അമ്മയുടെ സ്നേഹ സമ്മാനം; ദുവയുടെ ഒന്നാം പിറന്നാൾ ആഘോഷമാക്കി ദീപികാ പദുക്കോണ്‍

നടി ദീപിക പദുക്കോണും (Deepika Padukone) ഭർത്താവ് രൺവീർ സിംഗും (Ranveer Singh) കഴിഞ്ഞ വർഷം സെപ്റ്റംബർ 8-നാണ് അവരുടെ കുഞ്ഞ് മകൾക്ക് ജന്മം നൽകിയത്. കഴിഞ്ഞ നവംബർ ഒന്നിന് അവർ കുഞ്ഞിന്റെ പേര് വെളിപ്പെടുത്തിക്കൊണ്ട് ഒരു ചിത്രം പങ്കുവെച്ചിരുന്നു. ദുവാ പദുക്കോണ്‍ സിങ് എന്നാണ് മകൾക്ക് പേരിട്ടത്.

ഇപ്പോഴിതാ, മകളുടെ ഒന്നാം പിറന്നാൾ ദിനത്തിൽ കേക്ക് ഉണ്ടാക്കുന്ന ചിത്രം ദീപിക തൻ്റെ ഇൻസ്റ്റാഗ്രാം പേജിൽ പങ്കുവെച്ചു.

"എൻ്റെ സ്നേഹം പ്രകടിപ്പിക്കുന്ന രീതി? എൻ്റെ മകളുടെ ഒന്നാം പിറന്നാളിന് കേക്ക് ഉണ്ടാക്കുന്നു!" എന്ന കുറിപ്പോടെയാണ് ദീപിക ചിത്രം പോസ്റ്റ് ചെയ്തത്.

അടുത്തിടെ, ദീപിക പദുക്കോൺ LVMH പ്രൈസ് 2025-ൻ്റെ ജൂറി അംഗമായി തിരഞ്ഞെടുക്കപ്പെട്ടിരുന്നു. ഈ നേട്ടം സ്വന്തമാക്കുന്ന ആദ്യ ഇന്ത്യക്കാരിയാണ് ദീപിക.

കുഞ്ഞിൻ്റെ സ്വകാര്യത സംരക്ഷിക്കുന്ന കാര്യത്തിൽ ദീപികയും രൺവീറും വളരെ ശ്രദ്ധാലുക്കളാണ്. എന്നാൽ, അടുത്തിടെ ദുവായുടെ മുഖം വ്യക്തമാക്കുന്ന ഒരു വീഡിയോ സാമൂഹ്യ മാധ്യമങ്ങളിൽ ചോർന്നിരുന്നു. മുംബൈ വിമാനത്താവളത്തിൽ വെച്ച് ചിത്രീകരിച്ച ഈ വീഡിയോയിൽ ദീപികയുടെ മടിയിലിരിക്കുന്ന ദുവായുടെ മുഖം വ്യക്തമായി കാണാമായിരുന്നു. ഇത് ആരാധകരെ രോഷാകുലരാക്കി. പലരും ഇതിനെ സ്വകാര്യതയിലേക്കുള്ള കടന്നുകയറ്റമായി വിശേഷിപ്പിച്ചു.

വീഡിയോ ചിത്രീകരിക്കുന്ന ആളോട് ദീപിക ദേഷ്യത്തോടെ അത് നിർത്തിവെക്കാൻ ആവശ്യപ്പെടുന്നത് ഈ വീഡിയോയിൽ കാണാമായിരുന്നു. അതുവരെ പാപ്പരാസികൾ താരദമ്പതികളുടെ അഭ്യർത്ഥന മാനിച്ചിരുന്നു. എന്നാൽ ഇപ്പോൾ ദമ്പതികളുടെ സ്വകാര്യതയിലേക്ക് കടന്നുകയറിയുള്ള ഈ പ്രവൃത്തി ആരാധകർക്കിടയിൽ വലിയ ചർച്ചകൾക്ക് വഴിതെളിച്ചു.

രൺവീർ സിംഗ് ധുരന്ധർ, ഡോൺ 3 എന്നീ ചിത്രങ്ങളുടെ തിരക്കിലാണ്. അമ്മയായതിന് ശേഷം ദീപിക അറ്റ്‌ലിയുടെ പുതിയ ചിത്രത്തിൻ്റെ ഷൂട്ടിംഗ് തിരക്കുകളിലാണ്. അല്ലു അർജുനാണ് ഈ ചിത്രത്തിലെ നായകൻ.