' ആണ് വിനായകന്റെ ഏറ്റവും പുതിയ ചിത്രം. ലീല സംവിധാനം ചെയ്യുന്ന 'കരിന്തണ്ടൻ' എന്ന ചിത്രത്തിൽ വിനായകൻ നായക വേഷം ചെയ്യും