പിഎൻജി ഉണ്ടെങ്കിൽ അതിലേക്ക് മാറാത്തവർക്ക് എൽപിജി ഇല്ല; വിതരണം നിർത്താൻ സർക്കാർ ഉത്തരവ്

പശ്ചിമേഷ്യൻ രാജ്യങ്ങളിലെ യുദ്ധസാഹചര്യവും രാജ്യാന്തര വിപണിയിലെ എൽപിജി ക്ഷാമവും കണക്കിലെടുത്താണ് ആഭ്യന്തരമായി ഉൽപ്പാദിപ്പിക്കുന്ന പ്രകൃതിവാതകത്തിലേക്ക് മാറാൻ സർക്കാർ ജനങ്ങളെ പ്രേരിപ്പിക്കുന്നത്. ഒറ്റ ഇന്ധനത്തെ മാത്രം ആശ്രയിക്കുന്നത് കുറയ്ക്കാനും സുരക്ഷിതമായ ഊർജ്ജ വിതരണം ഉറപ്പാക്കാനും ഇതിലൂടെ സാധിക്കും. പൈപ്പ്‌ലൈനുകൾ വഴി അടുക്കളയിലെ ബർണറുകളിലേക്ക് നേരിട്ട് പാചകവാതകം എത്തുന്നതിനാൽ ഗ്യാസ് തീരുന്ന അവസ്ഥ ഉണ്ടാകില്ല എന്നതും സിലിണ്ടറുകൾക്കായി കാത്തിരിക്കേണ്ടതോ റീഫില്ലുകൾ ബുക്ക് ചെയ്യേണ്ടതോ ആയ ബുദ്ധിമുട്ടുകൾ ഒഴിവാക്കാം എന്നതും ഉപഭോക്താക്കൾക്ക് വലിയ ആശ്വാസമാകും.

advertisement

കൂടുതൽ സുരക്ഷിതവും സൗകര്യപ്രദവുമായ ഇന്ധന ബദലായാണ് പിഎൻജി കണക്കാക്കപ്പെടുന്നത്. പൈപ്പ്‌ലൈൻ അടിസ്ഥാന സൗകര്യങ്ങൾ വേഗത്തിലാക്കാനും അനുമതികൾ ലഘൂകരിക്കാനും പുതിയ വിജ്ഞാപനം നിർദ്ദേശിക്കുന്നുണ്ട്. വരും വർഷങ്ങളിൽ കൂടുതൽ നഗരങ്ങളിലേക്ക് പിഎൻജി ശൃംഖല വ്യാപിപ്പിക്കാനാണ് സർക്കാർ ലക്ഷ്യമിടുന്നത്. ഈ മാറ്റം രാജ്യത്തിന്റെ ഇന്ധന സ്വയംപര്യാപ്തതയിൽ വലിയൊരു നാഴികക്കല്ലായി മാറുമെന്നാണ് വിലയിരുത്തപ്പെടുന്നത്.