യുഎസ്-യുകെ താവളങ്ങൾക്ക് നേരെയുള്ള ഇറാൻ ആക്രമണത്തിന് പിന്നിൽ റഷ്യയോ?

മാർച്ച് 24, 25 തീയതികളിൽ റഷ്യൻ ഉപഗ്രഹങ്ങൾ ഡീഗോ ഗാർഷ്യയിലെ സംയുക്ത യുഎസ്-യുകെ താവളത്തിന്റെ ചിത്രങ്ങൾ പകർത്തിയതായി സെലൻസ്‌കി പറഞ്ഞു. ഇറാനുമായുള്ള രഹസ്യാന്വേഷണ വിവരങ്ങൾ പങ്കുവെക്കുന്നതിന്റെ ഭാഗമായാണ് മോസ്കോയുടെ ഈ നീക്കമെന്നും അദ്ദേഹം അവകാശപ്പെട്ടു. ഡീഗോ ഗാർഷ്യ ലക്ഷ്യമാക്കി ഇറാൻ രണ്ട് ബാലിസ്റ്റിക് മിസൈലുകൾ തൊടുത്തുവിട്ടെങ്കിലും അവ ലക്ഷ്യസ്ഥാനത്ത് എത്തുന്നതിന് മുൻപേ പരാജയപ്പെട്ടിരുന്നു. ഇതിന് പിന്നാലെയാണ് റഷ്യൻ നിരീക്ഷണത്തെക്കുറിച്ചുള്ള വിവരങ്ങൾ പുറത്തുവരുന്നത്.

സൈനിക അടിസ്ഥാന സൗകര്യങ്ങളുടെ ഉപഗ്രഹ ചിത്രങ്ങൾ ആവർത്തിച്ച് ശേഖരിക്കുന്നത് വരാനിരിക്കുന്ന വലിയ ആക്രമണങ്ങളുടെ സൂചനയാണെന്ന് ഉക്രെയ്നിലെ യുദ്ധാനുഭവങ്ങൾ ചൂണ്ടിക്കാട്ടി സെലൻസ്‌കി പറഞ്ഞു. ഗൾഫ് മേഖലയിലെ മറ്റ് താവളങ്ങളും ഇത്തരത്തിൽ മാപ്പ് ചെയ്തിട്ടുണ്ടാകാമെന്നും അദ്ദേഹം കൂട്ടിച്ചേർത്തു. ഇറാൻ നടത്തുന്ന ആക്രമണങ്ങളിൽ റഷ്യയുടെ പരോക്ഷ സഹായം ഉണ്ടെന്നാണ് ഉക്രെയ്നിന്റെ പക്ഷം.

advertisement

ഇന്ത്യൻ സമുദ്രത്തിൽ സ്ഥിതി ചെയ്യുന്ന ഡീഗോ ഗാർഷ്യ അമേരിക്കയുടെയും ബ്രിട്ടന്റെയും ഏറ്റവും പ്രധാനപ്പെട്ട സൈനിക താവളങ്ങളിലൊന്നാണ്. ഈ മേഖലയെ ലക്ഷ്യം വെക്കുന്നത് ആഗോളതലത്തിൽ തന്നെ വലിയ പ്രത്യാഘാതങ്ങൾ ഉണ്ടാക്കുന്ന ഒന്നാണ്. എന്നാൽ സെലൻസ്‌കിയുടെ ഈ ആരോപണങ്ങളോട് റഷ്യ ഇതുവരെ ഔദ്യോഗികമായി പ്രതികരിച്ചിട്ടില്ല.