'എനിക്ക് മുറിക്കാൻ ജാതിവാൽ ഇല്ല; ഞാൻ ഇപ്പോഴും ധന്യ വീണ'; നടി നവ്യാ നായർ

ഒരുപിടി നല്ല കഥാപാത്രങ്ങളുമായി മലയാളി പ്രേക്ഷകരുടെ ഹൃദയത്തിൽ ഇടംനേടിയ നടിയാണ് നവ്യാ നായർ. സ്കൂൾ കലോത്സവവേദിയിൽനിന്ന് സിനിമയിലേക്ക് എത്തിയ നവ്യ നിരവധി ഹിറ്റ് ചിത്രങ്ങളിൽ നായികയായിരുന്നു. വിവാഹത്തോടെ അഭിനയരംഗത്തുനിന്ന് തൽക്കാലം വിട്ടുനിന്നെങ്കിലും അടുത്തിടെയായി വീണ്ടും സിനിമയിൽ സജീവമാകുകയാണ് താരം. സിനിമയ്ക്ക് പുറമെ ടിവി പരിപാടികളിലും താരം പ്രത്യക്ഷപ്പെടുന്നുണ്ട്.

ഇപ്പോഴിതാ, പേര് സംബന്ധിച്ച് സോഷ്യൽ മീഡിയയിലും മറ്റും ഉയരുന്ന ചർച്ചകൾക്ക് മറുപടിയുമായി രംഗത്തെത്തിയിരിക്കുകയാണ് നവ്യാ നായർ. 'എനിക്ക് മുറിക്കാൻ ജാതിവാൽ ഇല്ല; ഞാൻ ഇപ്പോഴും ധന്യ വീണയാണ്' നവ്യ വ്യക്തമാക്കുന്നു. ഔദ്യോ​ഗിക പേര് നവ്യ നായർ എന്നല്ലെന്നും അതിനാൽ ജാതിവാൽ മുറിക്കാനാവില്ലെന്നും തുറന്നു പറഞ്ഞിരിക്കുകയാണ് താരം.

'നവ്യാനായർ എന്നത് താൻ തെരഞ്ഞെടുത്ത പേരല്ല എന്നും സിബി അങ്കിളും(സംവിധായകൻ സിബി മലയിൽ) മറ്റുള്ളവരും ഇട്ട പേരാണ് ഇതെന്നുമാണ് നവ്യാ നായർ പറയുന്നത്. പത്താം ക്ലാസ്സിൽ പഠിക്കുന്ന സമയത്താണ് ഞാൻ സിനിമയിലെത്തുന്നത്. അന്ന് സംവിധായകരും എഴുത്തുകാരും പ്രൊ‍ഡ്യൂസേഴ്സും എല്ലാം ഇട്ട പേരാണ് നവ്യ നായർ'- നവ്യ ഒരു അഭിമുഖത്തിൽ പറഞ്ഞു.

നവ്യാ നായർ എന്ന പേരിടുമ്പോൾ എനിക്ക് അന്ന് അവിടെ വോയ്സ് ഇല്ല. ഞാൻ ഇനി പേരുമാറ്റിയാലും എല്ലാവരുടെ ഉള്ളിലും നവ്യാ നായർ തന്നെയായിരിക്കുമെന്നും മനോരമയ്ക്ക് നൽകിയ അഭിമുഖത്തിൽ നടി പറഞ്ഞു.

'നവ്യ നായർ എന്നു വിളിക്കുന്നത് തന്റെ ജാതി മനസ്സിലാക്കിയിട്ടല്ല. അത് എന്റെ പേര് ആയിപ്പോയി. ഇനി ഇത് മുറിച്ചു മാറ്റാം എന്നു വച്ചാൽ തന്നെ എന്റെ ഒരു ഔദ്യോഗിക രേഖകളിലും ഞാൻ നവ്യ അല്ല, ധന്യ വീണ ആണ്. ഗസറ്റിലെ എന്റെ പേര് അതാണ്'- നവ്യ പറയുന്നു.

'എന്റെ ആധാർ കാർഡ്, പാസ്പോർട്ട്, ഡ്രൈവിങ് ലൈസൻസ്... ഇതിലൊക്കെ ഞാൻ ധന്യ വീണ തന്നെ ആണ്. അതിലൊന്നും ജാതിവാൽ ഇല്ല, പിന്നെ ഞാൻ എങ്ങനെ മുറിക്കും?- നവ്യ നായർ ചോദിച്ചു. ജാനകീ ജാനേ ആണ് നവ്യ നായരുടെ പുതിയ സിനിമ. ഇതിൽ സൈജു കുറുപ്പാണ് നായകൻ.