ഗീതു മോഹൻദാസ് സംവിധാനം ചെയ്യുന്ന യാഷ് ചിത്രത്തിൽ നായികയായി കരീന കപൂർ?

കെജിഎഫിനു ശേഷം യാഷ് നായകനാകുന്ന ചിത്രമാണ് ടോക്സിക്. ഗീതു മോഹൻദാസ് ആണ് ചിത്രം സംവിധാനം ചെയ്യുന്നത്. ചിത്രത്തിന്റെ കൂടുതൽ വിവരങ്ങൾ അണിയറ പ്രവർത്തകർ പുറത്തുവിട്ടിട്ടില്ല.

ചിത്രത്തിൽ യാഷിന്റെ നായികയായി എത്തുന്നത് ആരാണെന്ന് ഇതുവരെ വെളിപ്പെടുത്തിയിരുന്നില്ല. ഇന്ത്യൻ സിനിമയിലെ മുൻനിര നായികമാരിൽ ഒരാളാകും യാഷിനൊപ്പം ചിത്രത്തിൽ എത്തുക എന്നാണ് റിപ്പോർട്ടുകൾ.

പുതിയ റിപ്പോർട്ടുകൾ അനുസരിച്ച്, ബോളിവുഡ് നടി കരീന കപൂർ ആയിരിക്കും ചിത്രത്തിൽ യാഷിന്റെ നായികയായി എത്തുക. വാർത്തകൾ സത്യമാണെങ്കിൽ ബോളിവുഡിന് പുറത്ത് കരീന നായികയാകുന്ന ആദ്യ ചിത്രമായിരിക്കും ഇത്.

കരീനയുടെ ആദ്യ കന്നഡ ചിത്രം കൂടിയായിരിക്കും ടോക്സിക്. ഫിലിം ഫെയർ റിപ്പോർട്ട് അനുസരിച്ച് കരീനയുടെ എൻട്രി ഗീതു മോഹൻദാസും യാഷും വരും ദിവസങ്ങളിൽ പ്രഖ്യാപിക്കും.

അതേസമയം, ബോളിവുഡിൽ നിന്നും യാഷിനൊപ്പം അഭിനയിക്കുന്ന ആദ്യ നടിയല്ല കരീന കപൂർ. കെജിഎഫ് 2 ൽ രവീണ ടണ്ടൻ യാഷിനൊപ്പം അഭിനയിച്ചിരുന്നു. സഞ്ജയ് ദത്തും ചിത്രത്തിൽ അഭിനയിച്ചിരുന്നു.

യാഷിന്റെ 19ാമത് ചിത്രമാണ് ടോക്സിക്. കെവിഎൻ പ്രൊഡ‍ക്ഷൻസിന്റെ ബാനറിൽ വെങ്കട് കെ നാരായണ ആണ് ടോക്സിക് നിർമിക്കുന്നത്. നേരത്തേ, സായ് പല്ലവി ചിത്രത്തിൽ നായികയാകുമെന്ന് റിപ്പോർട്ടുകളുണ്ടായിരുന്നു. നായികയായി റാഷി ഖന്ന എത്തുമെന്നും റിപ്പോർട്ടുകൾ ഉണ്ടായിരുന്നു.