84 വർഷവും 9 മാസവും ഒരേ കമ്പനിയിൽ ജോലി ചെയ്ത് കൊണ്ട് വാൾട്ടർ ഓർത്ത‍്‍മാൻ എന്നയാളാണ് പുതിയ ലോക റെക്കോ‍ർഡ് സ്ഥാപിച്ചിരിക്കുന്നത്. അദ്ദേഹം തന്നെ മുൻപ് സ്ഥാപിച്ച 81 വർഷവും 85 ദിവസവുമെന്ന പഴയ റെക്കോ‍ർഡാണ് ഇപ്പോൾ പുതുക്കിയിരിക്കുന്നത്. വാൾട്ടറിൻെറ ജീവിതം വളരെ അത്ഭുതകരമായി തോന്നാം. എന്നാൽ ആത്മാ‍ർഥതയും താൽപ്പര്യവും ഒപ്പം ജോലിയോടും സ്ഥാപനത്തോടും അടങ്ങാത്ത സ്നേഹവുമുണ്ടെങ്കിൽ ആർക്കും ഇതിന് സാധിക്കുമെന്ന് പറയുന്ന പ്രചോദനാത്മകമായ കഥ കൂടിയാണ്.
ബ്രസീലിലെ സാൻറ കറ്റരിനയിലുള്ള ഇൻഡസ്ട്രിയാസ് റെനോക്സ് എസ്എ എന്ന ടെക്സ്റ്റൈൽ കമ്പനിയിൽ 1938 ജനുവരി 17നാണ് ഷിപ്പിങ് അസിസ്റ്റൻറായി വാൾട്ടർ ജോലി ആരംഭിക്കുന്നത്. കമ്പനിയുടെ പേര് ഇന്ന് റെനോക്സ് വ്യൂ എന്നാണ്. ജോലിയോടുള്ള താൽപ്പര്യവും ആത്മാ‍ർഥതയും കാരണം വളരെ പെട്ടെന്ന് തന്നെ വാൾട്ടറിന് പ്രൊമോഷൻ ലഭിച്ചു. കമ്പനിയുടെ സെയിൽസ് വിഭാഗത്തിൽ മാനേജരായിട്ടായിരുന്നു സ്ഥാനക്കയറ്റം. പുതിയ സ്ഥാനം അദ്ദേഹത്തിന് വലിയ താൽപ്പര്യമുള്ളതായി മാറി. രാജ്യത്തിൻെറ വിവിധ മേഖലകളിൽ സന്ദർശിക്കാമെന്നതും വ്യത്യസ്തരായ മനുഷ്യരോടും സംസ്കാരങ്ങളോടും ഇടപെടാൻ സാധിക്കുമെന്നതുമായിരുന്നു ഇതിന് കാരണം.
advertisement
84 വ‍ർഷത്തെ കരിയറിനിടയിൽ വാൾട്ടറിന് നിരവധി അനുഭവങ്ങളുണ്ടായി. നിരവധി മാറ്റങ്ങളിലൂടെ അദ്ദേഹം കടന്ന് പോയി. സ്വന്തം കമ്പനിയുടെ പേര് പോലും മാറി. പുതിയ മാറ്റങ്ങളെ ഉൾക്കൊള്ളുന്നതിനൊപ്പം പുതിയ കാര്യങ്ങൾ ഉൾക്കൊള്ളുകയും പെട്ടെന്ന് പഠിച്ചെടുക്കുകയും ചെയ്യുന്നത് നിങ്ങളുടെ മുന്നോട്ടുള്ള യാത്രയിൽ ഗുണകരമാവുമെന്ന് വാൾട്ടർ പറഞ്ഞു. ഏറ്റവും ഇഷ്ടമുള്ള കാര്യങ്ങളാണ് ചെയ്യേണ്ടതെന്ന് അദ്ദേഹം യുവാക്കളോട് പറയുന്നു. ഒരു നല്ല കമ്പനിയിൽ ജോലി ചെയ്യാൻ ശ്രമിക്കുക. നിങ്ങൾക്ക് പ്രചോദനം തോന്നുന്ന മേഖലയിൽ ജോലി ചെയ്യുന്നതാണ് നല്ലതെന്നും വാൾട്ടർ കൂട്ടിച്ചേർത്തു.
"നിങ്ങൾക്ക് ചെയ്യുന്ന ജോലിയോട് ഇഷ്ടം തോന്നണം. ഞാൻ എന്ത് തരത്തിലുള്ള വെല്ലുവിളിയും ഏറ്റെടുക്കുമെന്ന ഉറച്ച വിശ്വാസത്തോടെയാണ് കരിയർ തുടങ്ങിയത്. നിങ്ങൾ ജോലി ചെയ്യുന്നുണ്ടെന്ന് പറയാൻ വേണ്ടി മാത്രം എന്തെങ്കിലും ചെയ്യുന്നതിൽ കാര്യമില്ല. അതിൽ നിങ്ങൾ മുന്നോട്ട് പോവാനുള്ള സാധ്യത കുറവാണ്," വാൾട്ടർ വാർത്താ ഏജൻസിയായ റോയിട്ടേഴ്സിനോട് പറഞ്ഞു. ഏപ്രിൽ 19നായിരുന്നു വാൾട്ടറിൻെറ 100ാം പിറന്നാൾ ആഘോഷം. വയസ്സ് 100 കടന്നെങ്കിലും ഈ ബ്രസീലുകാരന് ഇപ്പോഴും വലിയ ആരോഗ്യപ്രശ്നങ്ങളൊന്നും തന്നെയില്ല. ചിട്ടയായ വ്യായാമവും ഭക്ഷണക്രമീകരണവുമൊക്കെയാണ് അദ്ദേഹത്തിൻെറ ജീവിതത്തെ മനോഹരമായി മുന്നോട്ട് നയിക്കുന്നത്.