പ്രധാനമന്ത്രി മോദിയുടെ സന്ദർശനവും അബുദാബി ക്ഷേത്രത്തിലെ ഉത്സവവും ഒരുമിച്ച്

ദുബായ്: പ്രധാനമന്ത്രി നരേന്ദ്ര മോദിയുടെ സന്ദർശനവും അബുദാബിയിൽ നിർമാണം പൂർത്തിയായ ഹൈന്ദവക്ഷേത്രത്തിലെ ജന്മാഷ്ടമി ഉത്സവവും ഒരുമിച്ച് . ഓഗസ്റ്റ് 23നാണ് പ്രധാനമന്ത്രി യുഎഇ സന്ദർശിക്കുന്നത്. ഇതേദിവസമാണ് ജൻമാഷ്ടമി ഉത്സവവും. ബഹ്‌റൈൻ സന്ദർശിക്കാനായി പോകുന്ന പ്രധാനമന്ത്രി യുഎഇ സായിദ് പുരസ്കാരം ഏറ്റുവാങ്ങുന്നതിനായാണ് വെള്ളിയാഴ്ച മുതൽ രണ്ട് ദിവസത്തേക്ക് മോദിഅബുദാബിയിൽ എത്തുന്നതെന്ന് ഇന്ത്യൻ വിദേശകാര്യ മന്ത്രാലയം (എംഇഎ) ഞായറാഴ്ച അറിയിച്ചു.

അബുദബിയിൽ പുതിയതായി നിർമ്മിച്ച ബൊച്ചൻസ്വാസി അക്ഷർ പൂർഷോതം സ്വാമിനാരായണ സാന്ത (ബി‌എ‌പി‌എസ്) ക്ഷേത്രത്തിലാണ് വിപുലമായ ജന്മാഷ്ടമി ഉത്സവം നടക്കുന്നത്. ഇതിലേക്ക് പ്രധാനമന്ത്രി മോദിയെ ക്ഷണിച്ചിട്ടുണ്ടെങ്കിലും അദ്ദേഹം പങ്കെടുക്കുമോയെന്ന് വ്യക്തമല്ല.

1200ഓളം ഭക്തർ ഉത്സവത്തിൽ പങ്കെടുക്കുമെന്നാണ് ക്ഷേത്രഭാരവാഹികൾ പ്രതീക്ഷിക്കുന്നത്. ഉത്സവത്തിന്‍റെ ഒരുക്കങ്ങൾ നടക്കുന്നതിനിടെയാണ് പ്രധാനമന്ത്രിയുടെ സന്ദർശനവിവരം ഭാരവാഹികൾ അറിയുന്നത്. ഇതേത്തുടർന്ന് ഉത്സവച്ചടങ്ങിലേക്ക് അദ്ദേഹത്തെ ക്ഷണിക്കാൻ തീരുമാനിക്കുകയായിരുന്നു.