അട്ടപ്പാടിയിൽ കുട്ടി കൊമ്പൻ ചെരിഞ്ഞ നിലയിൽ; മൃതദേഹത്തിന് രണ്ടാഴ്ച പഴക്കം

പാലക്കാട്: അട്ടപ്പാടി വനമേഖലയിൽ കാട്ടാനയുടെ അഴുകിയ ജഡം കണ്ടെത്തി.

അഗളി പഞ്ചായത്തിലെ കള്ളമല ചിന്നപറമ്പ് മന്തംചോല മലവാരത്താണ് പത്ത് വയസ് പ്രായമുള്ള കുട്ടി കൊമ്പനെ ചരിഞ്ഞ നിലയിൽ കണ്ടെത്തിയത്.

ആന ചരിഞ്ഞ് രണ്ടാഴ്ച്ചയായിരിക്കാമെന്നതാണ് പ്രാഥമിക നിഗമനം. ജഡം പൂർണമായും അഴുകിയ നിലയിലായിരുന്നു.

ഈ മേഖലയിൽ പരിശോധന നടത്തുന്ന വനം വകുപ്പ് ജീവനക്കാരാണ് കാട്ടാനയുടെ ജഡം കണ്ടെത്തിയത്.

പോസ്റ്റ് മോർട്ടം റിപ്പോർട്ട് കിട്ടിയതിന് ശേഷമേ മരണകാരണം വ്യക്തമാവൂവെന്ന് അഗളി ഫോറസ്റ്റ് റെയ്ഞ്ച് ഓഫീസർ ഉദയൻ പറഞ്ഞു.

ഈ മേഖലയിൽ കടുവയുടെ സാന്നിദ്ധ്യമുള്ളതായി പറയപ്പെടുന്നുണ്ട്. വനം വകുപ്പ് കേസ് എടുത്തു.