ചൂടിന് കുറവില്ല; 13 ജില്ലകളിൽ താപനില ഉയരും; സൂര്യാതപ മുന്നറിയിപ്പ് രണ്ടുദിവസം കൂടി നീട്ടി

തിരുവനന്തപുരം: സംസ്ഥാനത്ത് സൂര്യാതപ മുന്നറിയിപ്പ് രണ്ട് ദിവസത്തേക്ക് കൂടി നീട്ടി. വയനാട് ഒഴികെ ഉള്ള എല്ലാ ജില്ലകളിലും ഉയര്‍ന്ന താപനില ശരാശരിയില്‍ നിന്നും രണ്ടു മുതല്‍ മൂന്നു ഡിഗ്രി സെല്‍ഷ്യസ് വരെ കൂടിയേക്കുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്.

ശനിയാഴ്ചവരെ താപനില ഉയര്‍ന്ന നിലയില്‍ തുടരുവാനാണ് സാധ്യത. തെക്കന്‍ ജില്ലകളില്‍ ഇന്നും നാളെയുമായി വേനല്‍മഴ ലഭിക്കാൻ സാധ്യതയുണ്ട്.

കൊല്ലം പുനലൂരില്‍ ഒരാൾ മരിച്ചത് സൂര്യാഘാതമേറ്റാണന്ന് സംശയമുണ്ട്. മരുതിവിള സ്വദേശി തോമസാണ് മരിച്ചത്. വഴിയരികില്‍ മരിച്ച നിലയില്‍ കണ്ടെത്തിയ മൃതദേഹത്തില്‍ പൊള്ളലേറ്റ പാടുകളുണ്ടായിരുന്നു. പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ച ശേഷമെ സൂര്യാഘാതമാണൊ മരണകാരണമെന്ന് സ്ഥിരീകരിക്കാനാകു എന്ന് ഡോക്ടര്‍മാര്‍ അറിയിച്ചു.

കോഴിക്കോട് ജില്ലയിൽ സൂര്യാതപമേറ്റ് ആറുപേർ കഴിഞ്ഞ ദിവസം ചികിത്സ തേടിയിരുന്നു.