വേഗനിയന്ത്രണം പാലിച്ചില്ല; വാളയാറിൽ ട്രെയിനിടിച്ച് കാട്ടുപന്നികൾ കൂട്ടത്തോടെ ചത്തു

പാലക്കാട് : വാളയാറിൽ ട്രെയിനിടിച്ച് കാട്ടുപന്നികൾ കൂട്ടത്തോടെ ചത്തു. തിങ്കളാഴ്ച പുലർച്ചെയാണ് വാളയാർ റെയിൽവേ സ്റ്റേഷന്  സമീപം ബി ട്രാക്കിലാണ് ട്രെയിനിടിച്ച് കാട്ടുപന്നികൾ കൂട്ടത്തോടെ ചത്തത്.

റെയിൽവേ ട്രാക്കിലൂടെ സഞ്ചരിച്ചിരുന്ന കാട്ടുപന്നികളെ ട്രെയിൻ ഇടിച്ചു തെറിപ്പിയ്ക്കുകയായിരുന്നു.

രാവിലെ പ്രദേശവാസികളാണ് ട്രാക്കിനകത്ത് ദാരുണമായി ചത്തു കിടക്കുന്ന കാട്ടുപന്നികളെ കണ്ടത്.

ചില കാട്ടുപന്നികളുടെ ശരീരം ചിതറിയിരുന്നു. 23 എണ്ണം ചത്തതായി വനം വകുപ്പ് അധികൃതർ പറഞ്ഞു.

ഏത് ട്രെയിനാണിടിച്ചതെന്ന് കണ്ടെത്താനായിട്ടില്ല.

സംഭവത്തെ തുടർന്ന് വനം വകുപ്പ് ഉദ്യോഗസ്ഥർ സ്ഥലത്തെത്തി. ഈ മേഖലയിൽ ട്രെയിനിടിച്ച് നിരവധി  കാട്ടാനകൾ ചത്തിട്ടുണ്ട്.

വന്യമൃഗങ്ങളുടെ സുരക്ഷ കണക്കിലെടുത്ത് ട്രെയിനുകൾക്ക് വേഗ നിയന്ത്രണം ഏർപ്പെടുത്തിയിട്ടുണ്ടെങ്കിലും പാലിക്കാറില്ല. ഇതാണ് അപകടങ്ങൾക്ക്  കാരണമാവുന്നത്.