ഇനി ലുക്കില്ലെന്ന് പറയരുത്; റെയിൽവേയിലെ ടിക്കറ്റ് പരിശോധകർ സ്റ്റൈലായി വരും

തിരുവനന്തപുരം: തീവണ്ടിയാത്രകൾ ഇനി കൂടുതൽ സ്റ്റൈലാകും. വെറും വാക്കല്ല അതിനുള്ള ആദ്യപടി റെയിൽവേയിൽ തുടങ്ങിക്കഴിഞ്ഞു. ടിക്കറ്റ് പരിശോധകരാണ് ഇനി അടിപൊളിയായി നിങ്ങളുടെ മുമ്പിലേക്ക് എത്തുന്നത്. തിരുവനന്തപുരം ഡിവിഷനിലാണ് ഈ മാറ്റം.

കറുത്ത കോട്ടിൽ നിന്ന് നേവി ബ്ലൂവിലേക്കാണ് മാറ്റം. ഷൂസും ബെൽറ്റും മാത്രമാണ് കറുപ്പ് നിറത്തിൽ തുടരുക.

നേവി ബ്ലൂ പാന്‍റ്സും വെള്ള ഷർട്ടുമാണ് പുതിയ വേഷം. ചുവന്ന ടൈ ഇനിമുതൽ നീല ടൈ ആയിരിക്കും.

രാജ്യത്ത് മുംബൈയ്ക്ക് ശേഷം പുതിയ ഡ്രസ് കോഡ് പരീക്ഷിക്കുന്ന രണ്ടാമത്തെ ഡിവിഷനാണ് തിരുവനന്തപുരം.

വനിതകൾക്കും ഇതേ വേഷം തന്നെയാണ്. തീവണ്ടിയിൽ ജോലി ചെയ്യുമ്പോൾ നീല കോട്ടുണ്ടാവും.

വസ്ത്രത്തിനൊപ്പം ബാഡ്ജിലും മാറ്റം വരുത്തിയിട്ടുണ്ട്.

ടിക്കറ്റ് ഇൻസ്‌പെക്ടർക്ക് ഒരു നക്ഷത്രവും സീനിയർമാർക്ക് രണ്ട് നക്ഷത്രവും ചീഫുമാർക്ക് മൂന്ന് നക്ഷത്രവും ആയിരിക്കും ഉണ്ടാകുക. സാധാരണ ടി.ടി.ഇമാർക്ക് നക്ഷത്രം ഉണ്ടാവില്ല.

കൊങ്കൺ റെയിൽവേയുടെ ശിൽപി ഇ. ശ്രീധരൻ ആയിരുന്നു വേഷത്തിലും ഒരു ലുക്ക് വേണമെന്ന് നിർദ്ദേശിച്ചത്. ഇതിന്‍റെ ഭാഗമായി കൊങ്കണിലെ ഉദ്യോഗസ്ഥർക്ക് സാധാരണ വെള്ള വസ്ത്രത്തിൽ നിന്ന് മാറി പൈലറ്റ് വേഷം നൽകിയിരുന്നു.