COVID 19 | ലോക്ക് ഡൗൺ ആണെങ്കിലും ആലപ്പുഴക്കാർ വിശന്നിരിക്കേണ്ട; 20 രൂപയ്ക്ക് വയറു നിറച്ചുണ്ണാം

ലോക്ക് ഡൗൺ കാലത്ത് ആശ്വാസമായി ആലപ്പുഴയിൽ ജനകീയ ഹോട്ടലുകളുടെ ശൃoഖല. ഹോട്ടലുകളിൽ എത്തുന്നവർക്ക് 20 രൂപ നിരക്കിൽ പാഴ്സൽ ലഭിക്കും. വീടുകളിൽ എത്തിച്ച് നൽകണമെങ്കിൽ 25 രൂപയാണ് നിരക്ക്.

കക്കായിറച്ചി തോരനും , വെണ്ടയ്ക്ക മെഴുക്കുപുരട്ടിയും, അച്ചാറും, കൂട്ടത്തിൽ മീൻ കറിയും ,സാമ്പാറും തീയലും. കുടുംബശ്രീയിലെ ചേച്ചിമാരുടെ കൈപ്പുണ്യമാണെങ്കിൽ നമ്മുടെ സ്വന്തം അടുക്കളകളെ ഓർമ്മിപ്പിക്കും.

മാരാരിക്കുളത്തെ വിശപ്പ് രഹിത അടുക്കളയിൽ നിന്നാണ് ഹോട്ടലുകളിലേക്ക് ഭക്ഷണം എത്തിക്കുക. ആലപ്പുഴ നഗരം മുതൽ ചേർത്തല നഗരം വരെ ഹോട്ടലുകളുടെ ശൃംഘല തയ്യാറായി കഴിഞ്ഞെന്ന് ധനമന്ത്രി തോമസ് ഐസക് പറഞ്ഞു.

ഭക്ഷണശാലയിൽ ഇരുന്നു ഊണ് കഴിക്കാൻ പാടില്ല. പാത്രവുമായി എത്തി വാങ്ങി പോകാം. വീട്ടിലേക്ക്‌ എത്തിക്കണമെങ്കിൽ 5 രൂപ അധികം നൽകണം. വീട്ടിലേക്ക് ഭക്ഷണം വേണ്ടവർ തലേ ദിവസം  8 മണിക്ക് മുൻപായി എസ് എം എസ് വഴി അറിയിക്കണം.

മീൻ പൊരിച്ചതോ ഇറച്ചി ഉലർത്തിയതോ കൂടിയുള്ള ഊണിന് 50 രൂപയാണ്. 10 ശതമാനം ഊണുകൾ സൗജന്യമായി അഗതികൾക്കാണ് നൽകുക.

അടിയന്തര സാഹചര്യം കണക്കിലെടുത്ത് 360 കേന്ദ്രങ്ങൾ കൂടി കുടുംബശ്രീ കണ്ടെത്തിയിട്ടുണ്ട്. വിഷുവിന് മുമ്പ് സംസ്ഥാനത്താകമാനം ഈ ഹോട്ടലുകൾ പ്രവർത്തനം ആരംഭിക്കും.

'കോവിഡ് കാലത്ത് പ്രതിസന്ധിയിലായിരിക്കുന്ന സാധാരണക്കാരന്  ആശ്വാസമാകും മാരാരിക്കുളത്തെ വിശപ്പുരഹിത അടുക്കളയിൽ നിന്നെത്തുന്ന ഈ ഭക്ഷണം' എന്ന കാര്യത്തിൽ തർക്കമില്ല. ധനകാര്യ വകുപ്പ് മന്ത്രി ഡോ: ടി .എം . തോമസ്‌ ഐസക്കിന്‍റെ പ്രസ്താവന.

ഊണിനു കൃത്യമായ മെനു തയ്യാറാക്കിയിട്ടുണ്ട്. എല്ലായിടത്തും ഊണിനോടൊപ്പം കേരളത്തിലെ പരമ്പരാഗതമായ ഏതെങ്കിലും ഇലക്കറികൾ ഉണ്ടാവും.

ഇരുപതിനായിരം കോടി രൂപയുടെ പാക്കേജിൽ പറഞ്ഞത് പോലെ കേരളത്തിൽ ഇരുപതു രൂപ ജനകീയ ഹോട്ടലുകളുടെ ശൃംഖലകൾ ഏപ്രിൽ മാസത്തോടെ പൂർത്തിയാകും.

ഭക്ഷണം ലഭിക്കുന്നതിനായി ഫോൺ നമ്പറുകളിൽ കൃത്യമായ മേൽവിലാസമടക്കം  എസ്  എംഎസ്  അയയ്‌ക്കേണ്ടതാണ്. മറുപടി എസ് എം എസ് ആയി ലഭിക്കും.

സ്നേഹജാലകം  - സജിത്‌രാജ് - 9495507208കൃഷ്ണപിള്ള ട്രസ്റ്റ് - നൗഷാദ് പുതുവീട്- 9633137384സ്വാന്തനം  ചേർത്തല - കെ.പി. പ്രതാൻ-9496332722സുഭിക്ഷ - ഹേമലത ജോഷി - 7591920784അത്താഴക്കൂട്ടം - എ .ആർ. നൗഷാദ് - 9567276181സത്യസായി ഫൌണ്ടേഷൻ - പ്രേംസായി -9539011146ജനകീയ ഹോട്ടൽ മെഷിൻ ഫാക്ടറി -9961266688