COVID 19| ഫിലിപ്പീൻസിൽ മലയാളി വിദ്യാർത്ഥികൾ ദുരിതത്തിൽ; എയർപോർട്ടിൽ നിന്നും പുറത്താക്കി

കോവിഡ് ഭീതിയെത്തുടർന്ന് ഫിലിപ്പീൻസിൽ കുടുങ്ങിയ മലയാളി വിദ്യാർത്ഥികളടങ്ങിയ ഇന്ത്യൻ സംഘം ദുരിതത്തിൽ.

ഒരു ദിവസത്തിലധികം വിമാനത്തിനായി കാത്തു നിന്ന വിദ്യാർത്ഥികളെ എയർപോർട്ടിൽ നിന്ന് പുറത്താക്കി.

മുറിയിൽ അടച്ചിട്ടിരിക്കുകയാണെന്ന് വിദ്യാർത്ഥികൾ പറഞ്ഞു. 9 മലയാളികളടക്കം 89 ഇന്ത്യൻ വിദ്യാർത്ഥികളാണ് മനീലയിലെ എയർപോർട്ടിൽ മാത്രം ഇന്ത്യയിലേക്ക് മടങ്ങാനാവാതെ കുടുങ്ങികിടക്കുന്നത്. 

യാത്രാ സൗകര്യം ഉറപ്പാക്കാമെന്ന ഇന്ത്യൻ എംബസിയുടെ ഉറപ്പിനെത്തുടർന്ന് കൂടുതൽ വിദ്യാർത്ഥികൾ ഇന്നലെ വിമാനത്താവളത്തിലേക്ക് എത്തിയിരുന്നു.

വിദ്യാർത്ഥികളുടെ എണ്ണം എടുത്തതല്ലാതെ പിന്നീട് എംബസിയിൽ നിന്ന് പ്രതികരണമുണ്ടായില്ല. രാവിലെ വിദ്യാർത്ഥികളെ നിർബന്ധപൂർവ്വം എയർപോർട്ടിൽ നിന്നും ഉദ്യോഗസ്ഥർ എത്തി മാറ്റി.

ഇവർ ഇപ്പോൾ പുറത്ത് മുറികളിലാണ്. വിമാനം ഇല്ലാത്തതിനാൽ എയർപോർട്ടിലേക്ക് വരാതെ വീടുകളിലും വിദ്യാർത്ഥിനികൾ താമസിക്കുന്നുണ്ട്.

ഫിലിപ്പീൻസിൽ നിന്ന് മടങ്ങുന്നതിന് നൽകിയിരിക്കുന്ന 72 മണിക്കൂർ സമയം ഇന്ന് അവസാനിക്കുകയാണ്.

അതിന് ശേഷം നാട്ടിലേക്ക് തിരിക്കുന്നത് ദുഷ്കരമാകും. ഈ സാഹചര്യത്തിൽ അടിയന്തിര ഇടപെടൽ ഉണ്ടാകണമെന്നാണ് വിദ്യാർത്ഥികൾ അഭ്യർത്ഥിക്കുന്നത്.

Malayalee students stranded in Philippines| ഫിലിപ്പീൻസിലെ മനീലയിൽ നിന്ന് നാട്ടിലേക്ക് മടങ്ങാനാവാതെ മലയാളി വിദ്യാർത്ഥികൾ ഉൾപ്പെട്ട ഇന്ത്യൻ സംഘം. നാനൂറോളം വിദ്യാർത്ഥികളാണ് കുടുങ്ങി കിടക്കുന്നത്. ഇതിൽ നൂറ് പേർ മലയാളികളാണ്.

മലയാളികളടക്കം 400ലധികം ഇന്ത്യൻ വിദ്യാർത്ഥികളാണ് നാട്ടിലേക്ക് മടങ്ങാനായി കാത്തിരിക്കുന്നത്.