ജനിച്ചത് ഒരേദിവസം, വിവാഹം കഴിഞ്ഞതും ഒരേദിവസം, ഒടുവിൽ ഒരേ ദിവസം ആൺകു‍ഞ്ഞുങ്ങൾക്ക് ജന്മം നൽകി ഇരട്ടകൾ

മാർച്ച് 30ന് നർസമാപേട്ട് സർക്കാർ ആശുപത്രിയിൽ ഇരുവരും ആൺകുട്ടികൾക്ക് ജന്മം നൽകി

ഹൈദരാബാദ്: ജനിച്ചത് ഒരേദിവസം, വിവാഹം കഴിഞ്ഞതും ഒരേ ദിവസം, ഒടുവിൽ ഒരേ ആശുപത്രിയിൽ ഒരേ ദിവസം ആൺകു‍ഞ്ഞുങ്ങൾക്ക് ജന്മം നൽകി ഇരട്ടകൾ. തെലങ്കാനയിലെ വാറങ്കലിൽ നിന്നുള്ള ഇരട്ടകളായ രമയും ലളിതയുമാണ് ഒരേദിവസം പ്രസവിച്ചത്. ദുഗ്ഗോണ്ടി തിമ്മാംപേട്ട ഗ്രാമത്തിലെ ബോന്തു സരയ്യയുടെയും കൊമാരമ്മയുടെയും മക്കളാണ് ലളിതയും രമയും.

കഴിഞ്ഞ വർഷമായിരുന്നു ഇരുവരുടെയും വിവാഹം. കോലൻപള്ളി ഗ്രാമത്തിലെ നാഗരാജുവുമായാണ് ലളിതയുടെ വിവാഹം കഴിഞ്ഞത്. തിമ്മംപേട്ടയിലെ ഗോലൻ കുമാറുമായി രമയുടെ വിവാഹം. എന്നാൽ ഇപ്പോൾ യാദൃച്ഛികമായി മാർച്ച് 30ന് നർസമാപേട്ട് സർക്കാർ ആശുപത്രിയിൽ ഇരുവരും ആൺകുട്ടികൾക്ക് ജന്മം നൽകി. നർസാംപേട്ട് നിയമസഭാംഗം പെഡ്ഡി സുദർശൻ റെഡ്ഡി ആശുപത്രിയിലെത്തി ‘കെസിആർ കിറ്റ്’ സമ്മാനിച്ചു.