'കതകിൽ മുട്ടിയ ആളെ കിട്ടി, ഇന്ന് അവൻ കാറിന്റെ ഡോറാണ് മുട്ടിയത്'; സാബുമോനെ ചേർത്ത് പിടിച്ച ചിത്രവുമായി മഞ്ജുപിള്ള

ഹേമകമ്മിറ്റി റിപ്പോർട്ടുമായി ബന്ധപ്പെട്ടിട്ടുള്ള ചർച്ചകളാണ് സമൂഹമാദ്ധ്യമങ്ങളിൽ നിറയുന്നത്. ഇതിൽ ആരോപണങ്ങളും പ്രത്യാരോപണങ്ങളും മാത്രമല്ല ഉൾ‌പ്പെടുന്നത്. സിനിമാ മേഖലയിലുള്ളവരെ കുറിച്ചുള്ള തെറ്റായ പ്രചരണങ്ങളും ഉയരുന്നുണ്ട്. ഇത്തരത്തിലെ പ്രചരണങ്ങൾക്ക് മറുപടിയുമായി എത്തിയിരിക്കുകയാണ് നടി മഞ്ജുപിള്ള.

നടൻ സാബുമോനോടൊപ്പമുള്ള ചിത്രങ്ങൾ പങ്കുവച്ചുകൊണ്ട് നടി കുറിച്ച വാക്കുകളാണ് ശ്രദ്ധേയമാകുന്നത്. 'കതകിൽ മുട്ടിയ ആളെ കിട്ടി, ഇന്ന് അവൻ കാർ ഡോർ ആണ് മുട്ടിയെ. പുതിയ കഥകൾ പോരട്ടെ. ഇവൻ എനിയ്ക്കു പിറക്കാതെ പോയ ആങ്ങള. എന്റെ സ്വന്തം സഹോദരൻ.'- എന്നാണ് മഞ്ജുപിള്ള കുറിച്ചത്.

ചിത്രങ്ങൾ പങ്കുവച്ചതിന് പിന്നാലെ നിരവധി പേരാണ് രസകരമായ കമന്റുകൾ കുറിച്ചിരിക്കുന്നത്. നിങ്ങൾ നല്ല കോമ്പോ ആണെന്നും ചേച്ചിയെ ഒരുപാട് ഇഷ്ടമാണെന്നുമായിരുന്നു കൂടുതൽ കമന്റുകളും.

നേരത്തെ ടെലിവിഷൻ ഷൂട്ടിനിടെ പറഞ്ഞ തമാശകഥ ചില ആളുകൾ വളച്ചൊടിച്ച് തെറ്റായ രീതിയിൽ പ്രചരിപ്പിച്ചിരുന്നു. ഇക്കാര്യത്തിലും മഞ്ജുപിള്ള നേരത്തെ പ്രതികരണം നടത്തിയിരുന്നു.

തനിക്ക് എത്ര ദൂരം വേണമെങ്കിലും യാത്ര ചെയ്യുന്നതിന് ധൈര്യമായി കൂടെ കൂട്ടാവുന്ന ആളാണ് സാബുമോൻ. വളച്ചൊടിച്ച വാർത്ത കണ്ടപ്പോൾചിരിയാണ് വന്നതെന്നുമായിരുന്നു മഞ്ജു അന്ന് പ്രതികരിച്ചത്.