യുഎസ് ആക്രമണം തുടർന്നാൽ ബാബ് അൽ-മാൻഡേബ് കടലിടുക്കിൽ പുതിയ യുദ്ധമുഖം തുറക്കുമെന്ന് ഇറാന്റെ ഭീഷണി

തെക്കൻ ഇറാനിൽ പ്രകോപനപരമായ നടപടികളുമായി ശത്രു മുന്നോട്ട് പോകാൻ തീരുമാനിച്ചാൽ, അവരെ അത്ഭുതപ്പെടുത്തുന്ന രീതിയിൽ പുതിയ മുന്നണികൾ തുറക്കപ്പെടുമെന്ന് സൈനിക വൃത്തങ്ങൾ വ്യക്തമാക്കിയതായി തസ്നീം റിപ്പോർട്ട് ചെയ്യുന്നു.  ഇറാനും ഇസ്രായേലും അമേരിക്കയും തമ്മിലുള്ള സംഘർഷം കടുക്കുന്ന സാഹചര്യത്തിലാണ് ഈ മുന്നറിയിപ്പ്.

സംഘർഷം വ്യാപിക്കുകയാണെങ്കിൽ ഇന്ത്യൻ മഹാസമുദ്രത്തെ ചെങ്കടലുമായും സൂയസ് കനാലുമായും ബന്ധിപ്പിക്കുന്ന ബാബ് അൽ-മാൻഡേബ് കടലിടുക്ക്, ഒരു പ്രധാന യുദ്ധമുഖമായി മാറുമെന്ന് റിപ്പോർട്ടിൽ പറയുന്നു. ലോകത്തിലെ ഏറ്റവും തന്ത്രപ്രധാനമായ കടലിടുക്കുകളിൽ ഒന്നായാണ് ബാബ് അൽ-മന്ദബ് പരിഗണിക്കപ്പെടുന്നതെന്നും, അതിനെതിരെ ഭീഷണി ഉയർത്താൻ ഇറാന് കഴിവുണ്ടെന്നും സൈനിക വൃത്തങ്ങൾ അറിയിച്ചു.

advertisement

ഹോർമുസ് കടലിടുക്കുമായി ബന്ധപ്പെട്ട് അമേരിക്ക ഏതെങ്കിലും തരത്തിലുള്ള നിയന്ത്രണങ്ങൾ ഏർപ്പെടുത്താൻ ശ്രമിച്ചാൽ മറ്റ് സമുദ്ര പാതകളിൽ തിരിച്ചടി നൽകുമെന്നും സൈന്യം മുന്നറിയിപ്പ് നൽകി. ഹോർമുസ് കടലിടുക്കിലെ പ്രശ്നങ്ങൾക്ക് അമേരിക്ക വിഡ്ഢിത്തം നിറഞ്ഞ പരിഹാരങ്ങളാണ് ആലോചിക്കുന്നതെങ്കിൽ, തങ്ങളുടെ പ്രശ്നങ്ങളുടെ പട്ടികയിലേക്ക് മറ്റൊരു കടലിടുക്ക് കൂടി ചേർക്കപ്പെടാതിരിക്കാൻ അവർ ശ്രദ്ധിക്കണമെന്നും അദ്ദേഹം കൂട്ടിച്ചേർത്തു. അമേരിക്ക ഒരു കരയുദ്ധത്തിന് മുതിരുകയാണെങ്കിൽ ചെങ്കടലിലെ കപ്പൽ പാതകളും ലക്ഷ്യമിടുമെന്ന് ഇറാൻ സൂചിപ്പിച്ചതായി എഎഫ്പി റിപ്പോർട്ട് ചെയ്തു.

സൈനിക നീക്കങ്ങൾക്ക് മറുപടിയായി 'സർപ്രൈസ് മുന്നണികൾ'

തെക്കൻ ഇറാനിലോ സമീപത്തെ കടലിലോ ശത്രുക്കൾ സൈനിക നടപടിക്ക് മുതിർന്നാൽ കടുത്ത രീതിയിൽ തിരിച്ചടിക്കുമെന്നും സ്ഥിതിഗതികൾ സൂക്ഷ്മമായി നിരീക്ഷിക്കുന്നുണ്ടെന്നും തസ്നീം റിപ്പോർട്ട് ചെയ്യുന്നു. പേർഷ്യൻ ഗൾഫിലോ ഒമാൻ കടലിലോ നാവിക വിന്യാസം നടത്തി ഇറാനെ പ്രതിരോധത്തിലാക്കാൻ ശ്രമിച്ചാൽ സംഘർഷം വ്യാപിപ്പിക്കുന്ന തരത്തിലുള്ള പ്രത്യാക്രമണങ്ങൾ ഉണ്ടാകുമെന്നാണ്  മുന്നറിയിപ്പ് . ഇറാനിയൻ ദ്വീപുകളിലോ മറ്റ് പ്രദേശങ്ങളിലോ കടന്നുകയറാനോ സൈനിക നീക്കങ്ങൾ വഴി ഇറാനെ തളർത്താനാണ് ശത്രുക്കൾ ശ്രമിക്കുന്നതെങ്കിൽ, അവർക്ക് യാതൊരു പ്രയോജനവും ലഭിക്കാത്തതും എന്നാൽ അവരുടെ നഷ്ടങ്ങൾ ഇരട്ടിയാക്കുന്നതുമായ പുതിയ മുന്നണികൾ തുറക്കുമെന്നും സൈനിക വൃത്തങ്ങൾ പറഞ്ഞു.

ബാബ് അൽ-മാൻഡേബ് കടലിടുക്ക്

ചെങ്കടലിനെ ഏദൻ ഉൾക്കടലുമായും, അതുവഴി സൂയസ് കനാൽ വഴി ഇന്ത്യൻ മഹാസമുദ്രത്തെ മെഡിറ്ററേനിയൻ കടലുമായും ബന്ധിപ്പിക്കുന്ന അതീവ നിർണ്ണായകമായ ഒരു സന്ധിയിലാണ് ബാബ് അൽ-മന്ദബ് കടലിടുക്ക് സ്ഥിതി ചെയ്യുന്നത്. ഇതിന്റെ ഭൂമിശാസ്ത്രപരമായ പ്രത്യേകതകൾ തന്നെ ഈ പാതയെ എളുപ്പത്തിൽ ആക്രമിക്കപ്പെടാൻ സാധ്യതയുള്ള ഒന്നാക്കി മാറ്റുന്നു. ഏറ്റവും വീതി കുറഞ്ഞ ഭാഗത്ത് ഈ പാതയ്ക്ക് ഏകദേശം 26 കിലോമീറ്റർ മാത്രമാണ് വീതിയുള്ളത്. ഇതിനർത്ഥം, ചെറിയ തോതിലുള്ള സൈനിക തടസ്സങ്ങൾ പോലും കപ്പൽ ഗതാഗതത്തെ വലിയ തോതിൽ ബാധിക്കുമെന്നാണ്.

ഒരു വശത്ത് യെമനും മറുവശത്ത് ജിബൂട്ടി, എറിത്രിയ എന്നീ രാജ്യങ്ങൾക്കും ഇടയിലാണ് ഈ കടലിടുക്ക് സ്ഥിതി ചെയ്യുന്നത്. നിലവിൽ തന്നെ സംഘർഷങ്ങളും അസ്ഥിരതയും നിലനിൽക്കുന്ന ഒരു മേഖലയിലായതിനാൽ, ഭൗമരാഷ്ട്രീയ പിരിമുറുക്കങ്ങൾ ഉണ്ടാകുന്ന സമയങ്ങളിൽ ശത്രുവിനെ സമ്മർദ്ദത്തിലാക്കാൻ പറ്റിയ ഒരു പ്രധാന കേന്ദ്രമായി ഇത് മാറുന്നു.