നൂപുര ധ്വനിയിൽ കനകകുന്ന്, തിരുവനന്തപുരം നഗരത്തിന് ഇനി നൃത്തോത്സവ നാളുകൾ

പ്രശസ്തമായ നിശാഗന്ധി ഓഡിറ്റോറിയത്തിൽ ഫെബ്രുവരി 20 വരെയാണ് ഈ സാംസ്കാരിക വസന്തം അരങ്ങേറുന്നത്. ഇന്ത്യയിലെ പ്രശസ്തരായ നർത്തകരും വളർന്നുവരുന്ന പ്രതിഭകളും ഒത്തുചേരുന്ന ഈ വേദി ലോകമെമ്പാടുമുള്ള കലാനിപുണരുടെയും വിനോദസഞ്ചാരികളുടെയും ശ്രദ്ധാകേന്ദ്രമായി മാറിയിരിക്കുകയാണ്. ഈ വർഷത്തെ നിശാഗന്ധി പുരസ്‌കാരം പ്രശസ്ത മണിപ്പൂരി നർത്തകി ദർശന ജാവേരിക്ക് സമ്മാനിക്കുന്നു എന്നത് ഇത്തവണത്തെ മേളയുടെ പ്രധാന സവിശേഷതയാണ്.

ഉദ്ഘാടന ചടങ്ങിൽ വെച്ച് തന്നെ ഈ ബഹുമതി നൽകി അവരെ ആദരിച്ചു. ശോഭന, നർത്തകി നടരാജ്, രാജശ്രീ വാര്യർ തുടങ്ങിയ പ്രഗത്ഭരായ കലാകാരന്മാരുടെ പ്രകടനങ്ങൾ വിവിധ ദിവസങ്ങളിലായി ആസ്വാദകർക്ക് മുന്നിലെത്തും. കൂടാതെ, വൈകുന്നേരങ്ങളിൽ കനകക്കുന്ന് കൊട്ടാരത്തിനുള്ളിൽ അരങ്ങേറുന്ന കഥകളി മേളയും കലാലോകത്തിന് വലിയൊരു മുതൽക്കൂട്ടാണ്.

advertisement

ടൂറിസം മന്ത്രി പി.എ. മുഹമ്മദ് റിയാസ് മേളയുടെ ഔദ്യോഗിക ഉദ്ഘാടനം നിർവ്വഹിച്ചു. ഉദ്ഘാടനത്തിന് പിന്നാലെ നർത്തകി നടരാജ്, രാജശ്രീ വാര്യർ എന്നിവരുടെ മനോഹരമായ ഭരതനാട്യ പ്രകടനങ്ങളും വേദിയിൽ അരങ്ങേറി. തികച്ചും സൗജന്യമായ പ്രവേശനത്തിലൂടെ എല്ലാ കലാവേദികളും ആസ്വദിക്കാനുള്ള അവസരമാണ് അധികൃതർ ഒരുക്കിയിരിക്കുന്നത്. വരും ദിവസങ്ങളിൽ നഗരഹൃദയം ഈ നൃത്തവിസ്മയത്തിൽ അലിഞ്ഞുചേരുമെന്ന് ഉറപ്പാണ്.