57,613 കോടിയിൽ 20,000 കോടി രൂപ കേന്ദ്രസർക്കാർ നൽകും. 3 ലക്ഷവും അതിൽ കൂടുതലും ജനസംഖ്യയുള്ള നഗരങ്ങളെയാകും ഈ പദ്ധതിയിൽ ഉൾപ്പെടുത്തുക. പബ്ലിക് പ്രൈവറ്റ് പാർട്ണർഷിപ്പ് (പിപിപി) മോഡലിൽ 10,000 ഇ-ബസുകളുള്ള സിറ്റി ബസ് സർവീസായിരിക്കും നടത്തുകയെന്നും കേന്ദ്രമന്ത്രി അനുരാഗ് താക്കൂർ പറഞ്ഞു. ഈ പദ്ധതി 10 വർഷത്തേക്ക് ബസ് സർവീസുകൾക്ക് വേണ്ട പിന്തുണ നൽകുമെന്നും മന്ത്രി പറഞ്ഞു.
3 ലക്ഷവും അതിൽ കൂടുതലും ജനസംഖ്യയുള്ള നഗരങ്ങളെ ഈ പദ്ധതിയിൽ ഉൾപ്പെടുത്തും. 169 നഗരങ്ങളിലാണ് പൊതു-സ്വകാര്യ പങ്കാളിത്ത (പിപിപി) മാതൃകയിൽ പതിനായിരം ഇ-ബസുകൾ വിന്യസിക്കുക. ഗ്രീൻ അർബൻ മൊബിലിറ്റി ഇനിഷ്യേറ്റീവിന് കീഴിൽ 181 നഗരങ്ങളിൽ അടിസ്ഥാന സൗകര്യങ്ങളും നവീകരിക്കും.
advertisement
മന്ത്രിസഭാ തീരുമാനത്തെ തുടർന്ന് ഇ-ബസുകൾ നിർമിക്കുന്ന ജെബിഎം ഓട്ടോയുടെ ഓഹരികൾ 10 ശതമാനത്തിലധികം ഉയർന്ന് 1474.45 രൂപയിലെത്തി. 1435 രൂപയിലാണ് ഇന്നലെ വ്യാപാരം അവസാനിച്ചത്.
ഈ പദ്ധതിയിൽ നിന്ന് നേട്ടമുണ്ടാക്കുമെന്ന് പ്രതീക്ഷിക്കുന്ന കമ്പനികളുടെ ഓഹരികൾ മന്ത്രിസഭാ തീരുമാനത്തിന് ശേഷം ഉയർന്നു. ഇലക്ട്രിക് ബസ് നിർമാതാക്കളായ ഒലെക്‌ട്ര ഗ്രീൻടെക്കിന്റെയും ജെബിഎം ഓട്ടോയുടെയും ഓഹരികൾ യഥാക്രമം 8.8 ശതമാനവും 10.1 ശതമാനവും വരെ ഉയർന്നു. ടാറ്റ മോട്ടോഴ്‌സ് ഓഹരി വില 1.9% വർധിച്ചു. അതേസമയം ഇലക്ട്രിക് ബസ് നി‍ർമാണ യൂണിറ്റുള്ള അശോക് ലെയ്‌ലാൻഡിന്റെ ഓഹരികൾ 2.5% വരെ ഉയ‍ർന്നിരുന്നു.
10,000 ബസുകൾ ഈ സിറ്റി ബസ് ഓപ്പറേഷനായി വിന്യസിക്കുന്നതിലൂടെ 45,000 മുതൽ 55,000 വരെ തൊഴിലവസരങ്ങൾ നേരിട്ട് സൃഷ്ടിക്കപ്പെടുമെന്നാണ് വിവരം.
ഈ സ്കീമിന് രണ്ട് വിഭാഗങ്ങളാണുള്ളത്. അവ ഏതൊക്കെയാണെന്ന് നോക്കാം..
സെഗ്മെന്റ് എ – സിറ്റി ബസ് സർവീസ് (169 നഗരങ്ങളിൽ)
പൊതു സ്വകാര്യ പങ്കാളിത്ത (പിപിപി) മാതൃകയിൽ 10,000 ഇ-ബസുകൾ ഉൾപ്പെടുത്തി സിറ്റി ബസ് ഓപ്പറേഷൻ വർധിപ്പിക്കുന്നതാണ് സെഗ്മെന്റ് എ.
സെഗ്മെന്റ് ബി – ഗ്രീൻ അർബൻ മൊബിലിറ്റി ഇനിഷ്യേറ്റീവ്സ് (GUMI) – (181 നഗരങ്ങളിൽ)
അടിസ്ഥാന സൗകര്യ വികസനം, മൾട്ടിമോഡൽ ഇന്റർചേഞ്ച് സൗകര്യങ്ങൾ, എൻസിഎംസി അടിസ്ഥാനമാക്കിയുള്ള ഓട്ടോമേറ്റഡ് ഫെയർ കളക്ഷൻ സിസ്റ്റം, ചാർജിംഗ് ഇൻഫ്രാസ്ട്രക്ചർ തുടങ്ങിയ ഹരിത സംരംഭങ്ങളാണ് പദ്ധതി വിഭാവനം ചെയ്യുന്നത്.
ഈ ബസ് സർവീസുകൾ നടത്തുന്നതിനും ബസ് ഓപ്പറേറ്റർമാർക്ക് പേയ്‌മെന്റുകൾ നൽകുന്നതിനും അതത് സംസ്ഥാനങ്ങൾക്കും നഗരങ്ങൾക്കുമാണ് ഉത്തരവാദിത്തം. സ്കീമിൽ പറഞ്ഞിരിക്കുന്ന നിർദിഷ്ട പരിധി വരെ സബ്സിഡി നൽകി കേന്ദ്ര സർക്കാർ ഈ ബസ് സർവീസുകളെ പിന്തുണയ്ക്കും.